పేజీలు

' నువ్వొక పచ్చని చెట్టయితే పిట్టలు వాటంతట అవే వచ్చి వాలేను'..!. ‎
Ramaswamy Nagaraju లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
Ramaswamy Nagaraju లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

22, జూన్ 2014, ఆదివారం

Ramaswamy Nagaraju కవిత

కవిత: ( అంతర్జాల సాహిత్య పత్రిక 'కౌముది' ఈ జూన్ సంచిక ప్రచురణ ) ......// మళ్ళీ రాయాలి మలిపి మరో కొత్త గీతం //...... ఈ ఉదయం --- గాలి ఒక ఈల పాట ! నేల ఒక పద్య పాదం! నింగి భావాంబరం! సంద్రం స్వరార్ణవం ! సృష్టి ఒక దృశ్య కావ్యం ! సర్వం రసరమ్యకవిత్వం! అదిగో, అందుకే ఆ రసావేశంతోనే నేను అక్షరం అయింది! ఆలోచనకు అంబుదాలను అలది పద్యానికి పక్షి పాదాలను అతికి పాటకు పవన పక్షాలు తొడిగి ఎగిరేశాను నా గీతాన్ని ఆకాశంలోకి రెక్క విప్పే రిక్క ఔతుందని ! కాని, నా కవిత గువ్వపిట్ట లా ముడుచుకుంది గూటికే పరితమయింది శూన్యాకాశం పాటను పరిహసించింది! నా అక్షర విహంగ సృష్టిలో ఏదో జీవద్రవ్యం లోపించి ఉంటుంది గుప్త జీవన ధాతువేదో లుప్తమై ఉంటుంది అంగరాగమే తప్ప ఆత్మస్పర్శ కొరవడినట్టుంది ప్రాణప్రతిష్ఠ చేయడం నేను మరచినట్టుంది అస్మితాసంకుచితమైన నా అక్షర రేఖ అనంత కళాత్మకు హద్దులు గీచినట్టుంది అందుకే సృష్టించుకోవాలి మరో సృజన ప్రాణ పతంగాన్ని, రెక్క సాచని నా అక్షర వర్ణాల అచల జీవన చిత్రాన్ని మలిపి మళ్ళీ రాసుకోవాలి మరో కొత్త గీతాన్ని ! ---నాగరాజు రామస్వామి. Dt:21.06.2014.

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1qBooGZ

Posted by Katta

16, జూన్ 2014, సోమవారం

Ramaswamy Nagaraju కవిత

అనువాద కవిత్వం : ( అంతర్జాల సాహితీ పత్రిక 'సుజనరంజని 2014 ప్రచురణ ) .... || రాత్రి ॥.... .( Night ) నిశీథినీ ! బరువైనవి నా భ్రుకుటి మీద నీవు మోపిన భారాలు. భరించరానివి నీ సాదు హలం చిమ్మిన అసహన అభిఘాతాలు. మబ్బులకున్న రస చైతన్యం నాకు లేదు! తరుణీ ! తరళ యామినీ ! నీవు సముద్రం మీది నెలవంక మీద నిశ్శబ్దమై నిలువడం, ఈర్ష్య నిండిన నీ చూపులతో తరగల తళత్తళలను ఆర్పడం, నిరంతర కెరట పరంపర మీద నిలిచి నీవు లలిత నాట్యాలు చేయడం నేను చూస్తూనే వున్నాను. తీరాన నీరసంగా నేను ప్రటిఘటించలేని ఇసుక దిబ్బలా, ఉడిగిన రుధిరంలా, ఉప్పు నీటిలా మూలాలలోకి ప్రవహించు కుంటూ . నీ వెచ్చని ముద్రల జీవకణాలు తడిపిన తడి తడి చిత్తడి ఆకుల గుండా నీవు వర్షిస్తూనే వున్నావు కుత్తుక తెగిన నీడలను. నా జ్ఞానేంద్రియాలు నన్ను బాధిస్తున్నవి మొహం చాటేసి మాటేసే నిశ్శబ్ద రాత్రించరుల్లా . నన్ను దాచేయండి -- చొచ్చుకొస్తున్నాయి ధాత్రిని వెంటాడే రేతిరి బాల్యాలు; నంగనాచి బూచీలు అవి నాకు అప్రియాలు. అయినా, వాటి కుటిల కవ్వింపులు అనూహ్యంగా నన్నాసాంతం తిరుగదోసి నన్ను దిగంబరున్ని చేసేట్టున్నవి. మూలం : వోలే సోయింకా, నైజీరియా నోబెల్ లారియెట్ తెలుగు సేత : నాగరాజు రామస్వామి Dt: 16.06.2014.

