పేజీలు

' నువ్వొక పచ్చని చెట్టయితే పిట్టలు వాటంతట అవే వచ్చి వాలేను'..!. ‎

1, ఏప్రిల్ 2014, మంగళవారం

Chinni Krishna కవిత

జయ గీతిక మండే ఎండల్లో నల్లటి కోయిల సల్లటి చెట్టై పాడుతున్నట్టు.. ఆ.. సందు మలుపు తిరగంగానే గుండెలోకి ప్రాణం తిరిగొస్తుంది గుప్పెడంత ఆశ చిగురేస్తుంది యాసంగి బీడుల్లో వసంతం పురుడోసుకున్నట్టు.. పూలపాన్పులను పరచి, మధుపాత్రలు కూర్చినట్టు.. ఆ సందు మలుపు తిరగంగానే అడవి మల్లెల వాసన గుప్పుమంటుంది ఆకాశం ఆశల పందిరవుతుంది అమవస నిశిలో ఆకసానికి కాటుకద్దినట్టు.. సుక్కల వెలుగులో సినీవాలి సుట్టూ పరుసుకున్నట్టు... ఆ సందుమలుపు తిరగంగానే సల్లగాలులు సెమటసుక్కలతో నెయ్యమొందుతుంటాయి.. మనసు సెలిమెలో ఊసుల గలగలలు వినిపిస్తుంటాయి.. సుక్కలన్ని ఒక్కటై సూరీడై మొలిసినట్టు.. సుట్టూరా సీకటిని సూరులోకిజెక్కినట్టు ఆ సందు మలుపు తిరంగానే మనుసు మబ్బుల్ల కొత్త పొద్దు పొడుసుకొస్తుంది.. కనులముందు.. వుగాది పరుసుకుంటుంది.. ... చిన్నికృష్ణ

by Chinni Krishna



from kavi sangamam*కవి సంగమం*(Poetry ) http://ift.tt/PcN9tp

Posted by Katta

Avvari Nagaraju కవిత

||మోడిఫికేషన్||ఎ.నాగరాజు ఒక మిట్ట మధ్యాహ్నపు ఎండలో ఆకాశానికి కాషాయం పులుముతూ అంతా వీరంగం వేస్తున్నప్పుడు త్రిశూలపు పదునుటంచుల కొసలలో బలవంతంగా పెకలించిన గర్భస్త శిశువుల జాడ- తొణికిన ఒక్క ఉమ్మ నీటి చుక్కయినా ముఖాలకు ఉప్పెనయి తాకకపోతుందాని దారుల వెంట నువ్వు ఉన్మత్తుడవై వెతుకుతావు బలిసిన ధనాగారపు ఖార్ఖానాల దోసిళ్ళలో కొన్ని కలలను టోకుగా తయారుచేసి ఊళ్ల మీదకు రంగులురంగులుగా చిలకరిస్తున్నప్పుడు అధికారాలలో, మతాలలో అంచెలు అంచెలుగా అలుముకున్న ఆధిపత్యపు ఉన్మాదాలలో దేశమంటే మగతనమయి నిటారుగా లేపుక నిలుచున్న శిశ్నాలలో పొగలు కక్కుకునే విద్వేషం దేశభక్తయి చివరకూ ఎంతకూ కుతి తీరక యోనులలో తాగి పడేసిన సీసాలను జొనిపి - అది నెత్తురో, కరిగి పారుతున్న దేహమో తెలియక మండుతున్న దిసపాదాలతో అవే అవే అవే మాటలను పిచ్చిగా వదురుతూ కనపడని ఆ జాడల వెంట ఒక ప్రళయంలా తిరిగిన చోట్లలో మళ్ళీమళ్ళీ తిరుగుతావు ఎక్కడా దారి దొరకదు ఎవ్వరూ ఒక్క మాటను కూడా ఆశ్వాసనగా జ్వలిస్తున్న నీ దేహంపై కప్పరు రాలిన పూవుల కోసం పిచ్చిగా కవితలల్లి వాడిన ఆకులపై అదే పనిగా ఎక్కడెక్కడివో జీవజలల జాడలు వెతికి పలవరించి మరీ మాట్లాడే పుణ్యాత్ములు ఒక్కరూ నోరు విప్పరు అవును ప్రభూ అంబానీలు మెచ్చినవాడూ, జనాన్నంతటినీ మూకుమ్మడిగా ఏకతాటిపై నడిపించెడివాడూ, మాయలఫకీరు వంటి వాడూ అయిన నాయకుని కోసం నా దేశమిప్పుడు కలవరిస్తోంది 1-4-2014

