కరణం లుగేంద్ర పిళ్ళై || మౌనవ్యథ ||

ఎన్నాళ్లని దాచుకోను
కంటిరెప్పలు అదిమిపట్టి
కన్నీటి బిందువులను
ఎంతకాలం ఓర్చుకోను
పంటి బిగువున అదిమిపట్టి
గుండె రేపుతున్న మంటలను
ఏమి చేసి చల్లార్చగలను
పిడికెడు గుప్పెట్ట మూసిపెట్టి
సలసలా రేగుతున్న నా ఆవేశపు లావాలను..
మౌనం ఫలదీకరణకు
అవమానం బహుమతయినప్పుడు
దానిని బతుకంటారా ?
విధేయత ,వినమ్రతకు
బానిసత్వం బలిపీఠమవుతున్నప్పుడు
దానిని జీవితమంటారా ?
విత్తు గింజెల కోసం అర్రులు చాచినప్పుడే
మన జాతి మరణించినట్టు
ఇంకా భయపడమంటావా ?
బతకడానికి భూమిని సెజ్ లకు అమ్ముకున్నప్పుడే
మన ప్రాణం కోల్పోయినట్టు
ఇంకా పోయేదేముంది?
మౌనం గోడలు బద్దలు చేసుకుందాం..
కరువు నేలలో రెండు విత్తనాలై మొలకెత్తుద్దాం
నింగికి శిరస్సులెత్తే జీవితాలకు అంకురం అవుదాం..

26-07-2012