పేజీలు

' నువ్వొక పచ్చని చెట్టయితే పిట్టలు వాటంతట అవే వచ్చి వాలేను'..!. ‎
సత్యవతి కొండవీటి లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
సత్యవతి కొండవీటి లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

14, జూన్ 2014, శనివారం

సత్యవతి కొండవీటి కవిత

నా హృదయం.... నిండా పచ్చటి ఆకులు...సన్నటి తీగలు...రంగు రంగుల పూలు రివ్వున ఎగిరే పిట్టలు ...నీలి నీలి ఆకాశం...ఏడు రంగుల ఇంధ్ర ధనుస్సు... చిటుకు చిటుకు వాన ...నేలంతా తడిసిన మట్టి వాసన...పొగడపూల చెట్టు...ఎర్రెర్రని అగ్నిపూలు...సువాసనల మొగలి పొత్తులు...గుత్తులు గుత్తులుగా సంపెంగ పువ్వులు...సాగర తీరాలు...కెరటాల సంగీతం...హోరెత్తే జలపాతం...హాయిగా సాగే సెలయేరు...ఆవరించుకుపోయే అడవులు...మహోత్తుంగ హిమాలయం...మా గోదారమ్మ...క్రిష్ణమ్మ..కావేరమ్మ..గంగమ్మ... తుంగభద్రమ్మ..నర్మదమ్మ...ఎన్నో ఇంకా ఎన్నెన్నో నా గుండె లో దాగున్నాయ్...అప్పుడప్పుడూ ఉప్పొంగుతుంటాయ్... నా ప్రియ నేస్తాలు...నా ప్రాణ సఖులు...నా ఆత్మిక నేస్తాలు...ఒకరా ఇద్దరా...అసంఖ్యాకం అపురూపం..అనితర సాధ్యం.... నా హృదయం నిండా ఇవే... నేను నా పని ...ప్రకృతి...పుస్తకాలు...నా ప్రాణ నేస్తాలు ఇంకేమీ లేవు ..ఇంకేమీ వద్దు కూడా... ఇన్నింటిని ఇముడ్చుకున్న నా హృదయ వైశాల్యం ఇంతే ఉంటుంది కదా !!!!

by సత్యవతి కొండవీటి



from kavi sangamam*కవి సంగమం*(Poetry ) http://ift.tt/1veM0B8

Posted by Katta

11, జూన్ 2014, బుధవారం

సత్యవతి కొండవీటి కవిత

ప్రతి చెట్టు నన్ను చూసి నవ్వుతున్నట్టే ఉంటుంది కొమ్మల చేతులు చాపి రా రా రమ్మని పిలుస్తున్నట్టే అనిపిస్తుంది దగ్గరకెళతానా.. పచ్చ పచ్చగా నవ్వుతూ నా కోసం రంగు రంగుల పువ్వుల్ని పరుస్తుంది ఒక రో నేలంతా పొగడ పూలను చిమ్ముతుంది మరో రోజు ఆకాశ మల్లెల్ని రాలుస్తుంది నాకు గుచ్చుకోకుండా మొగలి పొత్తుల్ని వేలాడ దీస్తుంది నా చుట్టూ సంపెంగలు,సన్నజాజులు,మల్లెమొగ్గలు పరిచి గల గలగా నవ్వుతుంది తలెత్తి చెట్టు పైకి ప్రేమగా చూస్తానా పువ్వులకి తోడుగా రంగు రంగుల పిట్టలు చెట్టు మీద కూర్చుని కంఠం సవరించుకుంటూ కమ్మటి పాటల కచేరి పెడతాయి కుహూ అంటూ కోయిల.. కిలకిలమంటూ చిలకలు ఎన్నిన్ని పిట్టలు ఎన్నెన్ని రాగాలు ఏక్తార వాయించే తోకపొడుగు పిట్ట టీ టీ అంటూ టీ కావాలని అరిచే నల్లపిట్ట తీక్షణం గా చూస్తూ కళ్ళని నేలకతికంచే గద్ద ఆకుపచ్చ చెట్టు మీద ఎంచక్కా కూర్చుని సంగీత కచ్చేరి చేస్తూ ఉంటాయి చెట్టు కింద నేను.. చెట్టుని పెనవేసుకుని చెట్టుని ప్రేమిస్తూ చెట్టునిఆరాధిస్తూ చిత్తరువులా...చిద్విలాసంగా....