by Avvari Nagaraju



from kavi sangamam*కవి సంగమం*(Poetry ) http://ift.tt/1mtHFFA

Posted by Katta

Kapila Ramkumar కవిత

|| గాదికింది పందికొక్కు || సుప్రభాతవేళ కోకిల పాట కోసం మావిడిచెట్టుకేసి చూసా! కర్ణకఠోరంగా ప్రహరీగోడమీద కాకి గోల మాత్రం చికాకు పెడుతోంది! కిటికీ భళ్ళున మూసిన శబ్దం విని '' కాకి అరుపు విన్నారుగా - ఇక ఎవరో కొంపకు దిగేటట్టున్నారు!'' మా ఇంటావిడ శరసంధానానికి '' అదొక్కటే తక్కూవైంది మనకి, నా మొహాన కాస్త టీ నీళ్ళు పోస్తావూ '' అన్నమాట వినిపించుకోకుండా '' పండుగ నెత్తిమీద పడింది దాని సంగతి దేవుల్లాడరా? '' ఎదురు దాడి టీ తోనే! '' అందుకోలేనంత ఎత్తులో ధరలున్నపుడు కొన్నింటిని పక్క వారినుండి అడుక్కోక తప్పదు గాని - సంచి యిటు యివ్వు '' అన్నా అడుగునబడ్డ బడుగు జాతి వాళ్ళం కదా అడుక్కోటానికి సిగ్గులొదిలేసిన వాళ్ళం కూడ! ముక్తసరిగా ముగించి టీ చప్పరించి రోడ్డెక్కాను కొనేవి యేమిటి, అడుక్కునేవేమిటి నెమరువేసుకుంటూ '' వేప పూవు, మామిడాకు, మామిడిపింది బెల్లం ముక్క, చింతపండు '' ఉగాది ప్రసాదానికి! ''ఈ మాయదారి పండుగలు నెలాఖరునే రావాలా? వేతన జీవుల వెతలు మాటటుంచితే బోడి విశ్రాంత బడుగుజీవి గతేమిటీ '' అనుకుంటు మోహనరావు అంగడి చేరాను అడగలేక చేతులు నలుపుకుంటుంటే '' పాత బాకీ ఎప్పుడు చెల్లుబాటు పండగ సరుకులకు పొద్దున్నే దాపురించారు?'' మునిసిపాలిటీ వారి ఇంటిపన్ను నోటీసులా! లేని నవ్వు తెచ్చుకుని '' నిజమే దండగే అదే పండగ '' నా సంజాయిషి పూర్తికాకుండా, నా మీద జాలో, నానుండి అతను వసూలు పెరుగుతందనే ఆశో! నాకు తెలీదు కాని '' పట్టండి తప్పుతుందా. .’’ విసుక్కుంటూ యిస్తుండగా నా దృష్టి మాత్రం ఇంకెక్కడో..... అటు పక్కో జీపు యిటుపక్కో జీపు ''మాతో వస్తే 100 రూపాయలు, క్వార్టర్ బాటిల్, బిర్యాని పొట్లం '' చెరో పక్కనుంచి నన్ను లాగుతున్నటనిపించింది! '' ఆఁ...మాతో వస్తే 100 రూపాయలు, రెండు బిర్యాని పొట్లాలు '' ఎన్నికల ప్రచారానికి కూలివాళ్ళ వేటలో నా దగ్గరకే వచ్చినట్టుంది! '' ఇటు చూస్తే బాదం హల్వా అటు చూస్తే ఇడ్లీ సాంబారు '' ఎదో అవే మాటలు శ్రీశ్రీ అన్నట్లు గుర్తుకొచ్చి, సంచి అందుకుంటూండగా '' ఈ బాకీ, పాత బాకీ చెల్లింపు ఎప్పుడు.'' వెంటనే జవాబు చెప్పలేను......ఎదురుగావున్న అహ్వానాన్ని అందుకుని, మౌనంగానే ఇంటి ముఖం పట్టాను! చలపతి దొడ్లోంచి మామిడాకులు, మామిడిపిందెలు, వెంకట్రావు దొడ్లో వేపపూవు సేకరించి హడవుడిగా అడుగుపెట్టానో లేదో ఇల్లు కడిగిన బురదలో జారి బొక్క బోర్లపడ్డాను సరుకులన్నీ బురద, రెండు బిర్యాని పొట్లాలు వెక్కిరిస్తూ! దులుపుకుని లేచాను, హతవిధీ అనుకుంటూ, పండుగ సంబరం మాట అటుంచి అటు వెతికి, యిటు వెతికి (పోపుల డబ్బా, చెక్కా బీరువా వెతకగా) యాభై జమకూడితే సరితా క్లినిక్‌కు వెళ్ళి ఇంజెక్షన్‌ చేయించుకుని మంచం మీద విశ్రాంతి తీసుకుని నిద్రలోకి ఎప్పుడు జారుకున్నానో కాని '' నాన్నా! పండుగపూట దెబ్బలు తగిలాయా? '' అంటూ మా అమ్మాయి పలుకరింపుతో నా బాధలు, నొప్పులు మటుమాయమైనాయంటే నమ్మండి అలా పలకరించిన మా అమ్మాయి అభిమానానికి అన్నీ చికాకులు మటుమాయమయ్యాయి! ''పరామర్శలు ఆపితే ఉగాది పచ్చడి తీసుకొని అన్నం తిందురుగాని రండి '' హోం మినిస్టర్ కేకతో ఒక్కొక్కప్పుడు గాదికింది పందికొక్కు శబ్దాలు కూడ సుమధుర కోకిల స్వరాలవుతాయని నన్ను నేను సముదాయించుకున్నాను! ** కపిల రాంకుమార్ 9849535033 31 మార్చి 2014 కవి సమ్మేళనం - ఖమ్మం

by Kapila Ramkumar



from kavi sangamam*కవి సంగమం*(Poetry ) http://ift.tt/PcN8FI

Posted by Katta

Bhavani Phani కవిత

భవానీ ఫణి ॥ కోపం ॥ కోపం ఉండచ్చు.. కానీ అది, అద్దం మీంచి జారిపోయే నీటి బిందువులా ఉండాలి తప్ప తారాజువ్వని ని అంటించే నిప్పు రవ్వలా కాదు కాలువ లో పరవళ్ళు తొక్కే కొత్తనీరు లా ఉండాలి తప్ప భూకంపం తర్వాత వచ్చే సునామీ లా కాదు పులిహోర లో కలిసి మెత్తబడిపోయే పోపు లా ఉండాలి తప్ప అన్నం లోనో, పప్పులోనో నక్కి పంటికింద పడే తెల్లని రాయిలా కాదు గోడకేసి కొట్టిన రబ్బరు బంతిలా ఉండాలి తప్ప లక్ష్యాన్ని తునాతునకలు చేసే బాణపు మొనలా ఉండకూడదు శీతాకాలపు పలుచని ఎండలా చురుక్కుమనిపించాలి తప్ప వడదెబ్బతో నిర్జీవం చేసే గ్రీష్మ ప్రతాపం లా ఉండకూడదు దువ్వెన ని ఇబ్బందిపెట్టే గిరజాల జుట్టు చిక్కులా ఉండాలి తప్ప ఎంతకీ విడదియ్యలేని చిక్కుముడి లా ఉండకూడదు కోపం అనేది మన మనసుకి తగిలిన గాయాన్ని మాన్పే టందుకు బహిర్గతమవ్వాలి తప్ప దావానలంలా వ్యాపించి మనతో పాటు పక్కవారిని కూడా మాడ్చి మసి చెయ్యకూడదు !!!! (ప్రస్థానం ఏప్రిల్ సంచిక లో వచ్చిన నా కవిత http://ift.tt/PcN8pe) పోస్ట్ చేసిన తేది 01. 04. 2014

by Bhavani Phani



from kavi sangamam*కవి సంగమం*(Poetry ) http://ift.tt/PcN8pe

Posted by Katta

Kotha Anil Kumar కవిత

@ రాజకీయ పార్టీ @ అసత్యపు పునాది తవ్వి అవినీతి రాళ్ళు తెచ్చి కుటిలత్వపు మట్టి కలిపి కుసంస్కార పూత పూసి నయవంచన సున్నమేసి నానారంగుల జెండాలు చుట్టి కట్టిన కొత్త పార్టీ భవనం అదిగో రాజకీయ విషసర్పాల పుట్టగా ప్రజాసేవ టికెట్ల కొట్టుగా పూటకొకడు వచ్చిపోయే సానికొంపగా పైరవి బ్రోకర్ల అడ్డాగా మారింది.. అది చివరికి పెట్టుబడి దారుని కాలి బూటులా అధికారకామందుని వెంట ఉంపుడుగత్తెగా ప్రజా గొంతుకు మానిఫెస్టో ఉరితాడులా ప్రజాస్వామ్య విచ్చేదనపు పటాలక్షేత్రంగా మారింది... అది కొత్త పార్టీ..రేపటి చెత్త పార్టీ పొత్తుల దృతరాష్ట్ర కౌగిలిలో కుదేలై చితికి పోయే చిన్న పార్టీ ఒకడి ధనదాహం కోసం ఒకడి మంత్రి పదవి కోసం ఇంకొకడి వంశ అభ్యున్నతి కోసం ఇంకొకడి రాజకీయ వ్యభిచారం కోసం పెట్టబడిన భారతదేశపు ప్రజాస్వామ్యాన్ని నిర్వీర్యం చేసే రాజకీయ పార్టీ. _ కొత్త అనిల్ కుమార్. 1 / 4 / 2014

