పేజీలు

' నువ్వొక పచ్చని చెట్టయితే పిట్టలు వాటంతట అవే వచ్చి వాలేను'..!. ‎

14, మార్చి 2014, శుక్రవారం

Panasakarla Prakash కవిత

మీరూ నేను ఆకలిగా ఉ౦ది మనసుకి నా పక్కనే కూర్చుని నాలుగు మాటల మెతుకులు పెట్టేవారు లేక......... దాహ౦గా ఉ౦ది గు౦డెకు ఆత్మీయమైన చేతి స్పర్శతో రోజుకొకసారైనా నా గు౦డె తలుపులు తట్టే వారు లేక...... వెలుతురు తగలడమేలేదు కళ్ళకి మసకబారిన నా గతాన్ని నాలుగు గోడల మధ్యను౦చి బైటికి తీసుకొచ్చేవారులేక‌ చలన౦ లేదు కాళ్ళకి ఇ౦తమ౦దిని మోసీ మోసీ మూలన పడ్డ౦దుకు మొక్కే దిక్కు లేక... రోజూ అద్ద౦లో ఏ౦ చూసుకు౦టారు ఒక్కసారైనా నా మొహ౦లోకి చూడ౦డ్రా వెలిగే మీ రూపాలకోస౦....... పాడుబడ్డ గుడినని అశ్రద్ద చేయక౦డి.. విగ్రహ౦ ఉన్నన్నాళ్ళైనా కొ౦చె౦ నైవేద్య౦ పెట్ట౦డర్రా.... మహాఐతే ఎన్ని రోజులు ఈ ముసలి దీప౦లో చమురు ఇ౦కిపోయేదాకా.......అ౦తేకదా..! వయసులో ఉన్నా‍౦కదాని నా మాట వినకు‍‍‍‍‍‍‍‍‍౦డావిర్రవీగుతున్నారా? జాగ్రత్తరోయ్.... ఎ౦దుక౦టే........నేను చచ్చినా మీ వయసుకి రాలేనుకానీ....... మీరు చచ్చినట్టు నా వయసుకి రావాల్సి౦దే..... పనసకర్ల‌ 14/03/2014

by Panasakarla Prakash



from kavi sangamam*కవి సంగమం*(Poetry ) http://ift.tt/OaLnbz

Posted by Katta

Jagaddhatri Dhaathri Jagathi కవిత

||జగద్ధాత్రి|| కలరాహిత్యం|| కలలు కనడం రాలేదు నాకు ఎందుకో మరి....... ఆశలు నిండిన ఊహలు పండాలనే కలలు నా కనుల గుమ్మానికి ఎప్పుడూ అపరిచితలే కలరవాలు కలవరాలు ఎరుగనిది నా కనుదోయి అనుభవాలు అనుభూతులై ఎదురైనప్పుడు వాటిని ఆస్వాదించడమే కానీ రంగుల కలలుగా అవి నాకు ముందరే అగుపించిన వైనమైతే లేదు గాలిలో మేడలు కడుతూ ఆకాశం లో విహరించే రంగురంగుల విహంగాల స్వప్నాలు ఎన్నడూ మరి నా హృదయ వృక్షం పై వాలలేదెందుచేతో ..... ఎప్పటికప్పుడు జీవితం ఆవిష్కరించే సరి కొత్త ఆనంద విషాదాలను యధాతధంగా స్వీకరించడమే తప్ప కల గన్నది లేదు ..... ఊహల్లో తేలలేదు ఎన్నడూ బతుకు సంద్రానికి కల దీపం అగుపడలేదు ఆశల హర్మ్యాలూ కట్టలేదు ఎప్పుడూ అప్పుడప్పుడూ వేదనా భయాలు పీడ కలలై వేధించిన మాట వాస్తవమే కానీ సప్తవర్ణ స్వప్నాలు కనికరించింది లేదు నా కనులను అందరిలా నేను ఉండలేక పోవడం రంగుల కలలు కనలేక పోవడం ఏమన్నా లోపమా నాలో అని భయమేస్తుంది ఒకోసారి కన్న కలలు వెతలై బతుకు భంగపడిన వారిని చూసినపుడు కలలు కనలేని నా అశక్తత నాకు అపురూపమైన శక్తిగా అవుపిస్తుంది అపరిమితమైన అవాస్తవికమైన అభూత కల్పనా జగత్తులోనికి నాకు ప్రవేశం లేనందుకు ఆనందం కలుగుతుంది తెలి మబ్బులలో తేలి పోతూ ఆధాటున భూమి మీదకి రాలి పడటం కలకీ వాస్తవానికీ అనుసంధానం కుదరక రాజీ పడలేక ... గాఢమైన అసంతృప్తితో పరితపించే ప్రహసనం నా జీవితంలో లేనందుకు ... కలల బరువును నా కనుపాపలు మోయాల్సిన అగత్యం తప్పినందుకు ఆనందంగా కలల మాంత్రికుల పాల పడకుండా బతుకు కావడిని మోసుకుంటూ వాస్తవం లోనే ...వాస్తవంగానే .... కష్ట సుఖాలను అనుభూతిస్తూనే ... అప్పుడప్పుడూ జీవిస్తూ ....ఎప్పుడూ బతికేస్తూ ..... !!! ........................................................జగద్ధాత్రి 3.04 పి ఏం 14/3/2014 శుక్రవారం

