1
పంటకు కొట్టింది, పైరుకు వేసింది
ఎప్పటి లాగే కల్తీ మందు.
2
ఇంకా నయం చివరికి
విరక్తితో తాగిందైనా కల్తీ కాకుండా వుందనుకుంటే
ఎప్పట్లా అదీ కల్తీనే...
3
మరికొన్ని కార్పొరేట్‌ మందుల్ని
గొంతులోకి రక్తంలోకి పిచ్చి పిచ్చిగా
ఎక్కించి తుప్పొదిలించుకునేంత వరకు
కనీసం చంపనైనా లేకపోయింది.
4
పండించలేని తనానికి మూల్యంగా
మందుల ఖర్చుకై పొలాన్నమ్మినా చాల్లేదు.
5
ప్రభుత్వ సాయం ప్రకటించారని
పరలోకాన్నైనా చేరకుండా యింటి చెట్లకి వేళ్ళాడినా...
పెళ్ళాం పిల్లలు, అధికారుల కాళ్ళా వేళ్ళా బడినా...
దేవుని వరం ఏ పూజారి వద్ద ఆగిందో
కనీసం కనిపించనే లేదు.
6
మళ్ళొకసారి ఆత్మహత్య చేసుకునే అవకాశమూ లేదు.
చేసుకోకుండా స్వంత వాళ్ళని ఆపే శక్తీ లేదు.
ఛీ.. పాడు బతుక్కి చచ్చి సైతం సుఖం లేదు.
*06-08-2012
కామెంట్‌లు లేవు:
కామెంట్‌ను పోస్ట్ చేయండి