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1ov8Apn

Posted by Katta

11, జూన్ 2014, బుధవారం

Ramaswamy Nagaraju కవిత

లఘు కవితలు: (ఇవి రెండేళ్ళ క్రితం రాసిన లఘు కవితలలో కొన్ని. 'పాలపిట్ట' ఏప్రిల్ ప్రత్యేక సంచిక నుండి ) ....॥ రిక్కలు ॥.... మిణుగురులు రెక్కల రిక్కలు ఎగిరే రవ్వలు ఎక్కడో తారా విస్ఫోటనం రాత్రి చీకట్లలో రాలి పడుతున్నది నక్షత్ర ధూళి . ఒక ఉదయాన్ని బహూకరించాలని ఆరాట పడుతున్న చంద్రుని తొందర రాత్రి గడచినా చీకటి వీడని పడమర ఇంకా బాధ్ధకంగానే ఆవులిస్తున్నది ప్రాగ్దిశ. తమస్సు కమ్మిన తమిస్రను తట్టి లేపింది వేకువ హస్తం కళ్లు తెరచిన కాలం ఒళ్లు మరచింది ఉషస్సు తెచ్చిన కానుక ఉదయరాగం . సెలయేటి పాటలకు సలిల సంగీతం సమకూర్చినవి రాళ్లు నీటి అడుసులో దిగబడ్డవి పాపం వాటి కాళ్లు . మనసు మల్లె మొగ్గలను విచ్చుకున్నట్టు నింగి శరశ్చంద్రున్ని హత్తుకున్నట్టు రేయి రేయంతా పరిమళం చీకటి కొమ్మ సిగబంతి హృదయం.

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1lbsOB6

Posted by Katta

5, జూన్ 2014, గురువారం

Ramaswamy Nagaraju కవిత

అనువాద కవితలు : ఆదివారం ఆంధ్రప్రభ అనుబంధ పత్రిక Dt:01.06.2014 ప్రచురణ. .... || ఋతువు ॥.... .(Season). *త్రుప్పు - త్రుప్పంటే పరిపక్వత , త్రుప్పంటే ముదురు మొక్కజొన్న, త్రుప్పంటే పతనమై పండే పంట కోత . పరపరాగ సంపర్క సమయం ఇది. పంట చేల మీది పైర గాలిలో అల్లుతున్నవి వాన కోయిలలు నృత్యాలను తూలికల బాణాల లాంటి ఎగిరే వెలుగు రేఖల వంటి జొన్న పొత్తుల కేసరాలతో. ప్రియమైనవి మాకు పిల్ల గాలులు వినిపించే పదబంధాలు , వెదురు పొదల వెండి ఆకుల్లా గుచ్చుకునే జొన్న కర్రల కరకు రాపిళ్ళ ధ్వనులు . రైతులం మేము -- కంకుల కేసరాలు కపిల వర్ణంగా మారాలని పోగేసుకున్నాం పొడుగాటి సాయం సంధ్యా నీడలను పేనుకున్నాం గడ్డితాళ్ళను తాటి నెగళ్ల పొగలతో . కాచు కున్నాం చీడ తెచ్చే మార్పు కోసం ! వేచి ఉన్నాం త్రుప్పు ఇచ్చే భరోసా కోసం! మూలం : వోలె సోయింకా ,నైజీరియన్ నోబెల్ లారియేట్. స్వేచ్చానువాదం : నాగరాజు రామస్వామి. * నైజీరియన్ 'ఒగున్' mythology లో 'rust'(త్రుప్పు) అన్నపదం పతనానంతర ప్రగతికి ప్రతీక. దీన్ని రైతు మాటగా, పంటపొలాల సందర్భం లో కూడా ప్రతిభావంతంగా ప్రయోగించాడు కవి. ---Dt:05.06.2014.