by Jagaddhatri Dhaathri Jagathi



from kavi sangamam*కవి సంగమం*(Poetry ) http://ift.tt/1oT0mSC

Posted by Katta

Vinjamuri Venkata Apparao కవిత

కీ.శే.గాడేపల్లి కుక్కుటేశ్వరరావుగారు.... విషయము: ఆంధ్రకవులు, వారిని ఉచితరీతిని సత్కరించిన మహారాజులు నన్నయభట్టు లేకున్నచో రాజరాజనరేంద్రుకీర్తి కృష్ణార్పణమ్ము, తిక్కయజ్వయలేక తెలుగున మనుమసిద్ధినృపాలుపేరు సోదెకునురాదు, శ్రీనాధకవిరాజులేక వీరారెడ్డి,అవచితిప్పయ్య,విస్సన్న సున్న, అలసానివారులేరా,కృష్ణరాయలప్రతిభకు కపిలదస్త్రాలె దిక్కు, చచ్చి,దుమ్మైననృపతుల చావనీక దుమ్ముపైనిన్ని యమృతబిందువులు చల్లి తిరిగి బ్రదుకిచ్చి జగతి సుస్థిరులజేసె సుకవియను మేటియైంద్రజాలికుడొకండు

by Vinjamuri Venkata Apparao



from kavi sangamam*కవి సంగమం*(Poetry ) http://ift.tt/1hi5OeY

Posted by Katta

Yasaswi Sateesh కవిత



by Yasaswi Sateesh



from kavi sangamam*కవి సంగమం*(Poetry ) http://ift.tt/1ghp0qY

Posted by Katta

Nvmvarma Kalidindi కవిత

కె.ఎన్.వి.ఎం.వర్మ//చక్రం-14// సాలెగూడు మధ్యలో తూనిగ ట్రాఫిక్ కానిస్టేబులు రన్నింగ్ బస్సు చడో ఉతరో బస్సు స్టాపు అక్కడే సారూ సారూ సిటీలో పలకరింపులు అన్నలంతా అడవిలో రోడ్డు మద్యలో ఫ్లైఓవరు ఫుట్పాత్ మీద పక్కావ్యాపారం వాలెట్ పార్కింగ్ దేశంలో మాదే మొదటిస్థానం ఒకేలాంటి బోర్డులు ఐదు కార్పొరేట్ కాలేజీలు గుడ్డలిప్పుకొన్న హీరోయిన్ సినిమా పోస్టర్ చూసావో యాక్సిడెంట్ ఇరానీ చాయ్ హైదరబాద్ బిర్యానీ అంతేనా పాత బస్తీ గల్లీలూ చూడు ఒకప్పటి నగరం ఇప్పుడొక ఎడారి దేశం నీళ్లు మొక్కలు లేవిక్కడ....11.03.2014.

by Nvmvarma Kalidindi



from kavi sangamam*కవి సంగమం*(Poetry ) http://ift.tt/PzxoNA

Posted by Katta

Vakkalanka Vaseera కవిత

నీ కోసమే! మంచు బిందువు చేతులు చాచింది మట్టిలోపలికి వెళ్లిన వట్టివేరు సైతం చేతులు చాచింది ఆకుపచ్చని గడ్డిపరకై మహావృక్షాలలోని ప్రాణశక్తి నీ కోసం పత్రం, పుష్పం, ఫలం చాచాయి భూగోళ అండం మధ్య సొనగా విస్తరించిన అదృశ్య జలమైదానంలో బహుశ నీ తరంగ నాదాలే వేర్లుగా భూతలం మీది శబ్దాలు చేతులు చాచాయి మహా శూన్యంలోని మెత్తటి పొత్తిళ్లలో ఒత్తిగిలి ఉత్తర దక్షిణాల మధ్య ప్రాక్‍ పశ్చిమాల మధ్య తూగే నీ ఉయ్యాలలో ఊగుతూనే నీ ఉయ్యాలను ఊపడానికి మంచు బిందువు చేతులు చాచింది మెత్తటి మేఘమై పోయి వట్టివేరు చేతులు చాచింది ఆకుపచ్చని గడ్డి పరకై చేతులు చాచింది విశ్వజనని తొలిఆనందాశృవు నీ ఊయలై వసీరా

by Vakkalanka Vaseera



from kavi sangamam*కవి సంగమం*(Poetry ) http://ift.tt/1ghp0an

Posted by Katta

Yasaswi Sateesh కవిత



by Yasaswi Sateesh



from kavi sangamam*కవి సంగమం*(Poetry ) http://ift.tt/1dXUV2Y

Posted by Katta

Aduri Inna Reddy కవిత

Aduri Inna Rddy || జ్ఞాపకాలు రక్త దీపార్చనలు చేసుకొంటున్నాయి || జ్ఞాపకం మనిషి కథని తనలోనే దాచుకొని నిజం నిర్జీవమై మౌనం దాల్చి పునర్జీవనమే తెలీని దాని మల్లే తనలో తానే ఒదిగిపోతోంది మనిద్దరిజ్ఞాపకాలు రక్త దీపార్చనల జాతర జరుపుకుంకుంటున్నాయి . కంటీకి కనిపించని దారుణాలు కటిక చీకట్లో జరిగిపోతున్నాయి నీవు ఎవ్వరికీ తెలియదు అనుకుంటున్నా చెప్పాలిసినవాల్లు చెప్పుకొంటూ గుస గుస లాడుకుంటూనే ఉన్నారు నీకు తెలియకుండా నమ్మక ద్రోహం జరిగిపోతూనే ఉంది నీవు గుడ్డీగా నమ్ముతూనే ఉన్నావు ఇది నింగికి ,నేలకు ఇప్పటిది కాదు వైరం ఆత్మ మాయని జార విడిచినప్పటి నుండి .. నిజంస్వాపికుడి దేహాన్ని వదలి ఆత్మ అర్ధంతరంగా వెళ్లి పోతుంది ఎవ్వరూ చూడకూడదనేమో కదూ మట్టిలో మమతలు మయమై పోయి మరణం లోకి ఎగిరి పోతున్నాయి కలలన్నీ దుఖం తో నిండి పోయి దూరంగ జ్ఞాపకాలను విసిరేస్తున్నాయి ఓ నిజాన్ని గర్భం చీకట్లలో దాచుకుంటుంది … గొంతు విప్పి చెప్పాలని ఉన్నా నీవే నాగొంటు వినకూడదని గొంతు నోక్కేసావు మరి జరుగుతున్న వాస్తవాలు నీకెలా చెప్పను

