జయశ్రీ నాయుడు || నిలవని నీడలే..||

నా కలనుంచి నిన్ను వెలి వేస్తున్నా
వెలుగును చీకటికి అంకితమిస్తున్నా

ఉలకని పలకని వూరింపుల మధ్య
గడవని రోజులెన్నని గుర్తు పెట్టుకోనూ...

ఆశ నిరాశ ల కత్తిపోట్లకు
ఎన్ని గులాబీ రెక్కలు రాలాయని లెక్కించను..

నిద్రలేని రాత్రుల నిముషాల మధ్యన
గంటల్ని లెక్కించింది ఎన్నని చెప్పను..

నిట్టూర్పుల ఉలి చెలిగా కన్నీటి శిల్పాల
ఆరామం లో ఇంక సేద తీరలేను

కలవని ఘడియల్లొ కలవేమో
కలిసిన వేళల్లొ కధవేగా..

కధైనా కలైనా
కరిగే క్షణాల్లా
నిలవని నీడలే..


*10-08-2012