డా. సింహా చలం లక్ష్మణ్ స్వామి||తలసేమియా (రక్త పిశాచి ) ||

పైకి మాత్రం చిరునవ్వుల మేలి ముసుగుల
లోలోన మృత్యు ఘంటికలు ...

రుధిరపు నదుల్లోకి చొరబడ్డ తిమింగలాలు
ఒక్క నెత్తుటి చేపనూ వదలట్లేదు

ఏటి పక్కన బురద గుంటలో
మాటు వేసిన మకరం ...!

ప్రాణ జ్యోతిని వెలిగించటానికి
తగలబడుతూ
తరిగి పోతున్న నెత్తుటి ఇంధనం !!

పక్షానికోమారు
ప్రణాగ్ని పరీక్ష ..!!

చిల్లు పడ్డ రుధిర భాండం
గండి పడ్డ జీవన తటాకాన్ని
ఆపలేక ,నింప లేక
క్షణ క్షణం నరకయాతన ...!!

ఇదెక్కడి అన్యాయం దైవమా !!!
ఏపాపం చేశారని
ఈ చిరు దీపాల్ని
తుఫాను లోకి తోసేస్తున్నావు !

ఈ రక్త పిశాచాల బోనులో
ఆ చిన్నారుల ఆర్తనాదం
హృదయాన్ని పెకిలిస్తోంది
కాపాడవా ......!

రోజులు కరకు రంపాలై
రోజూ కోస్తుంటే
కన్నీటి మంటల్లో పడి
కన్నవారు విలవిల లాడుతున్నారు

తలసేమియా తలసేమియా
చిన్నారులని వదిలి వెళ్ళిపోవా

నీవు ప్రవేశించాక
ఇల్లు జీవచ్చవాల స్మశానమైయ్యింది!
ఏక్షణం ఏమవుతుందో ...?!
అవయవాలన్నీ చిద్రమవుతున్నాయి .

నెత్తుటి చుక్కల్ని కొనలేక
ఈ దారుణాన్ని కనలేక
పగులుతున్న గుండెలతో
పరితపిస్తున్న కుటుంభాలు ..!

తలసేమియా పంజాతిన్న
ఆధునిక విజ్ఞానం
పరుగందుకుంది ...!

అణుబాంబులు
అంతరిక్ష జ్ఞానం
బొక్క బోర్లా పడ్డాయి ...!!

లక్ష లేత ప్రాణాల్ని
పీక్కుతింటున్న
తలసేమియాను తరిమే
ఒక్క ఆయుధం కావాలి .

ఇల్లు -వాకిలి -భూమి -ఆస్తులన్నీ
తలసేమియా పూజకు హారతి
కర్పూరా లయ్యాయి..!!?

ఎన్నాళ్ళీ జీవన్మరణ పోరాటం ...!

అస్త్రాలన్నీ అయిపోయాయి
మృత్యువు రానే వచ్చింది

చీకటిలో ...
లీనమవుతున్న
చిరుదివ్వెల పరంపర
కొనసాగుతూనేవుంది ............!!!!??

* ( తలసేమియా బారిన పడిన పిల్లల, వారి కుటుంబాల దీనాతి దీన వేదనకు,
నరక యాతనకు స్పందిస్తూ ....) 

21.8.2012

డా. సింహాచలం లక్ష్మణ్ స్వామి // ఉగ్ర' నేత్రం ! //

అగ్ర రాజ్యానికి ఆగ్రహమొస్తే 

ఉగ్రవాద ముద్రతో
ఉరికంభమేక్కిస్తుంది...

సిరియాను బానిసను చేసి
సిరుల్ని దోచే దొంగ నాటకం !!
పన్నాగాల పథక రచనలో
'పెద్దన్నే' ప్పుడూ ముందే ఉంటాడు...!

నియంతల కుతంత్రాలకు
చిన్న దేశాలు
పాదా క్రాంతమే..!!

తెగ బలిసిన
తెల్ల మదానికి ,
కండ కావరానికి...
తలవంచుతున్న
చిన్న రాజ్యాలు ...

అఫ్ఘాన్ ...ఇరాన్,
ఇరాక్ ...లిబియా,
ఇప్పుడు సిరియా వంతు ...!

సిగ్గు శరాల్ని వదిలి ..
'శరా'లకు పడునుపెడుతోంది ..

దురహంకార దండయాత్రల పరంపర !
భయం లేని స్వేత శునకం
శవాలవేటకు సెలవివ్వదు .

'అణ్వస్త్ర' కొండపై కూర్చుండి..
'అణు'వంత అస్త్రం కూడా
ఎక్కడా ఉండొద్దట ...!?

పిచ్చి ముదిరిన
తెల్లకుక్కల స్వైర విహారానికి ...
బిక్కుమంటున్న
చమురు దేశాలు ...