by Aduri Inna Reddy



from kavi sangamam*కవి సంగమం*(Poetry ) http://ift.tt/1ijIe4b

Posted by Katta

యం. శ్రీవల్లి కవిత

llసంకల్పంll యం.శ్రీవల్లి. బేలగా కూర్చున్నా.. కళ్ళల్లో బాధ, మనసులో పుట్టెడు దిగులుతో.. ఏటికి ఎడురీద లేక..ముందుకు సాగలేక... అర్ధాంతరంగా పయనం ముగించలేక.. కుప్పకూలిపోతున్న ఆశల సౌధాలని నిలబెట్టలేక.. మనసంతా ఆవహించిన భయాన్ని నిస్సహాయంగా అనుభవిస్తూ.. భయం, బలహీనత, ఆత్మన్యూన్యత, పిరికితనం పిశాచాలై నను కబళిస్తుండగా.. ముందుకు సాగలేక, అడుగు ముందుకు వేయలేక.. ఆలోచిస్తున్నా... ఉవ్వెత్తున ఎగసే కెరటం క్రింద పడుతోంది..మళ్ళీ లేవటానికేగా.. క్షణంలో మాయమయ్యే మెరుపు..మరింత తేజస్సుతో వస్తోంది.. ఎప్పటికైనా ఫలిస్తాననే కదా...ఆశ మళ్ళీ మళ్ళీ పుడుతోంది.. ఇంతటి శక్తి వీటికి ఎవరిచ్చారు? నోటితో పలకరింపు వద్దు..నొసటి వెక్కిరింపు వద్దు.. జాలి చూపులు వద్దు, మొసలి కన్నీరు వద్దు.. ఉన్నదొక్కటే..సంకల్పం. సంసిద్ధమవుతున్నా.. నా జీవన గమనాన్ని నేనే నిర్దేశించుకుంటూ నాకు నేనే ధైర్యం, నేనే సైన్యంగా.. నేనే సారధిగా, ఆశలనే అస్త్రాలుగా .. ధృడమైన మనో నిశ్చయంతో..నింగికెగసే ఆరాటంతో.. కొండల్ని పిండిచేసే గుండె నిబ్బరంతో... మహా ప్రళయాన్నితట్టుకునే ఆత్మ విశ్వాసంతో.. మహాసముద్రాన్ని దాటిన మారుతి వేగంతో.. ఎల్లలు లేని సంకల్ప దీక్షతో .......కార్యసిద్ధికి.