by Kotha Anil Kumar



from kavi sangamam*కవి సంగమం*(Poetry ) http://ift.tt/PcN60C

Posted by Katta

Radha Manduva కవిత

అస్థిత్వం - రాధ మండువ 1. శబ్ద కాలుష్యంతో వేడెక్కిన సాయంత్రం నియాన్ లైట్లలో మెరుస్తున్న సిల్కు చీరల డంబం హాయ్! హలో! అంటున్న రంగు పెదవుల వ్యంగ్యం అధికారాలను బట్టి చూపిస్తున్న కపటాభిమానం జీవితం మీద అసహ్యాన్ని కలిగిస్తున్నాయి. 2. నల్లని కాటుకను మింగిన నిశాంధకారం 'నలుగురితో కలవడం తెలియదం'టూ చేస్తున్న అవమానం ఇష్టం లేకుండా దురాక్రమణం గావింపబడ్డ శరీరం లేడిని చంపి తింటున్న సింహంలా నవ్వుల వెటకారం జీవితాన్ని అంతం చేసుకోమంటున్నాయి. 3. చల్లని ప్రభాత గాలుల ఉదయం బాలభానుడి కౌగిలి వెచ్చదనం ఆశల అడియాశల బేరీజుతనం అంధకారపు ఆలోచనలను విడనాడమంటున్న స్థిరత్వం బిడియపు శృంఖలాలను తెగ్గొట్టుకోమంటున్న ధీరత్వం జీవితం పట్ల నిర్లిప్తతను తొలగిస్తున్నాయి. 4. నిశ్శబ్ద ప్రశాంత మధ్యాహ్నం ఎండలో నిగనిగలాడుతున్న ఆకుల పచ్చదనం రేడియోలో వినబడుతున్న ఆర్ద్ర స్వరం పక్కింటి పిల్లవాని మాటల్లోని అమాయకత్వం వంటింటి నేలపైనున్న చెమ్మదనం జీవితం మీద ఆశను కలిగిస్తున్నాయి 5. దారాన్ని తెంచుకుని ఎగురుతున్న గాలిపటం గూడుని వదిలి స్వేచ్ఛగా విహరిస్తున్న విహంగం గలగలమంటూ దూరతీరాలకు పరిగెడుతున్న ప్రవాహం పురివిప్పి ఆడుతున్న మయూరం జీవిత గమ్యాన్ని తెలియజేస్తున్నాయి. ****

by Radha Manduva



from kavi sangamam*కవి సంగమం*(Poetry ) http://ift.tt/PcN88F

Posted by Katta

Rammohan Rao Thummuri కవిత

వాకిట్లో వసంతం .............................. ధర్మనిష్ఠ తో రాముడు పదునాలుగేళ్లు పాండవులు పుష్కర కాలమే అరణ్యవాసం చేసింది అస్థిత్వపు ఆరాటంతో అలుపెరుగని పోరాటపటిమతో అరువదేండ్ల జనారణ్యవాసం చేసిన నాలుగున్నరకోట్ల గుండెవాకిళ్లలోకి గెలుపు చప్పుళ్లతో మెరుపు గుప్పిళ్ళతో ఎగజల్లిన గులాలై వలపులా వసంతం దిగివచ్చింది ఎన్నిత్యాగాల పచ్చిమామిడి కాయలు ఉరితాళ్ళు మెడలకు పూల హారాలుగా వేసుకున్నాయో ఎన్ని కలాలు అక్షరాయుధాలయ్యి పోరాటయోధుల పోడిమి వసివాడకుండా నిద్రలేమిని వరించాయో ఎన్ని గళాలు కళాజాతరలుగా నిరవధిక ఉద్యమస్ఫూర్తికి నిరంతరం మోగే యుద్ధ భేరీలయ్యయో ఎన్ని మేధస్సులు చరిత్రపుటలను చెదలు వదలించడానికి తపస్సులు చేశాయో ఆరుదశాబ్దాల తిమిరంతో సమరం వేయి వెలుగుల విజయ విహారమై కోటి గొంతుల జయ జయ నినాదమై నిద్రాణమైయున్న ఆశల ఆశయాల మేల్కొల్పిన కాహళారవమై నిర్ణయాలను నీరుగార్చడానికి పన్నిన కుట్రల కుతంత్రాల శకునుల పన్నాగాలను సైంధవుల శిశుపాలుర ఆగడాలను అరికట్టడానికి ఎన్ని కృష్ణరాయబారాలు జరిగాయో నిన్నటి విజయ విక్రమం నేడు జయ జయధ్వానం కోటిరతనాల వీణా నిక్వాణం వాకిట్లో వసంతవిలాసం చిమ్మచీకట్లో చిరుదివ్వెల చిరుదరహాసం 'వాధూలస' జయ ఉగాది

by Rammohan Rao Thummuri



from kavi sangamam*కవి సంగమం*(Poetry ) http://ift.tt/PcN5JW

Posted by Katta

Kapila Ramkumar కవిత

అక్షర క్షిపణి (వాకిలి పత్రికలొ0 - కపిల రాంకుమార్ ఏప్రిల్ 2014 ఓ అక్షరానికి మరో అక్షరం పేర్చటం కాదు అది క్షిపణిలా పేలినపుడే కవిత్వం! పళ్ళగొర్రుతో దమ్ము చేసిన చేలో వరినాట్లున్నట్టు చదరంగపు గళ్ళున్నట్టుండాలి! గాలికి వూగే జొన్నకంకులమీద వాలిన పిట్టలాగుండాలి మబ్బులను అహ్వానిస్తూ ఆకాశంలో విన్యాసం చేసే తూనీగల్లాగుండాలి! ధైర్యపు భుజంమీది సంధించిన ఆయుధంలా! శత్రు స్వప్న సింహంలా ! జతగూడే అక్షరమే జతగాడౌతుంది! పదాలతో పదాతిదళానికి మొనగాడైన అధిపతౌతుంది! http://ift.tt/1mtHCJO

