పి.రామకృష్ణ // పాటకు జే జే //

నీ పెదాల మీద వాలాకే,
బహుశా
గాలికి గుర్తొచ్చి వుంటుంది-
తనూ పాటననే సంగతి.

వెదురుకి వెంటిలేటర్ లాంటి
నీ నిచ్వాస.
వెదురు వేణువయ్యాక,
నీ పాటే కదా వుచ్వాస.?

పల్లవీ, చరణానికి మధ్య
సమయాన్ని, సంగీతానికి వదిలేసి,
మౌనంగా మిగిలిపోయే నువ్వు-
ఎంత ముచ్చటేస్తావో మరి.

నీ అధరాల పై నడిచొచ్చిన-
పదాల్ని-
పదే పదే నా పెదాలమీద-
తడి చేసుకుంటుంటాను.
ఎంత అందమైన ముద్దో కదా అది?

తాధ్యాత్మికతతో నువ్వూ,
తన్మయత్నం లో నేనూ

కళ్ళు మూసుకుని

పాడే నువ్వు,
పాటే నేను.

నీ పెదాల మీద వాలాకే,
బహుశా-
గాలి గమనించి వుంటుంది.
పాటా, ప్రాణమూ తానేనని.
___________________

13-09-2012

( జోహెన్స్ బర్గ్ వెళ్ళిపోతున్న స్నేహితురాలు జ్యోతిర్మయికి. )

పి.రామకృష్ణ __ // వేయిపూలు వికసించనీ //

కత్తులకంటిన
నెత్తుటి గాయాల్ని
కన్నీళ్ళతో కడుక్కోవాలి.
యుద్దానికి, యుద్దానికి మధ్య, కాసేపు
కాఫీ బ్రేక్ ఇవ్వండి మిత్రులారా.

వున్న మూడడుగులూ కాస్తా-
కబ్జా చేసేస్తే ఎట్లా?
పదాల్ని ప్రసవించే ప్రయత్నంలో,
నిండు చూలాలు నా కలం.
కాలు మోపేంత కాలమైనా-
కనికరించండి కామ్రేడ్స్.

ఆయుధాల సంతలో ఓ మూల
పంజరాల్లో పావురాళ్ళు.
వాదోపవాదాల పాదాల క్రింద-
తలెత్తుకోలేని లేత చిగుర్లు.

పచ్చని చెట్టొకటి దొరికిందనే కదా-
పుల్లా పుడకలతో గూళ్ళు కట్టుకునేది?.
పిట్టల స్వప్నాల్ని తూటాల సవ్వడితో
వెళ్లగొట్టేస్తే ఎలా?

సమరానికి సమరానికి మధ్య-
శాంతిక్కూడా చోటిస్తేనే కదా
మూణ్ణిమిషాల మౌనం పాటించేది?.
శవాల్ని గుర్తుపట్టనివ్వండి సోదరులారా.

వివాదాల నదుల్లో
అట్లా ముంచేస్తే ఎలా..?
పిల్లకాల్వల్లో కాగితప్పడవల్ని
కొద్ది దూరమైనా కదలనివ్వండి.

నినాదాల వర్ణాల్ని
పులిమేసిన గోడలపై
ఏదో ఓ మూల
చిన్నారి సాలెపురుగులుంటాయి
కవిత్వాన్ని అల్లుకోడానికి-
వాటికి
అనుమతినివ్వండి.

అరె మిత్రులారా...

కవిత్వం అల్లుకోవడానికి
ఎవరికీ
అడ్డుకాకండి.

__03/09/2012