by యం. శ్రీవల్లి



from kavi sangamam*కవి సంగమం*(Poetry ) http://ift.tt/1cX50zf

Posted by Katta

Abd Wahed కవిత

గాలిబ్ కవితల్లో ఈ రోజు మొదటి కవిత గాలిబ్ సంకలనంలోని 10వ గజల్లో 7వ షేర్ ఉగా హై ఘర్ మేం హర్ సూ సబ్జా వీరానీ తమాషా కర్ మదార్ అబ్ ఖోద్నే పర్ ఘాస్ కే, హై మేరే దర్బాం కా ఇంట ఎటుచూసినా గడ్డిగాదాల నిర్మానుష్య దృశ్యం కావలి వాని పని కలుపును తీయడమే ఇప్పుడు ఉర్దూ పదాల అర్ధాలు చూద్దాం. ఉగా అంటే మొలకెత్తడం, హర్సూ అంటే అన్నివైపులా, సబ్జా అంటే గడ్డిగాదం, కలుపుమొక్కలు, వీరానీ అంటే మానవసంచారం లేకపోవడం, మదార్ అంటే ఆధారం, దారో మదార్ అన్న పదబంధాన్ని ఎక్కువగా వాడుతుంటారు, అంటే అర్ధం ఆధారమని. ఆమాల్ కా దారోమదార్ నియ్యత్ పర్ హై అంటే ఆచరణలు సంకల్పంపై ఆధారపడి ఉంటాయని భావం. దర్బాం అంటే కావలి వాడు, వాచ్ మేన్. ఒక నిరాశకరమైన పరిస్థితిని కాస్త హాస్యం, మరికాస్త వ్యంగ్యం జోడించి ఈ కవితలో గాలిబ్ చెప్పాడు. తన పతనావస్థనే గాలిబ్ ఇందులో వర్ణించాడు. చదివిన వారికి బాధతో పాటు నవ్వు కూడా వస్తుంది. గాలిబ్ తన ధనసంపదలన్నీ ప్రేయసి మోజులో ఖర్చుపెట్టేశాడు. తన ప్రేయసి సంతోషం తప్ప మరి దేన్నీ ఆయన లక్ష్యపెట్టలేదు. ఒకప్పుడు ఆయన ఇల్లు ఒక మహలులా ఎంతో అందంగా, ఆడంబరంగా ఉండేది. కాని ఆయన ప్రేమలో పడి ఏదీ లక్ష్యపెట్టనందువల్ల ఇంటిపై శ్రద్ధ పెట్టలేదు. శుభ్రం చేసేవారు లేరు. ఇంట్లో ఎటుచూసినా గడ్డిమొక్కలు, కలుపుమొక్కలతో అడవిలా తయారైంది. గాలిబ్ ఇంటికి ఒక వాచ్ మేన్, ఒక నమ్మిన బంటు ఉన్నాడు. ఒకప్పుడు ఈ నమ్మినబంటు ఆయన ఇంటి రక్షణ చూసేవాడు. కాని ఇప్పుడు ఆ నౌకరు పని కలుపుమొక్కలు పెరకడంగా మారింది. ఎందుకంటే ఇంట్లో విలువైన వస్తువులేవీ మిగల్లేదు. కాబట్టి ఇంట్లో దొంగలు పడే ప్రమాదం లేదు. గడ్డిమొక్కలు ఇంటిని ఆక్రమించుకునే ప్రమాదాన్ని అరికట్టడమే నౌకరు పనిగా మారింది. ఈ కవితలో చమత్కారమేమంటే, తన ఇంటికి అవాంఛనీయ వ్యక్తులు ఎవరు రాకుండా కాపాడ్డానికి గాలిబ్ నియమించుకున్న నౌకరు ఇప్పుడు అవాంఛనీయ మొక్కలు పెరక్కుండా చూసుకుంటున్నాడు. మనుష్యులు ఎలాగూ అక్కడికి రావడం లేదు. ఉర్దూలో కలుపుమొక్కలను సబ్జ యే బేగానా అంటారు. సబ్జ అంటే పచ్చదనం అన్న అర్ధం ఉంది. నిర్మానుష్య ప్రదేశంగా తన ఇంటిని వర్ణించడం ద్వారా కూడా గాలిబ్ తన ఉనికి కూడా లేదన్న భావాన్ని ప్రకటించాడు. ఈ కవిత విఫల ప్రేమను ప్రకటించే కవిత అయినప్పటికీ ఇందులోని సున్నితమైన వ్యంగ్యం వల్ల భిన్నమైన సందర్భాల్లో కూడా అన్వయించే కవితగా మారింది. ఉదాహరణకు, ఏదన్నా వ్యాపారం చాలా బాగా నడుస్తున్నప్పుడు సందడిగా కళకళలాడుతూ ఉంటుంది. అందరూ పనిలో బిజీగా ఉంటారు. కాని అదే వ్యాపారం దెబ్బతిని, సందడి లేక కళావిహీనమైనప్పడు, పాత వస్తువులనే అటూ యిటూ సర్దుతూ గడపడం జరుగుతుంది. ఇలాంటి అనేక సందర్భాల్లో వచ్చేపోయే వారు ఎవరు లేకపోయినా, పెరిగిన గడ్డిగాదాన్ని తొలగించే పని ఉందికదా అనుకోవడం లాంటిది ఈ కవిత. గాలిబ్ కవితల్లో ఉన్న ప్రత్యేకత ఇదే. విభిన్న సందర్భాలకు అతికినట్లు ఈ కవితలను కోట్ చేయవచ్చు. ఈ రోజు గాలిబ్ కవితల్లో రెండవ కవిత, గాలిబ్ సంకలనం 10వ గజల్లోని 9వ కవిత హనూజ్ ఏక్ పర్తూ యే నక్షె ఖయాలె యార్ బాకీ హై దిలె అఫ్సుర్దా గోయా హుజ్రా హై యూసుఫ్ కే జిందా కా ఇప్పుడు ప్రేయసి ఆలోచనల నీడల చిహ్నమే మిగిలింది యూసుఫ్ ను నిర్భందించిన జైలులా.. భగ్న హృదయమా.. ఉర్దూ పదాలకు అర్ధాలు చూద్దాం. హనూజ్ అంటే ఇప్పటి వరకు లేదా ఇప్పుడు అని అర్ధం. పర్తూ అంటే నీడ, నక్ష్ అంటే చిత్రం, ఖయాలె యార్ అంటే ప్రేయసి ఆలోచన, దిలె అఫ్సుర్దా అంటే నిరాశపడిన, లేదా భగ్నపడిన హృదయం. గోయా అన్నది పోలిక చెప్పడానికి ఉపయోగించిన పదం. హుజ్రా అంటే జైలు గది, జిందాం అంటే జైలు. ఈ కవితలో గాలిబ్ విఫల ప్రేమికుడిని వర్ణించాడు. ఆ ప్రేమికుడు మరెవరో కాదు తానే. ప్రేయసి జ్ఙాపకాలతో, ప్రేయసి మాటలతో ఒకప్పుడు చాలా సంతోషంగా ఉండేవాడు. కాని ప్రేయసి అతడిని తిరస్కరించింది. గాలిబ్ హృదయం వక్కలయ్యింది. భగ్న హృదయమా అంటూ సంబోధిస్తూ, ఇక తన హృదయంలో తీయని జ్ఙాపకాలు కూడా మిగల్లేదని, కేవలం ఆ జ్ఙాపకాల నీడల చిత్రం మాత్రమే మిగిలిందంటున్నాడు. అంటే జ్ఙాపకాలు వదిలి వెళ్ళినా గాలిబ్ మాత్రం మరిచిపోడానికి సిద్ధంగా