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1meVDsU

Posted by Katta

1, జూన్ 2014, ఆదివారం

Ramaswamy Nagaraju కవిత

కవిత : నా తొలి కవితా సంకలనం 'ఓనమాలు' నుండి : ఉదయిస్తున్న తెలంగాణను ఊహించుకుంటూ కోడై కూస్తున్నది పల్లె ఎగిలివారు మొగులు మీద ఏగుసుక్క పొడిసిందని ఇగం పట్టిన ఛాతీ మీద ఎగిరెగిరే సంబురాల సప్పట్లు పొద్దుపొడుపు తోవల్లో ఉరుకుతున్నవి ఊర్లు దుంకుతున్న జన సంద్రం పల్లెటూళ్ల పసిహృదయం వాడీ వేడీ తగ్గని ఎదిరిసూపుల నిట్టూర్పులు యాభై ఏళ్ల యాతనలు చినిగి రాలుతున్న చీకటి పరదాలు పొరలు విడిపోతున్న పొగమంచు తెరలు పసుపూ పారాణీ పూస్తూ ఎర్రచందనం బొట్లు పెడుతూ మంగలారతి పడుతున్నారు మా ఆడోళ్ళు కొత్తముత్తయిదకు ఇల్లు సగబెట్టుకునే ఇగురం నేర్పు తున్నారు నేను కష్టపడే కాపుని జనాన్ని సాదే సేను కాపుని దేశం కాసిన పాత కాపుని ఇగపొతా నాగాల్ని భుజానేసుకొని నెత్తిమీద కొత్త బరువు లెత్తుకొని కొత్తకోండ్ర పిలుస్తున్నది పండిస్తా పాటిపడ్డ పొలాన్ని. ఎంత సల్లగుందీ తూర్పు కొత్త గాలి ! -----(వీర తెలంగాణ -ఎప్రిల్ 2011 ప్రచురణ) Dt:01-05-2014

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1u3KVeX

Posted by Katta

27, మే 2014, మంగళవారం

Ramaswamy Nagaraju కవిత

అనువాద కవిత్వం : ......॥ జీవితం!॥..... . ( Life ) . ఓ మార్మిక వైచిత్రీ! ఆనంద పుత్రీ! మానస వైవశ్యమా !జీవితమా! నీ ఉద్గమన పయన పరిధికి అవనివ్వు అనంతమే అవధి . నీ పక్షాలు మోస్తున్నవి ఔన్నత్య కీర్తిని, ఉపేక్షను, దైవత్వాన్ని అపార పారవశ్యాన్ని, ఆవేదనను, మరణాన్ని. జీవితమా! తీసుకో నన్ను నీ ఆలింగనం లోకి అనాఛ్చాదితంగా, నిస్సంకోచంగా, రాజీ రహితంగా, విస్మృతీ రాహిత్యంగా. అన్వేషిస్తాను నేను ఉదధి ఉప్పెన వంటి నీ మహదానందాన్ని సింహ గర్జన లాంటి నీ క్రూరత్వాన్ని కబళిస్తాను అసురునిలా కలహిస్తాను మానవునిలా ఆనందిస్తాను అనంతునిలా చిందులేస్తాను చిన్నారిలా . నిన్నేమీ అర్థించను ఏదీ ఆశించను విధినుండి ఓడినా గెలిచినా బ్రతికినా మృతిచెందినా . చింపి గుడ్డల్లోనూ నేను దేవుణ్ని నేల కొరిగినా దైవాన్ని అణచబడినా అజేయున్ని హతమైనా నేను అమరున్ని . మూలం : మహర్షి అరవింద ఘోష్ , (sri Aurobindo collected poems ) స్వేఛ్ఛానువాదం : నాగరాజు రామస్వామి.

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1jX8rHd

Posted by Katta

23, మే 2014, శుక్రవారం

Ramaswamy Nagaraju కవిత

.....॥ ఇరు పార్శ్వాలం ॥..... చీకటి నుండి చీకటి కి నా ప్రయాణం వెలుతురు ధారగా ప్రవహించడం నీ నైజం మనం రేపవళ్లం ! అనుదిన అనివార్య దిన పార్శ్వాలం ! శైవల మౌన శిలల మీద నా నడక ఎగసిపడే ఏటి పాట నీ నడత . నేను అసహన అగ్ని గోళమై బద్దలౌతుంటాను నీవు నిర్లక్ష్య తుహిన తుషారంలో తడుస్తుంటావు . నేను అసంబద్ధ జడధారిని ! నీవు అతివ్యాప్త చైతన్య ధునివి ! మృత్యువుకు మృత్యువుకు మధ్య సాగే మన దైనందిన జీవనయానంలో ఇరువురం ఇరుసంజల ఇరుకు దారులం నీవూ నేనూ ప్రతినిత్యం అంతుపట్టని జీవన మరణాలం ! Dt:23.05.2014

