కాశి రాజు ||ఎంతదైర్యం తనకి||

ఎంత దైర్యం
ఒంటరిగా
ఒక్కతే
ఈ ఒంటిగాడి ముందు
వొయ్యారంగా నడుస్తాదా?
అసలే పడుచువయసు
ఆపై గడుచుగాలి సోకినట్టుంది
గుచ్చి గుచ్చి చూస్తుండమని
గుర్తుచేస్తునట్టు
గబుక్కున తిరిగిచూస్తాదెనక్కి !

నాలుగడుగులు ముందుకేసి
నేనూ కలుద్దామనుకుంటానా!
ఇంతలో నీడై నా వెనకాలకొచ్చేస్తుంది
నాతో ఆడుకుంటుంది

చూడ్డంతోనే సరిపోదు
రాసుకుని ,పూసుకుని
రాజువై తిరగమంటుంది

దైర్యం చేసి అడుగుతాను తనని
నువ్వంటే నాకిష్టం
నీవైపోదామనుందంటాను

నా సమస్యే తన సమాదానం
అన్నట్టు చెప్పి
కవిత్వాన్ని కట్టుకున్న నా కల
తన దేహం పై
దండయాత్రకు దిగమంటుంది నన్ను
కలిపేసుకోడానికీ,
నాలో కలిసిపోడానికి
తనకెంత దైర్యమో !