లేడు. ఈ కవితలో గాలిబ్ దివ్యఖుర్ ఆన్ లో యూసుఫ్ ప్రవక్త (జోసెఫ్) జైలు కధను ప్రస్తావించాడు. యూసుఫ్ అసాధారణమైన అందగాడు. ఆయన్ను రాజుభార్య జులేఖా మోహించింది. కాని యూసుఫ్ దైవభీతితో ఆమె కోరికను తిరస్కరించాడు. మహారాణి జులేఖా ఆగ్రహంతో యూసుఫ్ తనతో అసభ్యంగా ప్రవర్తించాడని ఆరోపించింది. రాజు కోపంతో మండిపడి యూసుఫ్ ను కారాగారంలో పడేశాడు. చీకటి కొట్టం లాంటి ఆ కారాగారం కూడా యూసుఫ్ అద్భుత సౌందర్యం వల్ల దేదిప్యమైన కాంతితో వెలిగిపోయింది. యూసుఫ్ ను ఆ కారాగారం నుంచి విడుదల చేసిన తర్వాత కూడా ఆ కాంతి అలాగే ఉందంట. ఎందుకంటే యూసుఫ్ నీడ ఒక చిత్రంగా అక్కడే ఉన్నందువల్ల ఆ కారాగారం ప్రకాశించేదట. ఇక్కడ గాలిబ్ తన ప్రేయసిని అలాంటి అద్భుత సౌందర్యరాశిగా వర్ణిస్తున్నాడు. తన హృదయం యూసుఫ్ ప్రవక్తను బంధించిన కారాగారం లాంటిదని, అందులో నుంచి ప్రేయసి ఆలోచనల నీడలు కూడా వెళ్ళిపోయినా, వాటి చిహ్నాల వల్ల ప్రకాశవంతంగా తన హృదయం వెలుగుతుందని పోల్చాడు. తన హృదయాన్ని యూసుఫ్ ను బంధించిన కారాగారంగాను, తన ప్రేయసి జ్ఙాపకాన్ని యూసుఫ్ వంటి అద్భుత సౌందర్యంతో కూడిన భావంగాను పోల్చడం ద్వారా తన ప్రేమకు పవిత్రతను ఆపాదించడం కూడా ఇందులో కనబడుతుంది. ఈ కవితను మరోకోణంతో చూస్తే, దేవుని పట్ల ప్రేమ ఉన్న వ్యక్తి దైవాదేశాలను పాటిస్తూ జీవితాన్ని గడుపుతాడు. కాని, దైవాదేశాలను అతిక్రమించడం అంటే దేవుని ప్రేమను కోల్పోవడమే. కాని దేవుని ప్రేమ ఎంత ప్రకాశవంతమైనంటే, హృదయం నుంచి ఆ ప్రేమ తాలూకు నీడ కూడా నిష్క్రమించినా, దాని చిహ్నాలు ప్రకాశవంతంగా గుండెను తేజోవంతం చేస్తూనే ఉంటాయి. దాన్ని గుర్తించి మళ్ళీ ఆ ప్రేమను పొందే ప్రయత్నం చేయాలన్న భావం కూడా ఇందులో ఉంది. ఈ రోజు మూడవ కవిత గాలిబ్ సంకలనంలోని 10వ గజల్లో 12వ షేర్ నజర్ మేం హై హమారీ జాదా యే రాహె ఫనా గాలిబ్ కె యే షీరాజా హై ఆలమ్ కే అజ్ జా యే పరేషాం కా వినాశమార్గం పై నా దృష్టి కేంద్రీకరించే ఉన్నాను చిందరవందరైన ప్రపంచభాగాలను కలిపే సూత్రం ఇదే కదా ఉర్దూ పదాలను చూద్దాం. జాదా అంటే మార్గం, బాట, రాహె యే ఫనా అంటే వినాశం వైపు వెళ్ళే దారి, షీరాజా అంటే పుస్తకంలో పేజీలను కలిపి కుట్టే దారం, జుజ్ అంటే ఒక భాగం దీనికి బహువచనం అజ్ జా అంటే అనేక భాగాలు. ఫరేషాం అంటే సాధారణంగా ఆందోళన, బాధలను సూచిస్తూ వాడుతాం, కాని పరేషాం అంటే చిందరవందరై పోవడం అని అర్ధం. ఆలమ్ అంటే ప్రపంచం. ఈ కవిత తాత్విక చింతన ప్రకటించే కవిత. వినాశానికి వెళ్ళే మార్గాన్ని తన చూపులు ఎన్నడూ మరిచిపోలేదు. ఆ మార్గంపైనే ఆయన దృష్టి ఎప్పుడూ ఉంది. ఎందుకంటే ఈ ప్రపంచంలోని ప్రతిభాగం వినాశపథానే పయనిస్తోంది. అన్ని భాగాలను కలిపే సూత్రం అదే. చివరకు అన్నీ మూలంతో కలిసిపోవలసిందే. ప్రపంచంలోని ప్రతిదీ, ప్రతివస్తువు, అది స్వతహాగా విభిన్నమైనదైనా, విశిష్టమైనదైనా ఎలాంటిదైనా చివరకు అంతం కావలసిందే. మూలపదార్ధంతో కలిసిపోవలసిందే. అంటే ప్రపంచమనే పుస్తకంలోని అన్ని పేజీలను కలిపి కుట్టిన దారం లాంటిది వినాశం. చివరకు అన్నీ పంచభూతాల్లో కలిసేవే. రాగద్వేషాలు కూడా అంతరించక తప్పదు. ’’కుల్లు మన్ అలైహా ఫాన్‘‘ అంటుంది ఖుర్ ఆన్. భూమిపై ఉన్న సమస్తమూ అంతరించక తప్పదు. ఇదే మాటను గాలిబ్ తనదైన శైలిలో చెప్పాడు. ఎవరికైనా మరణం తప్పదు. అందుకే వి ఆర్ ఆల్ యునైటెడ్ ఇన్ డెత్ అంటారు. చిందరవందరగా ఉన్న ప్రపంచం అనే పుస్తకంలోని పేజీలన్నింటినీ కలిపి కుట్టిన దారం వంటిది వినాశం అని వర్ణించడంలో గాలిబ్ తాత్వికదృష్టి గమనించ దగ్గది. ప్రపంచంలో వివిధ జాతులు, మతాలు, వర్గాల మనుష్యుల మధ్య ఎన్ని విభేదాలున్నా అందరూ చివరకు మరల వలసిన గమ్యం ఒక్కటే. జీవితమనే పుస్తకంలో వివిధ పేజిలన్నింటిని చివరకు కలిపేది ఒక్కటే. చదివిన కొద్ది కొత్త భావాలను అందించే లోతయిన కవిత. మొత్తం గజల్లో ప్రేమభావాన్ని రాస్తూ వచ్చిన గాలిబ్ చివరి షేర్ లో చెప్పిన ఈ మాటలు గమనించదగ్గవి. విశ్వంలో మనిషి, మనిషిలో ఉన్న రాగద్వేషాలు, ప్రేమలు, నిరాశలు, విషాదాలు, విభేదాలు ఏవయినా కాని చివరకు మనం ప్రయాణిస్తున్న మార్గం తన గమ్యానికి చేరక తప్పదన్న తాత్విక చింతనతో ప్రేమకవితను ముగించాడు గాలిబ్. ఇది ఈ రోజు గాలిబానా. మళ్ళీ శుక్రవారం కలుద్దాం. అంతవరకు సెలవు. అస్సలాము అలైకుమ్.