by సత్యవతి కొండవీటి



from kavi sangamam*కవి సంగమం*(Poetry ) http://ift.tt/1uUQwET

Posted by Katta

29, మే 2014, గురువారం

సత్యవతి కొండవీటి కవిత

భక్తి, పూజ... దూరం దూరం ప్రేమ,స్నేహం...పారవశ్యపు పాలపుంతల్లో కి పయనం * పవిత్రత...అంటరానితనానికి రాచబాట అంటుకోవడం...విశాలత్వానికి పూలబాట * దేవతల్ని చేసేస్తే...ఓ పనై పోతుంది మనుషుల్లా చూస్తే మానవత్వం పరిమళిస్తుంది.

by సత్యవతి కొండవీటి



from kavi sangamam*కవి సంగమం*(Poetry ) http://ift.tt/1kNQhI4

Posted by Katta

18, మే 2014, ఆదివారం

సత్యవతి కొండవీటి కవిత

నగరం రోడ్ల మీద అడుగడుగునా అడ్డమొచ్చే గుళ్ళు దండం పెట్టబోయి బండొదిలేసి బొక్కబోర్లా పడ్డ వీరభక్తుడు గబుక్కున వెళ్ళి చెందిస్తే చెయ్యందుకోడు గురుడు టప టపా చెంపలేసుకుంటాడు వారేవా ఏమి భక్తి???

by సత్యవతి కొండవీటి



from kavi sangamam*కవి సంగమం*(Poetry ) http://ift.tt/1oDiMLy

Posted by Katta

17, మే 2014, శనివారం

సత్యవతి కొండవీటి కవిత

కనబడని ఎజండా బయటకుచూస్తే మెరుస్తూ మండుతున్న ఎండ కానీ...లోపలంతా ముసురు పట్టినట్టుంది చిన్న చిరుగాలి తగిలినా కళ్ళు వర్షించేట్టున్నాయ్ దృశ్యం వెంట దృశ్యం కళ్ళను కబ్జా చేస్తున్న ఫీలింగ్ కొన్ని రంగులు...మరికొన్ని పదాలు గుండెని చీలుస్తున్నంత కరకుగా అనిపిస్తున్నాయ్ నా అక్షరాలను నా వెనక నించి ఎవరో చూస్తున్నట్టుగా ఉంది నా దుస్తుల్ని ఎవరో జల్లెడ పడుతున్నత్తుగా ఉంది నా అలోచనల్ని ఎవరికో తాకట్టు పెడుతున్నట్టుగా అనిపిస్తోంది ఉండుండి నా స్వప్నం ఉలికి ఉలికి పడుతోంది కోట్ల మంది సంబరాలు ఎన్ని లక్షల గొంతుల్ని నొక్కేసాయో భయం నీడన ఎన్ని గుండెలు గడ గడ లాడుతున్నాయో కళ్ళు మిరిమిట్లు గొలుపుతున్న కార్పొరేట్ మీడియా కటిక చీకటి కోణాలను ఎందుకు చూపిస్తుంది ??? రాజకీయం,మతమౌడ్యం,మీడియా చింత్రంగా నా కళ్ళకి ఒకేలా అనిపిస్తున్నాయి కార్పొరేట్ ప్రపంచం చుట్టూ కేంద్రీకృతమవ్వబోతున్న పాలన ఇప్పటికే అంచుల్లో మునివేళ్ళ మీద నిలబడిన బడుగు జనం అతి త్వరలో ఈ కార్పోరేట్ల ధనదాహానికి సమిధలు కాబోతున్నారు కోట్ళాది రూపాయల్ని ఊరికే ఖర్చుపెట్టారా మరిన్ని కోట్లు దండుకోవడానికే కదా లాభాల వేటలో రాజకీయాన్ని నడిపించిన ధనస్వాముల కళ్ళకి కనిపించేవి కాసులే... అవ్వా పచ్చీ లాగా మోసుకొచ్చి అధికారం లో కూర్చోబెట్టడం వెనక కనబడని ఎజండా...నా కంటి మీదికి కునుకు రానీయకుండా చేస్తోంది.