9/11 తో
గర్వ భంగమై ..
గజగజ వణికినా..
బుద్ధిరాని
పడమటి రాజ్యమా ...
లెక్కలేనన్ని
' లిటిల్ బాయ్స్'
నీవైపు ఎక్కు పెట్టే ఉన్నాయి ...
'పడమర'లోనే నిన్ను
పాతి పెట్టటానికి ...

( సిరియాను చెర పట్టేందుకు అమెరికా చేసే దుష్ట పన్నాగానికి నిరసనగా ..)

*19-08-2012

డా . సింహాచలం లక్ష్మణ్ స్వామి || ‎*** పల్లె ***||

కల్మషమేరగని...పల్లెలో
పచ్చనిలోగిళ్ళలో
గడ్డివాము, జోడెడ్లు...

మేకపిల్లలు గొల్ల భామలు.

ఆకుపచ్చని కొబ్బరాకు చాటున
అలవోకగా సాగుతున్న నాపాటకు....
తలలూపుతున్న పైరగాలి, పైరు.

నాపాత జ్ఞాపకాలని నేమరువేస్తున్న
ఎడ్లు, గుడిసె,వడిసెల ,గువ్వలు.

ఎర్రని ఎండకు మఱ్ఱి నీడలో సేదదీరే బాటసారికి
చల్ల పోసే అవ్వ మానవత్వపు రవ్వ.

మనిషి యంత్రమై కుత౦త్రమై పోతున్నవేళ
మానవత్వాన్ని గుర్తు చేస్తుంది పల్లె 

*06-08-2012

డా . సింహాచలం లక్ష్మణ్ స్వామి || బహుశా..ఇదేనా కవిత్వం.!!? ||

ఆకలిమంటల ఆర్ద్ర
ఆర్తి గీతాల అరణ్య రోదపు
అక్షరాశృవులేనా....కవిత్వం !


పొక్కిలైన గుండె వాకిలి
ను౦డి పొంగే అక్షరమే ....కవిత్వం..!


అంతస్సాగరాల్లో బద్దలయ్యే
అగ్నిపర్వతమే కవిత్వం..!


చితుల చీకటికి
చితిని పేర్చే చిన్మయ దీపమే ..కవిత్వం


దుఃఖిత దుక్కిలో
లెక్కలేనన్ని భాష్పంకురాలేనా కవిత్వం ..!


అశృ వాహినికి తెగిన
ఆనకట్ట వరదే ..కవిత్వం ..!


యద యదల్లో మధురంగా
సాగే యలదేటి గీతమేనా కవిత్వం..!


ఎడతెగని విధి వంచిత
కారుణ్య స్పందన నాదమే ..కవిత్వం..!


పాంచభౌతిక సృష్టి విలాస
విలక్షణ విరచితమేనా కవిత్వం..!


ప్రకృతిని గుండెల్లో కూర్చి
అక్షరాలుగా మార్చి సమర్పించటమేనా ....కవిత్వం..!


భగ్న హృదయ దగ్ధ మానస
గీత మాలికల అక్షరాల మాలయేనా...కవిత్వం..!


ద్వయ దేహా వాంఛల వెచ్చని
ఊపిర్ల విరహ వేదనేనా...? కవిత్వం..!


అక్షరాలకు ఆస్థి మా౦సాలిచ్చి చేసిన
జాగృత స్వేచ్ఛా జీవన విహంగమే..కవిత్వం..!


కవిత్వం ...కవిత్వం..కవిత్వం..!
నాకు జన్మ జన్మలకు అమరత్వాన్ని
అందించే అమృతాక్షరి...........


*05-08-2012

డా . సింహాచలం లక్ష్మణ్ స్వామి||అడవిలో వాన ||

 

ఒకటే వర్షం
వనకన్య తడిసి ముద్దయ్యింది..
ముద్దబంతి పూవయ్యింది...
కొండగోగు పూల పెదాల చు౦భించే వాన

యదలోతుల లోతయిన లోయల్లోకి

అలవోకగా జాలు వారుతూ
పచ్చని కోకని పరుచుకుంటూ
ఎన్నెన్ని కళల కల్లళ్ళో నెమలి కన్నులై
మైదానాల్లో విచ్చుకున్నాయి ...

మోదుగుపూలని పొగమంచు ఘాడ౦గా
కౌగిలించుకుందేమో 'లక్క ' పొంగుకొచ్చింది ...

మయూరాల వయారాల్తో
కొండ కోనంతా పండుగే

గూడు తడిచిన గువ్వలు
గుహల్లోకి చేరి
వెచ్చని కౌగిళ్ళ స్వప్నాల్ని కంటూ...

వానకెంత ముద్దో వనమంటే....!?