by Kapila Ramkumar



from kavi sangamam*కవి సంగమం*(Poetry ) http://ift.tt/1mtHCJO

Posted by Katta

Sree Kavitha కవిత

'' మనసంతా నువ్వే''లో నన్ను త్రుతియ విజేతగా నిలిపిన నా ''కవితా సుమం '' ------------- ********** -------------- 'శ్రీకవిత' ||'జయ'కేతనాల ఉగాది || (ఉగాది కవితల పోటీకి) ఆకులు రాల్చి మోడు వార్చిన శిశిర ఋతువు చిద్విలాసాలున్న విజయ నామ సంవత్సరం ఆఖరి అంకానికి చిరునవ్వుల వీడ్కోలు కాల చక్రంలో నీ 'విజయ ' 'ఆపజయాలు ' చిరస్మరణీయం ఉద్వేగ భరితం రసరమ్య రాగ భరితం నీతో గడిపిన క్షణాలు మనోహరం ఆ మధురస్మృతులతో మమేకమై ముందుకు వెళ్తూ... మరో నూతనానికి "నీరీక్షణాలు"..!! నీరీక్షణాలకు చరమగీతం పలుకుతూ చైత్ర మాస శుక్ల పక్షం శుభారంభం మోడువారిన జీవకోటిని వర్షించి హర్షించుటకై వసంత ఋతువు ఆగమనం ఆశయాల చెట్టను చిగురింప జేసే ఘడియ చైత్ర శుద్ధ పాడ్యమి బ్రహ్మ దేవుడి సృష్టికి చక్కని ముహూర్త గడియ 'యుగ్ ''ఆది "ఉగాది".ఆ పర్వదినాన నూతనానికి నాంధి పలకమంటూ ఆభయమిస్తున్న "జయనామ సంవత్సరానికి " !!స్వాగతం సుస్వాతం!! ఆ శుభవేళ అరుణకిరణాల విభావరిలో ఆశల ఉత్తేజంతో తేజం సరిచేసుకొని జయంకోరే వారికి జీవితం షడ్రుచుల సమ్మిళితం, రాగద్వేషాల రసరమ్యమని తెలిపేందుకు వేపపువ్వుతో చేదు అనుభవాల దుఃఖాన్ని,భెల్లంతో మధురమైన తీపిగుర్తులను, పచ్చిమిరపకాయల కారంతో కోపాన్ని, ఉప్పుతో భయాన్ని, చింతపండుతో చిరాకుని లేతమామిడితో ఆశ్చర్యాన్ని మిశ్రమం చేసి ఆరగించమనే మధుర ఫలహారం "ఉగాది పచ్చడి" ...!! ఆరుణోదయాన శతమానం భవతి అంటూ శథగోపునికి శిరసావహించి మనోవాంఛ ఫలసిద్ధికై వేదోపనిషత్తులు ఆవిఘ్నం కోసం విఘ్నేశ్వరుఁడి ముందు గుంజిళ్లు, సాష్టాంగ ప్రణామాలు, పూజారుల ఆశీర్వచనాలు కాలచక్రంలో గ్రహాల గమనాన్ని గుణించి బేరీజు వేసుకొని అనుగ్రహం పొందటానికి అనువైన తిథి,వార,నక్షత్ర,యోగ,కారణ కూడిన రాశి ఫలాల శుభగడియలు పన్నెండు మాసాల ఆణుకువలు మెళకువలు విపులంగా తెలుసుకొనేలా సంపుటించిన పుస్తకాన్ని కర్తవ్యంగా ఆలకించడమే "పంచాంగ శ్రవణం"...!! ముంగిలిలో ముగ్గులా, షడ్రుచుల మృస్టాన్నభోజనంలా ,ఆమని కోయిలలా వచ్చింది ఉగాది మళ్ళీ పన్నెండు మాసాల బంధంతో మావి చిగురుల హరితవర్ణంతో భవితల బాంధవ్యాల వేడుకై నటనకు నందులు, కవులకు సన్మానాలు, సాహితీ సేవకు సముచిత పురస్కారాలు మళ్ళీ మొదలు కమ్మని వంటల ఘుమఘుమలు,కొత్త ఆల్లుళ్ళకు కానుకల దీవెనలు మన సాంప్రదాయాలు ప్రపంచ తెలుగు వారందరికి జయనామ సంవత్సరంలో హర్షాతి జయకేతనాలు అందాలని ప్రార్ధిస్తూ ఉగాది శుభాభినందనలు

by Sree Kavitha



from kavi sangamam*కవి సంగమం*(Poetry ) http://ift.tt/Oa5ENM

Posted by Katta

Nvn Chary కవిత

డా .ఎన్.వి.న్.చారి 01-04-2014 ఓటరన్న కో మాట 1. ఓటు ఓటు అంటు ఒడుపుగా వస్తారు మాట లెన్నొ జెప్పి మాయ జేయ ఆశ లెన్నొ జూపి అందల మెక్కింత్రు ఒక్క చూపు చూడు ఓట రన్న 2. కాస్టు పేస్టు పూసి కంగారు పెడతారు హార్టు బీటు పెంచి స్మార్టు గాను మతము పేరు జెప్పి మర్యాద జేస్తారు ఒక్క చూపు చూడు ఓట రన్న 3. కొత్త నోట్ల తోడ పుత్తడి తోడను చెత్త కాగితముగ చేతురు నిన్నయ్య డబ్బుకాశ పడక ధక్షున్ని గెలిపెంచు ఒక్క చూపు చూడు ఓట రన్న 4. బ్రాంది బాటిలిచ్చి భ్రాంతిలో ముంచేసి దండు కుందురోట్లు దండి గాను త్రాగి చెడకు మయ్య తత్వంబు తెలుసుకో ఒక్క చూపు చూడు ఓట రన్న 5. చెప్ప నలవి కాని తిప్పలెన్నొ పడుచు మాయ చేతు రయ్య మంత్ర మేసి వారి మాట వినిన పాణిలో చిప్పరా ఒక్క చూపు చూడు ఓట రన్న

by Nvn Chary



from kavi sangamam*కవి సంగమం*(Poetry ) http://ift.tt/Oa5Exg

Posted by Katta

Kavi Yakoob కవిత



by Kavi Yakoob



from kavi sangamam*కవి సంగమం*(Poetry ) http://ift.tt/1hufWDU

Posted by Katta

Thilak Bommaraju కవిత

My baby@vaakili... http://ift.tt/Oa5GFw తిలక్/ప్రసవం ---------------------------- 1/గర్భం దాల్చిన నిండు మేఘాలు చినుకులను ప్రసవించడానికై ఉరుములు 2/ఆకాశం(లో)తో ప్రతి నిత్యం మబ్బుల అధరీకరణం ధరణిలో కూరుకుపోవడానికి 3/కొన్ని వెలుతురుల ప్రసరణ ఈనాడు మళ్ళా పుడమిపై సంతృప్తిగా ఓ నిట్టూర్పు 4/చెట్ల కొమ్మల మధ్యగా జరుగుతున్న పిడుగుల ప్రక్షాళన వాటి మొదళ్ళను కుదించేస్తూ 5/కొన్ని చేతులు చాపిన ఆవరణం ప్రకృతి ఒడి ఎన్నిమార్లు ఇంకిపోయాయో గుర్తుపట్టని పదార్థాలు 6/కణాలు ప్రతి కణాలు అంతమవుతూ మళ్ళీ ఆవిర్భావం. తిలక్ బొమ్మరాజు 23.03.14

by Thilak Bommaraju



from kavi sangamam*కవి సంగమం*(Poetry ) http://ift.tt/Oa5GFw

Posted by Katta

Kancharla Srinivas కవిత

పచ్చని హృదయం కోసం గాలి పయనం... పొత్తుల జిత్తులతో రాజకీయ వేడి రాజుకున్నాక.. చర్చల్లో దూరి నేతల నోళ్ళలో ఊరిన గాలికి గాలాడటంలేదు.. వాతా వరణం వేడెక్కింది పల్లెనుంచి నగరం దాకా పచ్చని గాలి కరువయ్యింది...