by Abd Wahed



from kavi sangamam*కవి సంగమం*(Poetry ) http://ift.tt/1m0U3PW

Posted by Katta

13, మార్చి 2014, గురువారం

Balu Vakadani కవిత

బాలు వాకదాని ||బ్రతుకు పోరాటం|| బిందాస్ మాటలన్నీ మనోనిబ్బరంకోసమే, కడుపు నిండికాదు వీధి వీధి తిరిగేది ఆసరాకోసమే, ఆనందం కోసం కాదు అంతర్జాల గోడలపై తగిలించిన బొమ్మలన్నీ పాతవే, కాస్త ఉరటకోసం బాకీ లెక్కల కాగితం గుండెను తడుముతుంది చొక్కా జోబులోనుంచి నా వాళ్ళంతా నిలదీస్తున్నారు నన్ను నిలబెట్టటానికి అణిచిపెట్టిన ఆసక్తినంతా కొలమానాలతో చూపించాలెమో! దగాపడిన హృదయం మరోసారి సిద్దమౌతుంది తాకట్టుకి తగలపెట్టిన ఆదర్శాలు, సిద్ధాంతాలలోనుంచి తీసిన ఆయుధంతో మంచి మనసుని పొడవాలి కావలిసిన దానికోసం కసితో నేన్నుంటే, కాకమ్మ కథలంటారేమో! దారంతా వెతుకులాటే, కాస్త వెలుతురు వేసేవాళ్ళు తోడైతే భావుండు మన:శాంతి, మనోవేదన పట్టింపులేమీలేవు, కాస్త పనుంటే చాలు ఇంతకన్నా సాక్షాలు ఏంచూపను? రూపీకోసం, రోటీకోసం చస్తున్నానని బాలు వాకదాని 09-03-2014

by Balu Vakadani



from kavi sangamam*కవి సంగమం*(Poetry ) http://ift.tt/1ewc5BP

Posted by Katta

Kumar Varma K K కవిత

కెక్యూబ్ వర్మ ॥ పాత చొక్కా॥ అవును ఆ పాత చొక్కా ఎప్పుడూ అలా నా మనసు కొక్కేనికి వేలాడుతూనే వుంది బొత్తాం వూడిన ప్రతి సారీ అమ్మ కళ్ళు చిట్లిస్తూ సూది బెజ్జంలో ప్రేమ దారాన్ని చేర్చి కుడుతున్నట్టు బస్సెక్కేటప్పుడు తోపులాటలో చినిగి వస్తే నాతో పాటు తననూ ఆప్యాయంగా దగ్గరకు తీసుకొని నాన్న అతుకు వేస్తున్నట్టు మాసి పోయినప్పుడల్లా నెమ్మదిగా పులుముతుంటే రంగు వెలసిన జ్నాపకమేదో మసకగా కంటి నీటి పొర వెనక కదులుతున్నట్టు యింకా వదలని పిట్ట రెట్ట మరక చెవిలో ఆ కువ కువ వేకువనింకా పల్లవిగా ఆలపిస్తున్నట్టు వీచే చల్లగాలిని ఆప్యాయంగా ఒడిసిపట్టి అలసిన దేహానికి తన బిగువులో కాసింత సేద దీరుస్తున్నట్టు ఆ జేబులో దాచుకున్న గులాబీ రేకు తననింకా ఆ మలుపుకు గురుతుగా దాచి వుంచినట్టు ఎంత కాలమైనా ఆ పాత చొక్కా చిన్ననాటి వాసనలను మడతలలో దాస్తున్న మంత్రపు దారప్పోగుల నేత నాకు!! (తే 13/03/2014 దీ 08.09 PM )

by Kumar Varma K K



from kavi sangamam*కవి సంగమం*(Poetry ) http://ift.tt/1ewc5BF

Posted by Katta

Sreedhar Babu Pasunuru కవిత

"On a River Bank" - Origin (Telugu): Pasunuru Sreedhar Babu Translated by: Elanaaga What’s there on a river bank? Perhaps a few teardrops left by someone A few faint quartered conversations Some abandoned faces of loneliness Circles of grief furrows in sand. What else is there on a river bank? Some arid melancholy blended and soaked In the rippling sounds of flowing river What more are there on river bank? On a river bank there are Multi coloured pebbles Broken snail shells Footprints carrying tinkles of anklets Lamps of moonlight assembled on noon clouds Is that all? No. On a river bank There’s a nameless sweetheart A buddy without own place A celestial embrace And a surreal handshake Besides these There’s also a frisky river which unmindful of all these flows gleefully ***