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1k1CLMc

Posted by Katta

19, మే 2014, సోమవారం

Ramaswamy Nagaraju కవిత

అనువాద కవిత్వం : ......|| కాంతి / Light ||..... కాంతి ! అనంత కాంతి ! లేదిక చీకటికి చోటు . జీవన అంధ తమస్సులు విడుతున్నవి గుహాంతర తిమిర మర్మాలు విడివడుతున్నవి అంతుచిక్కని గత అవిద్యా అగాధాలు ఆశావహ చలిత కలికల్లా జ్వలిస్తున్నవి . కాంతి!కాలాతీత పరివర్తనాతీత సుదూర కాంతి! బంధిత పవిత్ర రహః కవాటాలు తెరుచుకుంటున్నవి అనంతం లో జ్వలిస్తున్న వజ్రాత్మ కాంతి నా అంతరంగం లో ప్రకంపించి మరణాతీత అమర సుమమై వికసిస్తున్నది ! కాంతి! నరనరాన నర్తిస్తున్న వైవశ్య కాంతి ! కాంతి! చిరంతన చింతనానంత కాంతి ! ప్రతి తాడిత రజోగుణ కణం మౌన జ్వాలై అనశ్వర జీవన స్పృహను పదిల పరుస్తున్నది. ఒక మహాద్భుత కాంతి కడలిలో నా ఈ కదలిక నా అగాధాలనూ ఆతని అనంత శిఖరాలనూ అనుసంధిస్తూ. మూలం : మహర్షి అరవింద ఘోష్ (Sri Aurobindo collected poems ) సేచ్చానువాదం : నాగరాజు రామస్వామి.

by Ramaswamy Nagaraju



from kavi sangamam*కవి సంగమం*(Poetry ) http://ift.tt/TlRiO3

Posted by Katta

14, మే 2014, బుధవారం

Ramaswamy Nagaraju కవిత

కవిత : ('సిలికాన్ఆంధ్రా' వారి ఈ -పత్రిక 'సుజనరంజని' ఏప్రిల్ 2014). ........॥ మృత్యు సంధ్య ॥........ అవసాన ఘడియల్లో అల్లాడిపోతుంటాడు ఆత్మారాముడు అర్ధ చైతన్యపు సరిహద్దుల మీద, సాగిపోతుంటాడు తడబడుతూ తాపం తడిపిన తడితోవల్లోంచి కడపటి పడమటి నీడల్లోంచి అనంత ప్రస్థానం కేసి ఆశరీరంగా సుషుప్తిలో కరుగుతున్న స్వప్నంలా. పొడలు పొడలుగా కదలుతున్న పరాపర స్పృహ పొరలు పొరలుగా చీలుతున్న ఇహపర స్పర్శ భావాభావ అస్పష్ట సంధి గీత మీద ఒక అడుగు అటు ఒక అడుగు ఇటు సంధిదోషం కమ్మిన సాయంత్రపు నీడలు ! అపస్మారం చిమ్మిన ఆఖరి మెరుపులు ! వెన్నంటే వెలుగు నీడలకు అతని అడుగులకింద ఆశ్రయం దొరుకదు రాలిపడుతుంటాయి ఒక్కొక్కటిగా ఆతని చాపల్య చాపంలోని సప్తవర్ణాలు మెడ తిప్పిన నిర్లిప్త పడమర కడసారి ఉషస్సు కేసి చూపు తిప్పుతుంది ఆరీఆరని తూరుపు చక్షూరాగం ! మూసీ మూయని జీవన దిన ద్వారం! ఏవో నీరెండల పరాధ్యాస అంతిమ శోషల ఆఖరు శ్వాస అంతరాంతరాలలో ఎక్కడో గుండెను తవ్వుతున్న గునపం సవ్వడి నాభిని పెకిలిస్తున్న అలికిడి ఆత్మబంధాలు తెగుతున్న అలజడి . ఆవలి తీరం అస్తమయం పిలుస్తుంటుంది పడవ పడమటి గట్టున వేచియుంటుంది ఎర్రెర్రని మరుభూమిలో ఎండుటాకు ఎగురుతుంటుంది కళ్ళు సోలిపోతుంటవి కాళ్ళు తూలిపోతుంటవి దేహం తేలి పోతుంటుంది గొంతు లోతున పడుతుంది పిడచ కట్టిన నాలుక ఆఖరి మాట మరుస్తుంది ఆకాశం సంధ్యను వర్షిస్తుంటుంది చీకటి కౌగిలో నీడ నిద్రలోకి జారుకుంటుంది రంగు రంగుల దీపం చరమ సంధ్యలో సమాధి అవుతుంది. --నాగరాజు రామస్వామి. Dt :14.05.2014.