by Kancharla Srinivas



from kavi sangamam*కవి సంగమం*(Poetry ) http://ift.tt/Oa5E0q

Posted by Katta

Shash Narayan Sunkari కవిత

నాకు తెలియకుండానే యెద తలుపులు తెరుచుకుంటున్నాయి ఎందుకో? ఏదో తెలియని గుబాళింపు నన్ను ఆవహిస్తున్నట్టున్నది ఎమిటి వింత ఎవరి ఆగమనానికి ఈ సుచిక కనులు తెరిచి చూస్తే నా నుదుట ముద్దాడుతున్న నా ప్రాణ సఖి. శేష్ నారాయణ...

by Shash Narayan Sunkari



from kavi sangamam*కవి సంగమం*(Poetry ) http://ift.tt/1hufYf7

Posted by Katta

Rajkumar Bunga కవిత

ఆర్కే ||బుంగలు (2)|| ఓహో నాకు ఓ రోజున్నదన్న మాట! జీవన పోరాటంలో ప్రతి రోజు అయినా అధికారంగా ఏప్రిల్ ఒకటని - ఒకటే అని!! పోన్లే ఇదో తుత్తి..... ఆర్కే ||బుంగలు (2)|| 20140401

by Rajkumar Bunga



from kavi sangamam*కవి సంగమం*(Poetry ) http://ift.tt/Oa5GoS

Posted by Katta

Rajaram Thumucharla కవిత

చదివిన కవిత్వ సంపుటి :-23 (కవి సంగమం) ----------------------------- కవిత్వ సంపుటి పేరు :- "తెల్ల కాగితం" ( _-కవిత్వం_-) ########## ******************** సంపుటిని రాసింది :- "సతీష్ కుమార్ యశస్వీ"- ---------------------------- పరిచయం చేస్తున్నది :- "రాజారామ్.టి" ------------------------ "తెల్ల కాగితం పై యశస్వీ కవిత్వ ఇంద్రధనువు వొంపుల చిత్రం" ^^^^^^^^^^^^^^^^^^^^^^^^^^^^^^^^^^^^^ " నా తలపుల్లో నిలిచి ఉన్నది నీవైనప్పుడు.. ఎడబాటుకు అర్థమేముంది- పగలైనా రేయైనా నీ ఊహే నన్ను నాకు వివరించేది" అని ఆవిర్లు విరజిమ్మే గుండె చప్పుడు ఆగే లోగా తన ప్రేయసిని జీవితంలా శ్వాసించాలని భావిస్తున్నవాడు ఎవరంటే యశస్వీ సతీష్. "ప్రవాహం కవితావేశంలా లాగేస్తుంది ఎటోకటు ఉద్వేగం ముంచేస్తుంది అది కలలపై రోకటి పోటు నైరాశ్యం నమిలేస్తుంది పంటికింది పెదవిని" ఇలా ఓటమి అంచుల్లోంచో జారిపోతున్న మనల్ని మనమే ఎలా నిలబెట్టుకోవాలో చెబుతున్న కవి ఎవరంటే సతీష్. "పసి పిల్లల పిప్పరమెంట్ నౌతా తీయ తీయగ కరిగిపోతా స్కూలు పిల్లల బ్యాగ్ నౌతా పుస్తకాలను మోసి పెడతా ముసలి అవ్వకు చేయూత నౌతా అవసరమైతే కొడుకు నౌతా నాకే గనక చేతనయితే పైనవన్నీ తానే ఔతానంటున్న కవి ఎవరంటే యశస్వే. ఒక వైచిత్రితో కొత్తగా కవిత్వ సంపుటిని నిర్మించి,తెలుగు వర్ణమాలలో ఎన్ని అక్షరాలు వుంటే అన్ని కవితా కుసుమాలు కూర్చి తెలుగు పాఠకుల మెడలో వేసిన కవి యశస్వీ. యశస్వీ సతీష్ కవిత్వం సంపుటి పుస్తకం తెరువగానే నాకు తెల్ల కాగితం....క్రింద ఆయన సంతకం మాత్రమే కనిపించింది.చిత్రంగా అన్పించలేదు నేను ఇట్లా అంటుంటే.అయితే కవిత్వం కళ్లజోడు ధరిస్తే మాత్రం ఆ"తెల్ల కాగితం " మీద కవిత్వ ఇంద్ర ధనువు వొంపులోని సప్త వర్ణాల సమ్మేళనం మెరుపై నిగ నిగ లాడుతు కనిపించింది.యశస్వీ సతీష్ కీ తన కవిత్వ గురువు కొప్పర్తి లాగే తనదైన అనుభవాల్నీ కవిత్వీకరించే నేర్పుంది.ఏదీ సూటి చెప్పనితనముంది.ఆయన చుట్టువున్న సమాజాన్నీ భావించిన పద్దతి అందర్ని ఆకర్షిస్తుంది.ఒక్కోసారి సరికొత్త పోలికలతో,ఇంకోసారి వస్తువును దృశ్యీకరించే చిత్రణతో వొక కొత్త హాయిని తన కవిత్వంతో అందజేస్తాడు. అందుకేనేమో చాల మంది యిష్టపడతారు. "నీ ప్రపంచంలోకి కవిత్వమై వస్తున్నా నీ సాక్షిగా నన్ను నేను పోగొట్టుకోవాలి నా పేరూ ఊరు చెరిపేసుకోవాలి అక్షారాలను ఆవహించుకొన్న నన్ను చదివించుకొని మనసును తెల్ల కాగితంచేసుకోవాలి నేనే నీ సొంతమైనప్పుడు మన మధ్య అక్షరాలు అనుభూతుల్నీ మాత్రమే మిగిల్చాలి అక్షరాలు మనలోకి కరగి స్వచ్ఛమైన తెల్ల కాగితం మిగలాలి కవిత్వం మన అంతరాంతరాల్లొకి వెళ్ళి ఇంకి లోకమంతా తెల్లకాగితమవ్వాలి" ఈ కవి కవిత్వాన్ని సర్వమానవ హృదయాంతరాంతరాళ్లోకీ ప్రవహింపచేసి,ఆ కవిత్వం అక్కడే ఇంకి పోయేటట్లు చేసి ఈ ప్రపంచం వొక "తెల్ల కాగితం "అయ్యెటట్లు చేయాలనే వొక సుందర స్వప్నం వాస్తవం కావాలని తపిస్తున్నాడు.తెలుపు స్వఛ్చతకీ,నైర్మల్యానికీ సంకేతం. కుటిల,కుత్సిత,దుర్మార్గ,దురంత భరిత మానవ మనస్సుల క్షాళనకు కవిత్వం కారణం కావాలనే గాఢ ఇఛ్చను యశస్విసతీష్ తన కవిత్వంలో ప్రకటిస్తాడు."నాది నీదైనప్పుడే నిజంగా నేను మనిషి నౌతాను"-అని అంటున్నా ఈ కవి "అలవాటైన కొద్ది నాతో చేరిపోతుంది నాకు ప్రతీకగా మారిపోతుంది"-అని చెబుతూ,అక్షరాల పలకరింపుల్ని,పులకరింపుల్ని,పగలబడే నవ్వుల్ని నచ్చనప్పుడు తనతో వాటిని పుచ్చుకొని నడువలేనని నిష్కకర్షగా చెబుతాడు.