నరేశ్ కుమార్ ||‎ * ఓ కవీ * ||

ఓయ్... కవి మిత్రుడా...!
ఇంకెన్నాళ్ళు

ప్రేయసి గుండెల పైనే
నిద్రిస్తావ్...?
ఇటు రా...
అలా మనిషి గుండెళ్ళోకి
వెళ్ళోద్దాం

అన్నట్టు....
ఓపెన్ సెసేం మంత్రం గుర్తుందిగా....?
మనసు తలుపులని
తెరిచేందుకు

శృంగార శిల్పాలపై
కప్పిన
నీ చూపుల దుప్పటి
లాగెయ్
మరణించిన
శిల్పి దేహం పై
కఫన్ లేదిక్కడ..

అత్తరు కంపు కొడుతోంది నీ కలం
కాస్త
చమటతో శుభ్రం చేస్కో

గొంతులో
ఎడారుల్ని దాచేసి
అధరామృతాన్ని
తాగుతున్నావా.....!?

త్వరగా రా....
అక్కడెవరో మానవత్వాన్ని
మానభంగం
చేస్తున్నారు
కాపాడాలి....

ఎన్నళ్ళీ ముసుగుని భరిస్తావ్....?
నాతో
అంటుకట్టుకో
మనిషి గా మారితే
మేక తోలు అవసరముండదిక....
*07-08-2012