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1qBjIBQ

Posted by Katta

7, మే 2014, బుధవారం

Ramaswamy Nagaraju కవిత

ఈ నెల "వాకిలి" లో వచ్చిన నా అనువాద కవితలు : 1. ....|| నేను ఒంటరిని కాను ॥.... (I am not alone) ఈ రాత్రి నిర్జన రాత్రి సానువులనుండి సముద్రం దాకా. కాని, నిన్ను ఊయలలూపుతున్న నేను ఒంటరిని కాను! ఈ నింగి ఒంటరి ఎడారి I శశి సంద్రంలో పడిపోయింది కాని, నిన్ను పొదివి పట్టుకున్న నేను ఒంటరిని కాను! ఈ భువి ఒంటరి ఊషర క్షేత్రం ఉసూరు మంటున్నది దేహం కాని, నిన్ను హత్తుకున్న నేను ఒంటరిని కాను! 2. ....॥ అపరిచిత ॥.... (stranger) ఆమె ఒక విచిత్ర వృద్ధవర్షీయసి ! సముద్ర ఘోష ఆమె భాష ఆమె మాట్లాడుతుంది తనదైన వింత పంథాలో ఆల్గే లాంటి అజ్ఞ్యాత అల్ప జీవాలతో, అపరిచయ సైకతాలతో . అవసాన దశ ఆసన్నమైనట్టుండే ఆమె ఆరాధిస్తుంది బరువు లేని ఆకారం లేని దేవున్ని! ఆమె వచ్చాక మా తోట ఒక విచిత్ర వనం! కాక్టస్, అలీన వన తృణాల మయం, ఆమెలో నిండి వుంది ఎడారి గాలి శ్వాస. ఆమెది అచ్చమైన స్వచ్ఛమైన గాఢ మమత , ఆమె మౌనాన్నే ఆశ్రయిస్తుంటుంది ; చెప్పాల్సి వస్తే అజ్ఞ్యాత నక్షత్రాల వర్చస్సులను వర్ణించాలి గా మరి ! చిరు వన ప్రాణులకు మాత్రమే అర్థమయ్యే తరుగుల్మాల వాక్కు ఆమెది . నిన్ననే కొత్తగా వచ్చినట్టుంటుంది; బతికితే బతకొచ్చు ఓ ఎనభై దాకా. ఏదో ఒక బాధామయ భయద రాత్రి ఆమె మామధ్యే మరణిస్తుంది ; విధి తలగడ గా, నిశ్శబ్దంగా ,హఠాత్తుగా. మూలం : గాబ్రియేల్ మిస్త్రాల్, చిలీ దేశ నోబెల్ లారియేట్. తెలుగు సేత : నాగరాజు రామస్వామి . Dt: 07.05.2014. ' Sent from my iPad