ఇలా తెల్లకాగితం పై కవిత్వ ఇంద్రధనుస్సును కలకంటాడు తన మాస్టర్ బాటన నడుస్తూ.. "నువ్వే నా గురువంటే కోసి ఇమ్మన్నాడంటా వేలు ఈ కాలంలో ఎవడైనా వింటాడా!! నా వేలు నీ కిస్తాను...చేయి పట్టు అంటాడా!! వినడం ఎందుకు!!..జివిత కాలపు వేదనకా!! గురువంటే చెప్పొచ్చు మంచి ఎన్నైనా... మరి అడుగొచ్చా ఎదురేదయినా..అడిగారా ఎవరైనా!! ఏకలవ్యుడి నుండి కాస బియాంక వరకూ విని చెడి పోయినవారే తడవ తడవకు!!" గురువుకు గౌరవం ఇస్తూనే గురువు ఎలా వుండాలో.. నిజమైన గురువు ఎవరో నిర్వచిస్తూ "నువ్వే నా గురువంటే"-అనే కవితలో పై మాటలు అంటాడు.గొప్ప శిష్యునికీ ప్రతీక అయిన ఏకలవ్యుడు వంచలేక విరిచిన ద్రోణుని వంచనకు గురయ్యాడు.నైలు నదీ యుధ్దంలో తండ్రి అస్పష్ట మాటల కారణంగా దేశం కోసం ఓడ డెక్ మీద నిలువెత్తు మంటలమధ్యనిలువునాకాలిపోయినవాడుకాసాబియాంక.ఏకలవ్యుడు, కాసా బియాంక ఈ ఇరువురు "classical examples of devotion and sevice"కు ప్రతీకలు.ఈ పాత్రలకీ జరిగిన అన్యాయాన్ని "లోక మర్యాదకు తల వంచేవాడు ఇంతకన్నాఏంచేస్తాడు!!"త్యాగధనులజాబితాలపేరుకోసంపాకులాటతప్ప"అనేమాటతోవ్యంగ్యంగావ్యాఖ్యానిస్తాడు. శిష్యలక్షణం అనన్య సాధ్యత్వమే కాని బొటనవేలు నరికినివ్వటం కాదు,త్యాగధనుల జాబితలో చేరటానికీ పాకులాట వుండకూడదని,గట్టి పూనిక ఉన్నవానికి ధ్యాస,శ్వాస.. విద్యమీదే వుండాలని,విద్య నేర్పేదెవరైనా ఆదరంగా అందుకోవాలని,పుస్తకాల్ని కాదు మనుషుల్ని చదవాలని ఈ కవి శిష్యుని లక్షణం కూడా చెబుతాడు. కవి అన్ని వేళల ఆశావాదిగా మనలేడు.జీవితంలో కొన్ని క్షణాల్లో నిరాశతో కవి తన చుట్టూ వున్న మనుషుల మీద విసుగును పొంది నమ్మకం కోల్పోయి కొన్ని సందర్భాల మీద అసహ్యంతోనో,అపనమ్మకంతోనో కవిత్వపు కళ్ళజోడుతో దర్శించి వాటిని తమకు నచ్చినట్లుగా చిత్రించుకొంటారు.కవిత్వం నా కళ్లజోడు-అనే కవితలో వొకానొక భావ తీవ్రతతో సౌందర్యం వెల్లివిరియాల్సిన అదే నింగి నీరు నీలాలు కలిసేచోట సంధ్యా భీభత్సంలా నెత్తుటి చారికల విషాదాన్ని కవిత్వపు కళ్ళజోడు లేకుండా దర్శించలేనని ఈ కవి భావిస్తాడు. 'అది నా చెంత లేకపోతే అంతా మసక మసక నింగి నీరు నీలాలు కలసే చోటున సౌందర్యం బదులు నెత్తుటి చుక్కల చారల... భీభత్సం నా ముందున్న మనిషి వెంటాడే నీడై నను అభద్రతా భావనలోకి నెట్టుతాడు అలికిన అక్షరాలు రెటినా నంటినట్టు నా కంటికీ నలకలై నకలై ఎంత నలిపినా అడ్డంగానే కనిపిస్తాడు ఎదుటి వారంతా సాటివారు-తోటివారులా కాక బోటి ముద్దల్లా కనిపిస్తారు" ఇలా అంటూ కవి "అప్పుడప్పుడు కవిత్వ కళ్ళజోడుతో లోకాన్ని చూస్తాను/ఇప్పుడంతా..నాకు తెల్ల కాగితం..కింద తన సంతకం వుందంటాడు.ఇలా అనటంలో మారిన మార్పుని ఆకలించుకోలేని మనిషి స్థితిని కవిత్వం మారుస్తుందన్న భావనను అందిస్తాడు. "తెల్ల కాగితం" కవితా సంపుటిలో "ఆమె నా..." అనే పద్యం అంది.ఇందులో ఇది వొక అందమైన పద్యం. "నే పుట్టినప్పుడే... ఆమెకు పాతికేళ్ళు వచ్చాయి/మేము మేమే కానీ మేమిరువురం ఒక్కరమే/నా ఏడుపు ఘోష వేరు/ఆమె లాలించే భాష వేరు"-అని ప్రారంభమయ్యే కవిత మాములు పదాలతోనే ఎంతో హృద్యంగా నడుస్తుంది.బిడ్డ ఎదిగే క్రమంలోతల్లిబిడ్డమధ్యగలబంధాన్ని,అనుబంధాన్నీ చెప్పడమే కాదు,ఆ బిడ్డ పెద్దయింతరువాత "ఊరు నాది మారింది నేను తనతో ఉండరాక"అని అనుకొనే స్థితిని ముసలిదైన తల్లి మీద అణుమాత్రం జాలి లేని తనాన్ని యశస్వీ వాస్తవికంగా కవిత్వం చేశాడు.ప్రారంభంలో "నే పుట్టినప్పుడే.. ఆమెకు పాతికేళ్లు వచ్చాయి"-అని వొక ఉత్కంఠను కలిగించి "నేనేమో కొడుకుని ..ఆమె నా కన్న తల్లి"-అని వొక దిగ్భ్రాంత ముగింపును ఇస్తాడు.ఇలా ముగింపు నివ్వటం మంచి కవిత్వ శిల్పం. "ఙ్ఞానమైనా,ధనమైనా అర్థానికున్న సమస్థ నానార్థాలకు పర్యాయ పదం నాన్నే"-అని భావించే ఈ కవి తన తండ్రిని గుర్తుకు తెచ్చుకొంటూ "పేపర్ తో నాన్న"-అనే కవిత రాశాడు.కన్న బిడ్డ ఆశల మెరుపులను కురిపించాలనే తండ్రి తపనను కవి ఘనీభవించిన మేఘంలా చిత్రించాడు."ఉద్యోగ సమాచారాన్ని ప్రత్యక్ష ప్రసారం చేసే పావు రాయై/ఆ నాలుగు రాళ్ళ మనిషి మీదే వాలుతుంది తెల్లారగానే"-ఈ పంక్తుల్లో కవి ప్రాణం లేని వార్త పత్రికకు ప్రాణం పోసి పావురాయిని చేశాడు.ఇట్లాంటి అద్భుత వాక్యాలకు ఈ సంపుటిలో కొదవే లేదు."