Kavi Yakoob కవిత

SELECTED READINGS ~ నూర్జహాన్ Posted on April , 2013 by ఇక్బాల్ చంద్ 1 ఉన్మాద ప్రణయ ఇతిహాసానికి తొలి పలుకు నేను- మర్మ సౌందర్యానికి చిరునామా నేను- అహంకారం నాకు అలంకారం- 2 జగద్విఖ్యాతమైన నాప్రేమ కథనంలో ఎవరూ తొంగి చూడలేని అర పేరు బీభత్సం - గాఢ నిదురలోంచి ఆకస్మికంగా మేల్కొని తప్పనిసరి నడుస్తున్నప్పుడు జలదరిస్తున్న దేహంలా సౌభాగ్యం నౌకను దౌర్భాగ్యం తుఫాను నడిపిస్తుంది 3 అంతః పురం పూతోట దీపాన్ని ముట్టించిన నేను లోక దివ్వేనైనాను- నే పాడిన భ్రమర గీతాలన్నీ భ్రమలేనా? నా కలలు యవ్వనం శిల్పీకరించిన విలాస మోహాల్ని కోట గోడలు చెరిపేసాయి - నా యవ్వనం, నెత్తురు రుచి మరిగిన బెబ్బులి బాహువుల్లో దాచిన గులాబి. లోక దివ్వెలోని ప్రేమ తైలం ఇంకి పోతుంటే ఇక నుండి రుధిరంతో వెలగమని విధాత ఎందుకు రాశాడో గాని స్వార్ధం నా మనోగాయాలకు మందు -పులిమి కసిరేపింది. 4 నా వొక్కొక్క వైఫల్యం నా లోలోన నిద్రిస్తున్న వొక్కొక్క శాంతి మందిరాన్ని ధ్వంసం చేసి పరిహసిస్తుంటే ‘యాసిన్ ‘ ను చదువుకొని నిప్పుపై నివురుని కప్పుకొన్నాను కాలం కోసం పొంచి చూస్తూ - అహం ఆకలి తీర్చడానికి అందం వల పరిచాను ఇక నేనో మంత్రగత్తెను , నా సౌందర్యపు బానిసే నాకు మంత్రదండం ఈ లోకం నా చేతిలోని ఆట బొమ్మ- 5 బహుశ రేపటి కాలానికి వొక స్మృ తి గీతమై మిగులుతాను, కాకపోతే - చిర్నవ్వుల నా తైల వర్ణ చిత్రాలు వొక పంట చేను రూపంలో నిర్జీవంగా గోడలకు వేలాడుతుంటాయి - వృద్ధ రసికులు చిత్తరువుల్లోని నా నిడు సిరి బుగ్గల్ని రహస్యంగా తడిమి తమకమవుతారు - చంచలమతి యువకులు దొంగచాటుగా నా పెదాలపై తమ పెదాల్ని ఆనించి మెరుపు తీగలౌతారు. గడప దాటలేని విరహకన్యలు దారి తప్పి సంచరిస్తున్న నేను విడిచిన మదన నిట్టూర్పుల్ని చలిమంటగా రగుల్చుకొని ప్రేమ చలిని కాగుతుంటారు . మరో సూఫీ మింగుతున్న నల్ల మందులో నా వెలుగును స్వప్నిస్తాడు ఇంకో కవి తాను తాగుతున్న మధుపాత్రకు నాపేరుతో పిలుచుకొంటాడు చివరికి నన్ను తాకక తప్పదని తెలుసుకొని మృత్యువు రోదిస్తుంది- నేను మాత్రం రోదసీ మండలంలో కాటుక వర్ణం మేలిముసుగు ధరించి ఇంకా దొరకని దాని కోసం వెతుకుతూ పిచ్చి గాలినై వీస్తూంటాను- 6 నేనొక నిప్పుని - ఆరిపోయిందాక నన్ను తాకిన ప్రతిదాన్ని రగిల్చాను- - ఇక్బాల్ చంద్ ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~http://ift.tt/1ienSM9

by Kavi Yakoob



from kavi sangamam*కవి సంగమం*(Poetry ) http://ift.tt/1ienSM9

Posted by Katta