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1j11KP6

Posted by Katta

1, మే 2014, గురువారం

Ramaswamy Nagaraju కవిత

అనువాద కవితలు: 1. ....|| గులాబి ॥.... గులాబి గుండెలోని గుప్త నిధి నీ ఎద సంపదే. వెదజల్లు దాన్ని రోజా లా అంతే, నీ బాధ ఆమె స్వంత బాధై పోతుంది . ఒక పాటలోనో ఒక మహా ప్రణయాభీష్టం లోనో చల్లు ఆ నిధిని. ఆపకు ఆ గులాబీని ఆపావా , ఆ అగ్నిలో నీవు ఆహుతి. ( ఆదివారం ఆంధ్రప్రభ Dt:13.04.2014లో ప్రచురితం) 2. ....॥మలిసంజ ॥.... నా హృదయం మైనమౌతున్నది మెత్తగా ,కరిగే కొవ్వత్తిలా . నా రక్త నాళాలు చిక్కని తైలాలు ద్రాక్షాసవ ప్రవాహాలు కావు . అణచబడిన నా మెతక బ్రతుకు పారిపోతున్నది గజెల్లా జింకలా. 3. ....||పరంజ్యోతి ॥.... వృధాగా యత్నిస్తున్నావు నా పాట పీక నొక్కాలని లక్షలాది పిల్లలు నా పాటను ఏక కంఠం తో పాడుతున్నారు కోరుస్ గా సూర్యుని కింద. వృధాగా శ్రమిస్తున్నావు నా గీతాన్ని విరిచెయ్యాలని: ఎంతో ఆర్తి తో పాడుతున్నారు పిల్లలు దేవుని చెంత. ('సూర్యుడు' భగవంతునికి, 'పిల్లలు' తన అభిమానులకు ప్రతీకలు) (ఆదివారం ఆంధ్రప్రభ Dt:20.04.2014 ) మూలం :గాబ్రియేలా మిస్ట్రాల్ (చిలీ దేశ నోబెల్ లారియెట్ ) . తెలుగు సేత : నాగరాజు రామస్వామి. ---Dt: 01 .05.2014

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1iHgJOj

Posted by Katta

26, ఏప్రిల్ 2014, శనివారం

Ramaswamy Nagaraju కవిత

లఘు కవితలు-3: ...॥ పచ్చి రాజకీయం! ॥... పచ్చ నోటూ, సార సీసా మచ్చు మందు చల్లుతున్నాడు మాయదారి మాంత్రికుడు! ఓటు పోయింది నిన్నటి ఓటు మరపు నటిస్తున్నాడు తాగుబోతు ఓటరు ! * * * రాజకీయ రణరంగం చతుర చదరంగం పందెం కాస్తున్నారు కోట్లకోసం వోట్లకోసం క్రుద్ధులు, కురువృద్ధులు కుహనా ప్రభుద్ధులు చిత్తో బొత్తో తేలేదాకా చిమ్మిన నాణెం దేశం! 26.04.2014

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1h0M4eZ

Posted by Katta

24, ఏప్రిల్ 2014, గురువారం

Ramaswamy Nagaraju కవిత

....॥ స్పర్శ! ॥.... ఒక కమ్మతెమ్మర ఒక కాంతి కిరణం ఒక సితమేఘచ్ఛాయ ఒక శైశవ స్మిత హేల ఒక పరిమళ పారిజాతం ఒక పడిలేచిన కెరటం ఒక నింగికి సాచిన రెక్క ఒక రేయిని మీటిన చుక్క ఒక ఆత్మీయ వాక్కు ఒక అభయ హస్తం ఒక్కొక్కటీ నా ఎదను మేల్కొల్పే ఒక పంచభూత పరామర్శ ! నా ఎడదను శృతి చేసే ఒక విశ్వాత్మ స్పర్శ ! Dt:24.04.2014

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1jRIrtU

Posted by Katta

22, ఏప్రిల్ 2014, మంగళవారం

Ramaswamy Nagaraju కవిత

....॥ ఓదార్పు ॥... దశాబ్దాలుగా చెక్కుకుంటున్నాను వ్యక్తిత్వాన్ని అయినా అసంపూర్ణంగానే వుంది విగ్రహం ! మైళ్లు మైళ్లు నడుస్తున్నాను ఇంకా అగమ్యం గానే వుంది గమ్యం! ఎన్ని ఎత్తులకు ఎగబ్రాకినా అందకుండానే వుంది శిఖరం ! "అమరిన శిల్పం,అందిన ఎత్తులు అభినందనీయాలే " అంటున్నవి అనుసరిస్తున్న నా అడుగు జాడలు. "ప్రయత్నం ,ప్రతిఫలనం పర్యాయాలే " అనునయిస్తున్నవి నన్ను నా నీడలు! Dt.21.04.2014