వాన కారు కోయిలై ఫలితాల కోసం/రాశి -ఫలాల వేటలో../మళ్ళి పేపర్ తో నాన్న/నా కాలం కలిసోచ్చేదాక కదలని చిత్తరువులా/పేపర్ తో/తన మా నాన తానే"-అనే ఈ మాటల్లో కవి తనకు తన తండ్రికీ,తన తండ్రికీ వార్తపత్రికకు కల బంధాన్ని ఆవిష్కరించాడు. కవులకు చాల వరకు కొన్ని నిశ్చితాభిప్రాయాలు జీవితం పట్ల వుంటాయి.వాటిని ఏదో ఒక సందర్భంలో తమ కవిత్వంలో పొదుగుతుంటారు.ఈ జీవితం ఇలాగే సాగిపోవాలని కూడ మనుషులు భావిస్తువుంటారు."బతుకంటే గుదిగుచ్చిన పనులూ,చిట్టా పద్దులూ కాదు"అని అంటున్న యశస్వి "సాగిపో"అనే కవితలో "ప్రభాతపు తొలి వీక్షణం లోంచే కలలు వెలుగు రేఖల్ని ముద్దాడాలి/రాత్రైనా,పగలైనా కలల్ని వెలిగించుకోవడం..నింగికీ,నేలకు నడుమ మేఘంలా/గాలిలో తేలి నిప్పునీ.. నీరునీ కౌగలించుకోవడం/కాలంతో కరిగి పోయేవరకు కదిలిపోవడం"-ఇలా జీవితం సాగిపోవాలనే ఆలోచనను చేస్తాడు."ఎదురీతకు సిధ్దపడితే విస్తరించిన సాగరాన్ని చీల్చుకొంటూ వడి వడిగా సాగే ఓడను తలపిస్తుంది"- అని వో విజయం తరువాత జీవితం అలా వుంటుందని కవి ఊహిస్తాడు.ఒక వ్యక్తిత్వ పాఠం కవిత్వమైంది ఈ కవితలో. "ఏదో కారణం"-అనే కవితలో "రైలు మంటల్లో ఎందుకు కాలాలి!!/ఆయిల్ రిగ్గో,కారో ఎందుకు పేలాలి!/బాధ,హింస,అతివాదం,ప్రమాదం,/పశుత్వం,విధ్వంసం,పక్క వాడి నిర్లక్ష్యం"-మున్నగు కారణాలు బయటవైనప్పుడు అంటే సంబంధితం కానప్పుడు సహజ న్యాయం కోసం ప్రశ్నిస్తాడు.ఏదో ఒక కారణం లేకుండా ఏవీ జరుగవు అనే కార్యకారణ సంబందాన్ని కవి ఇక్కడ ప్రస్ఫుటం చేస్తాడు. కవిని చూడ్డమంటే కవిత్వాభిమానులకీ వొక యిష్టం.తన వ్యక్తిత్వానికీ ఇష్టమైన బి.వి.వి ని చూడ్డమంటే యశస్వీ కి ఎంతో యిష్టంలాగుంది.అందుకే "ప్రశాంతమైన్ నిద్ర లేని రాత్రుల్ని వరంగా అందించిన వాడు/అలంకారాలు లేని అక్షరాలకు వ్యాపక శక్తి ప్రసాదించినవాడు/అతడెలా ఉన్నా..అ కళ్ళల్లో వెలుగును చూద్దామని వెళ్ళాను"-అని ఈ కవి అనటంలో కవి వ్యక్తిత్వాన్ని చిత్రిక పట్టే నేర్పు వుందని చెప్పోచ్చు."మతం మత్తుకు మధురసాల కైపు"ను పొందే హైద్రాబాద్ పాత బస్తీ నీ గూర్చి రాసిన కవితే "చార్మీనార్ ...చెంపన".పాపం, పుణ్యం ఏమి ఎరుగని చిన్నారులు సాన్వీ లాంటి పసిమొగ్గల్ని కిడ్నాప్ చేసి తుంచేస్తున్న అంశాన్నిఎంతో వేదనతో ఆ భగవంతున్ని "ఇదేం న్యాయం దేవుడా?"-అని తీవ్రంగా ప్రశ్నించిన కవిత "ఇదేం న్యాయం దేవుడా?" అనేది.ఉప్పుని ధనంగా చేస్తూ "సమన్వయం లేకపోతే జీవితం ఉప్పు లేని చప్పిడి మెతుకులు" అని చెప్పే కవిత"ఉప్ప ధనం". "భయ్యా! Diversity ఎక్కడ!!"-అనేది జీవ వైవిధ్య సదస్సులోని డొల్ల దనాన్ని వెల్లడించే కవిత.తాలిబాన్ల పిరికితనానికి బదులిచ్చిన అసలుసిసలైన జవాబు "మలాలా".మలాల ను "గుల్ మకాయ్" చేస్తూరాసిన కవిత ఇది.ఇలా ఎన్నో కవితలు( ఉన్న56లో) పాఠకుల తెల్లని మనసు మీద కవిత్వ రంగుల చిత్రాన్ని గీస్తాయి. ఈ సంపుటిలో ఎన్నో కవితలు నన్ను కదిలించినా,నన్ను బాగా వెంటాడి వేటాడిన కవిత,నచ్చిన కవిత "ఓ రైలు ప్రయాణం ".ఇష్టం లేని ప్రయాణాన్ని అయిష్టంగా కష్టంగా చేయించాడానికి రైలు రావాడాన్ని వొక అంతర్లీన దుఃఖంతో కంటిని చెలమగా చేసి రాశాడు యశస్వి సతీష్.ఈ కవిత చదివినప్పుడు కొప్పర్తి గారి "విషాద మోహనం"లోని "ఎంతెంత దూరం "అనే కవిత స్ఫురణకొచ్చింది.తన కిష్టమైన వాళ్ళని వదిలి వెళ్ళి పోతున్నప్పుడు పోవడానికి ఎంత అయిష్టపడతాడో,బయలు దేరాల్సిన క్షణం దగ్గరయ్యే కొద్ది సర్దుకున్నవే మళ్లి సర్దుకొంటూ,దువ్వుకున్న తలనే మళ్లీ దువ్వుతూ వుండే మానసిక స్థితిని,ప్రయాణాన్ని ఖరారు చేస్తూ రైలు వొచ్చి ఆగి నప్పుడు...కలిగే వేదనను కొప్పర్తి అద్భుతంగా చిత్రించాడు.ఇట్లాగే యశస్వీ కూడా "ఓ రైలు ప్రయాణం" వొక మంచి కవితగా నిర్మించాడు.యశస్వి కవితని కొప్పర్తి కవితతో పోల్చటం ఆయన్ని అనుకరించాడని కాదు."గుండెలు రెండూ లాగి వదిలిన స్ప్రింగ్ ల్లా గిలగిల లాడే" కవిత్వం యశస్వీ రాయగలడని చెప్పడానికే. "రాయడాన్ని ఎవరూ కాలరాయలేరు"-ఇట్లా పదాలతో ఆడుకోవటం యశస్వీ కూడా చేస్తాడు."పేపర్ తో తన మా నాన తానే"-ఇలాంటి వైచిత్రులు ఈ సంపుటిలో అనేకం."మనస్సాక్షి చెప్పినట్టు పేజీ చివర సంతకం చేసే క్షణమొకటి వేచి వుంది కాబట్టి ఈ పరిచయాన్ని ఇంతటితో ముగిస్తూ..యశ్వస్వి మంచి యశస్సుతో వొక మంచి కవి కాగలడని విశ్వసిస్తు....వచ్చే మంగళ వారం నన్ను బాగా కలవరపెట్టి కదిలించే "జీరో డిగ్రీ","నీ లాగే ఒకడుండేవాడు" ఏదో ఒక సంపుటితో కలుద్దాం.