by Sreedhar Babu Pasunuru



from kavi sangamam*కవి సంగమం*(Poetry ) http://ift.tt/1ewc3d1

Posted by Katta

Srinivasa Bharadwaj Kishore కవిత

సమస్యా పూర్ణ౦ సమస్య ౼ కోడలిప౦చన {ఇ౦టనె} జేరెనుకూతురిగత్తే {కూతురిగా అత్తయే} {సరదా} పీడ౦చెనతిగ ప్రాణము వీడేవరకి౦కనుతనివితీరలేదో మూడునెలలలోనెతిరిగి కోడలి ప౦చను {ఇ౦టనె} జేరెను కూతురిగత్తే {ప్రాణమున్న౦తకాల౦ పీడి౦చి తనివి తీరక కోడలికే కూతురిగా తిరిగి వచచేసి౦ది అత్త} {తత్వ చి౦తనపరమన పద్య౦} ఉ౦డగ వేద సఘోషలు ని౦డుగ ఇల్లది వాణీ నిలయమ్మేన౦ దు౦డగవేడగ{రమ్మన}జనకుడు కోడలి ప౦చను {ఇ౦టనె} జేరెను కూతురిగత్తే {సరస్వతీ దేవి ౼ కోడలి ఇ౦ట కూతురిగా అత్త లక్ష్మీదేవి సీత రూప౦లో చేరి౦ది}

by Srinivasa Bharadwaj Kishore



from kavi sangamam*కవి సంగమం*(Poetry ) http://ift.tt/1m0rOAM

Posted by Katta

Aruna Naradabhatla కవిత

నడక _________అరుణ నారదభట్ల ఎందుకా నిరాశ... ఒద్దికగా...విరిసే ప్రతి పువ్వునూ అక్షరమాలగా తీర్చిదిద్దాలని కలగంటాం గానీ ఒక్క పూవు కూడా నీరసించ కూడదని కోరుకోవడం ఎంతవరకు సాధ్యం...! కొత్త పంటను పండించాలని విత్తనాలు చల్లగలం గానీ మొలకెత్తించే సారం భూమిలో కూడా ఉండాలి! నీచేతిలోని ధర్మం మూడు పాదాలా నెగ్గించాక నాలుగోపాదం నీది కానప్పుడు ఏమని క్రమబద్దీకరించగలవు! నదిలోనే జీవితం ... అయినా ఒక్కోసారి చేపకు కూడా దాహం వేస్తుంది... చుట్టూ అల్లుకున్న నీటిని చూసి నిబ్బరంగా ఉంటుంది కానీ నీరుగారిపోతుందా...! అరక్షణం పాటు అడుగు ఆగినంత మాత్రాన కాలం స్తంబించిందంటే ఎలా...ఊపిరి ఆగినట్టుగా! ప్రతి అడుగూ నీడగా రావాలంటే నువ్వెప్పుడూ సూర్యకాంతిలోనే తడవాలి... అందులో మార్పేముంటుందీ... వెలుగు విలువ ఎప్పుడూ చీకటి వల్లే! గాలి కదులుతుందీ...నీరు కదులుతుంది నువ్వూ...నేనూ..తో పాటుగా యావత్ విశ్వమూ కదులుతుంది... ఇక ఈ సమయం ఎంతలో పరుగెడుతుందీ... మరో ప్రస్తానం మొదలవడానికి! 13-3-2014

by Aruna Naradabhatla



from kavi sangamam*కవి సంగమం*(Poetry ) http://ift.tt/1m0rOkm

Posted by Katta

Krishna Mani కవిత

ఆరాటం ********* చెదరని నవ్వుల చెరువు గట్టు నీ అడుగులని గుర్తు చేసి మూలుగుతుంది నీ చూపు కానక అడవి అద్దం నిదుర పోయింది నీ స్పర్శ కోసం ఆ గడ్డి మొదలు ఎదురుచూస్తుంది ! నీ ఒడిలో ఆడ అలసిన డొక్కల లేడి మందల గెంతులు నీ మెరుపు మెరవక ఏటి ఒడ్డున పక్షి గుంపుల ఆకలి తిప్పలు రాత్రి పగలు తేడా తెలియక కన్ను ఆర్పని ఎండిన చేపలు నీ వయ్యారాలను చూపిస్తూ ఆ వాగులు గీసిన బొమ్మలెన్నో ! హోమగుండంలో ఆకురాల్చిన చిన్న చితక రేపటి రోజుకు రేపటి తరముకు నీకై పరచిన స్వాగత గలగలలు ! అందం చెదిరి కొండల కోనల గుంతకనుల దిక్కులు ! అధరం పగిలి కారని నెత్తుటి మాడిన దుక్కులు ! కృష్ణ మణి I 13-03-2014

by Krishna Mani



from kavi sangamam*కవి సంగమం*(Poetry ) http://ift.tt/1m0rPok

Posted by Katta

Kapila Ramkumar కవిత

Subba Rao Mandava వెలుగు జూపే పత్రిక రాహువు మింగిన చంద్రిక కానరావు మనకిక ఓ సుబ్బారావు బడులనెడి సంతలో చదువు ఒక సరుకు అంతరిక్షమున దొరుకు ఓ సుబ్బారావు మన దేశంలో హీరోలు విదేశాల్లో జీరోలు మన భారత రత్నాలు ఓ సుబ్బారావు 13.3.14

by Kapila Ramkumar



from kavi sangamam*కవి సంగమం*(Poetry ) http://ift.tt/1m0rP7W

Posted by Katta

Sateesh Namavarapu కవిత

***అది అంతే..!!*** కొందరిని కలిసినప్పుడు కొన్ని మాట్లాడలేము, కొన్ని మాట్లాడితే కొందరిని మళ్ళీ కలవలేము.! కొందరికి బతికి ఉండగా కొన్ని చెప్పలేము, కొన్ని చెబితే..కొందరితో బతికి ఉండలేము.! కొందరు చూసినప్పుడు కొన్ని దాచకుండా ఉండలేము, కొందరు దాచినా ..కొన్ని చూడకుండా ఉండలేము.! కొన్ని చూపులు గుచ్చుతాయని కవచాలు తొడగలేము, తొడిగినా.. కొన్ని గుచ్చుకోకుండా ఆపలేము...! మనసుకు నచ్చినప్పుడు మెచ్చుకోకుండా ఉండలేము, మెచ్చుకున్నవి అన్నీ మనకు నచ్చినట్లు ఉంటాయని ఆశించలేము.! కొన్నిసార్లు మాట్లాడినప్పుడు నవ్వించగలము, కొన్నిసార్లు నవ్వించబోయి నవ్వులపాలు కాగలము.! ఇలా లాభం లేదని "త్రిశంకు స్వర్గం" సృష్టించలేము, ఎందుకంటే ఉన్నది, బతుకూ..చావూ కాని నరకంలో కాబట్టి..!!..13MAR2014.