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1h8ZDNa

Posted by Katta

18, ఏప్రిల్ 2014, శుక్రవారం

Ramaswamy Nagaraju కవిత

...॥ కృత్యాద్యవస్థ ॥... మనసు మాటను కవిత్వీకరించాలని ఆరాటపడుతుంటుంది హృదయం . ఆకాశంలో వేలాడే చంద్రున్ని చేరేందుకు నేను వెన్నెల తాళ్లు పేనుతుంటాను. అర్థం నన్ను ఊరిస్తుంటుంది , శబ్దం నన్ను ఉరికిస్తుంటుంది, శబ్దార్థాల అంతర్లయల అలల మీద నా నావ ఊగాడుతుంటుంది. అర్థం కాని అంతర్వాహిని ఏదో నన్ను నడి సముద్రంలోకి నడిపిస్తుంటుంది! శిధిల నౌకా దృశ్య శకలాల మీద నేను తేలాడుతుంటాను ! Dt: 17.04.2014

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1jaRK86

Posted by Katta

14, ఏప్రిల్ 2014, సోమవారం

Ramaswamy Nagaraju కవిత

...// చరమ సంధ్యలో ఒంటరి చంద్రుడు //... నింగీ నీరూ కలిసిన దిగ్రేఖ మీద తేలుతున్నది ఓ ఒంటరి ఓడ అలసిన సీగల్ లా . చిక్కిశల్య మైన శశిరేఖను పొడుచుకు తింటున్నది నిశి. నీలజలధి నీటి రెప్పల కింద కరుగుతున్నది అలల కల. తడి ఊర్పులను మోసుకొస్తున్నది నీరసించిన సముద్ర పవనం. విరుగుతున్న కెరటం ! చతికిల పడ్డ చంద్రుడు! సద్దుమణగుతున్న సాగర తీరం లో ఏదో నిరాసక్త నిశ్శబ్ద సంగీతం! అతనో నిర్లిప్త నీరవ గీతం!

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1gs5NUO

Posted by Katta

10, ఏప్రిల్ 2014, గురువారం

Ramaswamy Nagaraju కవిత

..../ విశ్వాంతరాళ స్వగతం /..... (Soliloquy of the universe) నేను విశ్వాన్ని ! దూరదర్శనికి అందని దూరాన్ని అంచులు లేని అనంత గోళాన్ని. శూన్యం నుండి శూన్యానికి నా ప్రయాణం బిందువు నుండి బిందువుకు నా పరివర్తనం . నిన్న- అంటే: పద్నాలుగు బిలియన్ ఏళ్ల నాటి నా శైశవ ప్రాయంలో ఓ బిలియన్ వంతే ఉండేది నా దేహం ఈనాడు వంద కాంతివత్సరాల ఊబ కాయం ! ఆనాడు ఆ పరమాణు చిరుగర్భకోశం లో ఎలా ఒదిగానో? ఈనాడు బృహత్తర బ్రహ్మాండ పరీణాహంగా ఎలా ఎదిగానో? ఊహాతీతం ! నా అనుజకోటి 'సమాంతర విశ్వగోళాల' నా అనుంగు అనంత పాలపుంతల సంఖ్య అంతుచిక్కని ఒక అగణిత ఖగోళగణాంకం ! ఈ వైరుధ్య గురుత్వాకర్షణల సంగ్రామం అంతుపట్టని ఓ కాలాకాశ దేవరహస్యం ! అంతంలేని నా అనివార్య అంతిమ విస్పోటనం ఒక కుదింపో? ఓ తెగింపో? అనాది సంకోచ వ్యాకోచాల కొనసాగింపో?! నేను విశ్వాన్ని! అమేయ గోళాన్ని! దర్శించరాని దూరాన్ని! విశ్వాత్ముని మహత్తులో వికసించిన ఓ చిన్ని వైచిత్ర్య క్షణిక వర్తమానాన్ని!