by Rajaram Thumucharla



from kavi sangamam*కవి సంగమం*(Poetry ) http://ift.tt/1msK5nJ

Posted by Katta

Girija Nookala కవిత

ఉగాది క్రొత్త ఆశల ఆమని కోయిలా జయ గానాలు కూయవే క్రొత్త హద్దుల హ్రుదయపు ముంగిట రాగాల రంగవల్లి వేయవే అందాల జీవన రాగమాలికలో అపస్వరాలు రానీయకే అత్యాశలు,దురాగతాలు నీటిపై గతాలై కరిగిపోనీయవే కొమ్మకో గూడు.మనసుకో తోడు పూవుకో కాయపై ఊయలూగవే అవమానం లేని అతివ వైభవం పంచమంలో పలికించవే భారత భారతి రాజ్యపూజ్యము శుభ స్వరాలు సవిరించవే ఆనంద ఆదాయాలు ఆనందభైరవిలో వీనుల వేడుకగా వినిపించవే వ్యధలు వ్యయమై,వ్యవసాయం రైతు వరమై లాభాల రాగాలు పండించవే హిందోళ రాగాల సామజ గమనంతో పంచాంగ శ్రవణము చేయవే!

by Girija Nookala



from kavi sangamam*కవి సంగమం*(Poetry ) http://ift.tt/1ghpKwk

Posted by Katta

కోడూరి విజయకుమార్ కవిత

'కవిత్వం వేరే ఎక్కడో లేదు నిస్సహాయుడు నిరాయుధుడైన ఒక గిరిజనుడు లేదా ఒక దళితుడు మాట్లాడేదంతా కవిత్వమే తెలంగాణా లో ఒక గ్రామం చాలు లేదా మాన్య ప్రాంతంలో ఒక గ్రామం నా మరో జీవితం అక్కడే అని నా ఆశ' ------- అజంతా

by కోడూరి విజయకుమార్



from kavi sangamam*కవి సంగమం*(Poetry ) http://ift.tt/1ghpJZx

Posted by Katta

31, మార్చి 2014, సోమవారం

Kaaram Shankar కవిత

అమ్మ ఒక మహా కావ్యం కారంశంకర్ అమ్మ అనగానే అమృతం తాగినట్టుంటుంది! కలుషిత సమాజంలో కల్మషం లేనిది అమ్మ ప్రేమే కదా!! అమ్మ చుట్టు ఆలోచన లు పరిభ్రమిస్తున్న ప్పుడల్లా నేను పసివన్నై పోతాను !! నేనిప్పటికీ అమ్మ పాడిన జోల పాటల్లో ఉయలూగుతుంటాను అప్పట్లో అమ్మ పాల కమ్మదనాన్ని మగత నిద్ర లొనూ చప్పరించేవాన్ని! ఎప్పటికీ అమ్మ గర్భం ఓ వెచ్చని మందిరమే కదా! నిష్కల్మష నిలయమే సదా!! అమ్మా! నీ గుండెలపై చిట్టి పొట్టి కాళ్ళతో తన్నినప్పుడు ముగ్దు రాలివై నా కాళ్ళని కుడా ముద్దాడే దానివి! నన్ను చూసి మురిసిపోయి ముచ్చట్లాడే దానివి గుర్తుందా ...? నీ నోట్లో వేలు పెట్టి నే నాడుకున్నప్పుడు! కొసపంటితో నా చేతి వేళ్ళను మృదువుగా కొరికి గమ్మతులాడే దానివి! అమ్మా! నువ్వు అమ్మవి మాత్రమే కావు నా ప్రాణ స్నేహితురాలివి !! జ్యరమొచ్చి అల్లాడినప్పుడు నన్ను నీ గుండెలకు హత్తుకుంటే చాలు ! ఏ మందులు అక్కర్లేకుండా పోయేవి !! ఇప్పటికీ నిన్ను తలచుకుంటే చాలు! ఎంతో ఉపశమనం పొందుతాను!! అమ్మా నీ కళ్ళతోనే నా హృదయాన్ని ఎక్సరే తీసేదానివి అంతేనా ... నీ తల వెంట్రుకలతో దృష్టి తీసేదానివి ! నువ్విప్పటికి నా మానసిక గాయాల్ని స్వస్తత పరిచే సై క్రియా టిస్ట్ వి ! ఎన్నటికి చెరగని నా స్మృతి పతానివి నిన్ను తలచుకుంటే చాలు! ఏ గాయమైనా మాయమవ్వల్స్లిందే!! అమ్మా నువ్వో అద్బుత వాక్యనివి మహా కావ్యానివి !!

by Kaaram Shankar



from kavi sangamam*కవి సంగమం*(Poetry ) http://ift.tt/PaGNuo

Posted by Katta

Kavi Savyasaachi కవిత

మిత్రులకోసం..కొన్ని..మినీ..కవితలు... ఎప్పుడో రాసుకున్నవి.... 31/03/2014 ఖమ్మం ----- ఖమ్మం కళలకు గుమ్మం మతవిద్వేషాలనసలే నమ్మం ప్రేమ సుధాధారలమ్మం భరతమాత చరణాల విరిసిన చిరు సుమం ఖమ్మం అనూష ----- వసంతకోకిల గొంతుమూగవోయింది మావిచిగురెపుడో మాడిపోయింది కట్టుకున్న కలలసౌధం కూలిపోయింది అర్థరాత్రి అనూష రాలిపోయింది విభజన ----- జనామోదం మాకక్కరలేదు ఓటు..సీటు...మాకెంతో స్వీటు గుండెల్ని రెండుగా చీలుస్తాం మాతృభాష నాలికని నిలువుగా తెగ్గొస్తాం తెలంగాణ ------ నా తెలంగాణ తీగలు తెగిన వీణ రక్తాశృవుల రోదన తెగిపడిన వీరుల ఆక్రందన అన్నపు మెతుకుల ఆవేదన

by Kavi Savyasaachi



from kavi sangamam*కవి సంగమం*(Poetry ) http://ift.tt/PaGLCT

Posted by Katta