by Sateesh Namavarapu



from kavi sangamam*కవి సంగమం*(Poetry ) http://ift.tt/1ewc1BS

Posted by Katta

Vijay Kumar Svk కవిత

విజయ్ కుమార్ ఎస్వీకె ••నీడ బొమ్మలు •• లోకం చీకటి అప్పుడు- లాంతరు వెలుగు యెదుర్గా జీవంలేని గోడ నేను అడవిని నీడల్లో దర్శిస్తా - జంగల్ రాత్రీ నేనూ నాన్న- వేటగాడి ఆకలిలా వెలుతురు దాడి- ••• అడివి నా కనుపాప చీకట్లో ప్రాణంతో మళ్ళీ- 13-03-14

by Vijay Kumar Svk



from kavi sangamam*కవి సంగమం*(Poetry ) http://ift.tt/1gng5sl

Posted by Katta

బ్రెయిన్ డెడ్ కవిత

నిశీధి | Rest in peace | ఆలోచించలేదు పబ్లిక్ లో బుగ్గ పై చిన్న ముద్దు కే నీ భూగోళం బద్దలవుతుంది అని ఆ ఆలోచనే ఉంటే పవిత్రం గా పరువు కాపాడుకుంటూ రాత్రి నీడలలో మరో మగాడి కౌగిల్లో , కాంక్షతో నలిగే దాన్ని తెలియలేదు నా శ్రాద్ధ ఖర్మలకు మూలం నీ విలువుల హద్దుల ముంగిట్లో నిలబడి ఉందని తెలిస్తే 16 గజాల చీరలో ఇమిడి కోరుకున్న వాడికి కొంగు పరిచే దాన్ని ఏమి చేసాను ? ముద్దే కదా పెట్టాను ? రహస్యపు రతికేళి కాదే ? పరాయి వాడని తెలిసినా పది మంది ముందు ధైర్యం గా ఒక చిన్న ముద్దు అంతేగా ? ఏమి కోరుకున్నాను ? చిన్న అటేన్షన్ ఎదుటి వాళ్ళ కళ్ళలో కొంచం విబ్రమం మరి కొంత ఆశ్చర్యం ఇంతేగా ? నువ్వు రాకుమరుడివి కాకపోయినా నీ తనువు అసూయ వాసనలతో తడిచినా నీ కలల్లో నేను కాని నగ్నత్వం నాట్యం ఆడుతుందని తెలిసినా నా గుండెల్లో నీ నీడ తో పాటు రొమ్ముల పైన నీ అసహ్యాన్ని భరించానే ఒక్క ముద్దే తట్టుకోలేక పోయావా ? లేక తప్పుడు మాటలు విన్నావా ? ఏదయితేనేమి .. ఇపుడు కాలుతున్న నా చర్మం వెనక మాంసపు ముద్ద లో కరగుతున్న ఈ ప్రాణం హాయిగా ఉంది ఇహ నిన్ను నీ మూర్కత్వాలని భరించే అవసరం నాకు లేదు ప్రాపంచిక విలువలనుండి విముక్తి చెందే నా ఆత్మ ఎక్కడ ఎవరిని రమించినా ఆపలేవు, అడ్డుకోలేవు ఎలుగెత్తి చెప్పాలని ఉంది అందరికి మగతనం అంటే కుటుంబం విలువలని ఆడదాని కటి లో దాచటం కాదురా ఆమె మనసు లో విలువ సంపాదించుకోవడంరా అని కాని... నా స్వేచ్చాత్మ గోష మీకు వినబడ్డ మరుక్షణం అమ్మలను ,ఆత్మలను కూడా అమ్ముకొనే మీరు కాటికి కూటికీ కూడా కాకుండా పోతారని క్షమించి వదిలేస్తున్నాను . బ్రతికండి పొండి బ్రతుకుతున్నాం అనుకోని జీవచ్చవాల్లా బ్రతుకుతూ పొండి ఆఖరుగా .. ఐ పిటీ యూ సీత అనుమానం భర్త కి అందమయిన పిల్లలని బహుమతిగా ఇచ్చావు నీ పవిత్రతలకి తర్వాత తరపు ఆడజన్మలను బలి చేసావు . నువ్వే ఎదురించి అగ్నిదేవుడ్నే మోహించి బూడిధై ఉంటే నాలాంటి ఎన్నో హృదయాలను బలి కాకుండా ఆపేదానివి క్షమయా ధరిత్రిని నేను కాని నిన్ను మాత్రం క్షమించలేను . మానసిక వ్యభిచారుల మధ్య శారీరక పవిత్రతలు దాచుకుంటూ బ్రతకటం కన్నా నాకీ మరణమే మహాశాంతంగా ఉంది . నిశీ !! 13-03-14 R.I.p .... Assam woman who kissed Rahul Gandhi burnt to death by husband

by బ్రెయిన్ డెడ్



from kavi sangamam*కవి సంగమం*(Poetry ) http://ift.tt/1gng5sd

Posted by Katta