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1elioOy

Posted by Katta

6, ఏప్రిల్ 2014, ఆదివారం

Ramaswamy Nagaraju కవిత

అనువాద కవిత: ....|| నాట్య మెరుగని వాళ్లు ॥ .... 'నేను నర్తించే దెలా?' అన్నాడో వికలాంగుడు. 'ఆడనీ హృదయాన్ని' అన్నాం మేము. ' నేను పాడే దెలా?' అన్నాడో నిస్త్రాణు డు. 'పాడనీ హృదయాన్ని' అన్నాం మేము. 'ఎలా చేసేది నేనూ నాట్యం?' అంది ఓ శుష్క తృణలేశం. 'తేలిపోనీ గాలిలో హృదయాన్ని' అన్నాం మేము. 'మరి,నేనెలా దిగిరాను దివినుండి భువికి?' అన్నాడు దేవుడు పైనుండి. 'ఈ వెలుగులో నర్తించు మాతో మమేకమై' అన్నాం మేము. అపుడు లోయ లోయంతా ఒక బృంద నాట్యకేళి! జత కలువని ఎడద ధూళి లో ధూలి! --మూలం:గేబ్రియాల్ మిస్ట్రాల్ (చిలీ దేశ నోబెల్ గ్రహీత )కవిత 'those who donot dance' కు నా స్వేచ్చానువాదం.

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1e2ve3Z

Posted by Katta

4, ఏప్రిల్ 2014, శుక్రవారం

Ramaswamy Nagaraju కవిత

'అక్షర ప్రవాస కోకిల - నాగరాజు రామస్వామి ఏప్రిల్ 2014 పూలకారు మీద కోకిల షికారు కొమ్మ కొమ్మన పుప్పొడి పొట్లం ఆమని మీటిన కలకంఠం అడవి పూచిన పూల పాట. వసంత గీతాన్ని మోసుకుంటూ వచ్చింది వలస కోకిల కొత్తపూలను హత్తుకోవాలని. ఇక్కడ మావిళ్లు లేవు వేపలు లేవు, పలాశలు లేవు లేవు మధుమాసపు మల్లెలు. ఐనా, వాడలేదు కోకిలమ్మ మొఖం! స్వర్ణ వర్ణ గోల్డెన్ రాడ్ ఎర్రని పూల తివాసి పరచింది నీలి రేకుల బ్లూ బోనెట్ స్నేహ హస్తం అందించింది ఒళ్ళంతా తెలి పూల పొంగై ఆపిల్ చెట్టు పలకరించింది ‘తొలి చిగురును’చూసేందుకు వలస పక్షి రాబిన్ తిరిగొచ్చింది ఆకు పచ్చని ఆహ్వానపత్రమై పొరుగు చైత్రం చిగురించింది. వసంత గీతమై వచ్చిన వలస కోకిల కొత్త పూలను గుండెకు హత్తుకుంది! March 22, 2014 6:58 PM (జయభేరి మొదటి భాగం – కవిత 8)వాకిలి' మార్చ్ 2014 సంచికలో లో వచ్చిన నా కవిత:

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1dPo0A1

Posted by Katta

2, ఏప్రిల్ 2014, బుధవారం

Ramaswamy Nagaraju కవిత

'అక్షర ప్రవాస కోకిల - నాగరాజు రామస్వామి ఏప్రిల్ 2014 పూలకారు మీద కోకిల షికారు కొమ్మ కొమ్మన పుప్పొడి పొట్లం ఆమని మీటిన కలకంఠం అడవి పూచిన పూల పాట. వసంత గీతాన్ని మోసుకుంటూ వచ్చింది వలస కోకిల కొత్తపూలను హత్తుకోవాలని. ఇక్కడ మావిళ్లు లేవు వేపలు లేవు, పలాశలు లేవు లేవు మధుమాసపు మల్లెలు. ఐనా, వాడలేదు కోకిలమ్మ మొఖం! స్వర్ణ వర్ణ గోల్డెన్ రాడ్ ఎర్రని పూల తివాసి పరచింది నీలి రేకుల బ్లూ బోనెట్ స్నేహ హస్తం అందించింది ఒళ్ళంతా తెలి పూల పొంగై ఆపిల్ చెట్టు పలకరించింది ‘తొలి చిగురును’చూసేందుకు వలస పక్షి రాబిన్ తిరిగొచ్చింది ఆకు పచ్చని ఆహ్వానపత్రమై పొరుగు చైత్రం చిగురించింది. వసంత గీతమై వచ్చిన వలస కోకిల కొత్త పూలను గుండెకు హత్తుకుంది! March 22, 2014 6:58 PM (జయభేరి మొదటి భాగం – కవిత 8)వాకిలి' మార్చ్ 2014 సంచికలో లో వచ్చిన నా కవిత:

by Ramaswamy Nagaraju



from kavi sangamam*కవి సంగమం*(Poetry ) http://ift.tt/1dPo0A1

Posted by Katta