వనాలనుండి సేకరించిన
వాన పూల వరదను కని
చెరువులన్నీ అచ్చెరువొ౦ది 'పొంగు'తున్నాయి !!

తడితడి నేలనుండి
చడిచేయకుండా
అమ్మవారి కుంకుమతో
ఆరుద్రలు బయలుదేరాయి ..!!

దాహార్తితో బక్కచిక్కి
బిక్కచచ్చిన పొలాలన్నీ
వర్శామృతౌషదాలతో
పునరుజ్జీవనమై
పసిడి పంటలతో కళ కళలాడుతూ ఉంటే
ఆహ్హనం రాకున్నా అరుదెంచిన ధాన్య లక్ష్ములు...!!!

చరా చరాన్ని జాగృతం చేసే వరుణా...!!
నిను వర్ణించ తరమా ..!!??
నీ రాక
నా ఎడారి హృదయాన
పూల గోదారుల్ని పొంగిస్తూ ..!

ఉప్పొంగే గంగా తరంగానివై
నా కలంలో అవ్యక్తానంద
భావాక్షర కెరటాల్ని సృష్టిస్తూ ...

*4.8.2012

లక్షణ స్వామి || మాయ చేసే నీ నవ్వు ! ||

నీ మందహాస చద్రహాసాలు ....నా మదిని
హాయిగా కోసేస్తుంటాయి........
యదలో నిండిన చీకటి తెరలకి
నీ నవ్వుల నిప్పంటుకుంటుంది....
నా యాంత్రిక దేహ యాతనకి......
నీ మాంత్రిక మందహాసం మాత్రవుతుంది..
నీ నవ్వుతో నన్ను మాయచేసి...
సరికొత్త స్వర్గాన్ని చూపిస్తావు..
నీ ప్రేమామృతాన్ని ...నవ్వుల కుసుమాలతో
నాపై కుమ్మరించి....
నాలో చైతన్య జాగృతాంకురాల్నినాటేస్తావు...
ఎన్నిజన్మల పుణ్యఫలమో..నీ సంగమం..!!!
యుగాల వేదనని నీ దరహాసం తరిమేస్తూ ఉంటుంది .....
జగత్తంతా ప్రేమయం కావాలని స్వప్నిచే....ఆ హాస విలాసం
శాశ్వతంగా పరిమళి౦చాలి !
*26-07-2012

లక్ష్మణ్ స్వామి - కవిత

దైవకణ౦ --- దెయ్యపు కణం!

దైవకణం దొరికిందట !!
కాదు ... కాదు దాని నీడ దొరికిందట !
అరశాతాబ్ధపు నిరీక్షణ !
వందలాది శాస్త్ర వేత్తలు.
వేలకోట్ల ధనాన్ని ఖర్చు చేసి....

గీతను మర్చిపోయారేమో....
‘అణువును - పరమాణువును నేనే’ నని....
ఏనాడో ..చెప్పాకా,
కొత్తగా విప్పారు ఈ రహస్యాన్ని !

ఒక్క కణజాడకి ఇన్నేళ్ళు పడితే ...
దాన్ని కన్నోన్ని కనిపెట్టేందుకు....
‘భౌతిక’ వాదులకు లక్షేళ్ళు సరిపోతాయా.....
వృధా ప్రయాస....

కోట్లాది మందిని
హింసించి
భాధించి
చిత్రవధ చేసే ....
అతి భయానక
రాక్షస కణం ....
వేధి౦చే రాచ వ్రణం
దెయ్యపు కణం! క్యాన్సర్ !!

క్యాన్సర్ని తరిమే ...
ఒక్క మాత్రను
కనుక్కోండి చాలు...
కోట్లాది మంది
మీకు జన్మాంతం ఋణపడి ఉంటారు...

హెచ్ ఐ వి... తలసేమియా
మస్కులర్ డిస్ట్రోఫీ...లుకేమియా. ..
ఒక్కటా, రెండా ...
లెక్కలేనన్ని మందేలేని
మహమ్మారులు....
శిథిలమవుతున్న
దుర్భరమవుతున్న జీవితాలు !!
అక్షరాలకందని ఆక్రందన వారిది ...
ఒక్కసారి
ఒకే ఒక్క సారి చూడ౦డటు ...

మీ అశృ కణాల్లోనుడి
ఖచ్చితంగా విచ్చుకు౦టుది ...
జగతిని కాపాడే అమృత కణం ...
ఆయుష్ కణం ....
( సృష్టి రహస్యాలపై పెట్టె శ్రద్ధ శాస్త్ర వేత్తలు మానవ మనుగడనే ప్రశ్నార్థకం చేస్తున్న భయంఖర రోగాలపై పెట్టట్లేదనే అక్కసుతో, ఆవేదనతో.)

*3.7.2012