by సత్యవతి కొండవీటి



from kavi sangamam*కవి సంగమం*(Poetry ) http://ift.tt/1kb5AKB

Posted by Katta

11, మే 2014, ఆదివారం

సత్యవతి కొండవీటి కవిత

(తల్లుల రోజట....అహా ఆహా హా...) గుప్పెడు అన్నం పెట్టండి చాలు . అమ్మంటే దేవతని అమ్మంటే అనురాగ మూర్తని అమ్మంటే ఆది శక్తని ఇంకా ఇంకా ఎన్నో బిరుదులు అమ్మ గోరు ముద్దలు తినకుండా అమ్మ లాలి పాట వినకుండా ఎవరైనా పెరుగుతారా అమ్మ గుర్తొస్తే..... గోరు ముద్దలేనా గుర్తొచ్చేది లాలి పాటలేనా గుర్తొచ్చేది అమ్మ ఒక చాకిరీ యంత్రమని అమ్మ ఒక నిశ్శబ్ద గీతమని అమ్మ ఒక సంక్షుభిత రూపమని పగలు రేయి తేడా తెలియని పనుల వలయంలో అమ్మొక తిరగలి, అమ్మొక చీపురు అమ్మొక చేట, అమ్మొక గాస్ స్టవ్ అందరి కడుపులూ నింపే అక్షయ పాత్ర తన కడుపు వేపు కన్నెత్తి కూడా చూసుకోదు కలో గంజో ఆమె కడుపు లోకి కన్న వాళ్ళ కట్టు కున్నవాళ్ళ కలల సాకారమే ఆమె నిరంతర కృషి అమ్మతనపు ఆత్మీయతని అన్నంలో కలిపి తినిపిస్తుంది కట్టుకున్న వాడు అహరహం నరనరాన్ని నలుచుకుతింటున్నా చిరు నవ్వుని పెదాలకి అతికించుకుంటుంది తన గుండెల్లో గునపాలు దిగుతున్నా పంటి బిగువున బాధని ఓర్చుకుంటుంది పిల్లల కోడిలా బిడ్డల్ని గుండెల్లో దాచుకుంటుంది ఇంత చేసి............... రెక్కలొచ్చిన పిల్లలు తలో దిక్కూ ఎగిరిపోతే గుండె చెరువై కూలబడుతుంది అమ్మంటే దేవతని అన్నదెవరురా సిగ్గుపడాలి మనం ఆ మాట అన్నందుకు దుఖపడాలి మనం నగ్న సత్యాలు చూసి అమ్మని దేవతని చేసిన చోటనే అడుక్కుంటున్న ఈ అమ్మలెవరో మరి ట్రాఫిక్ సిగ్నల్ల దగ్గర... రోడ్ల కూడళ్ళ దగ్గర అత్యంత దీనంగా అడుక్కుంటున్న ఈ గాజు కళ్ళ అమ్మలందరూ దేవతలేనంటారా??? వృద్ధాప్య కేంద్రాల్లో శూన్యంలోకి చూస్తూ కుమిలిపోయే అమ్మలందరూ దేవతలు కాదా!!! అమ్మ మనిషి, అమ్మకి అన్నం కావాలి అమ్మకి ప్రేమ కావాలి అమ్మకి మందులు కావాలి అమ్మకి బట్టలు కావాలి అమ్మకి అన్నీ కావాలి అమ్మంటే దేవతని ఒట్టి మాటలొద్దు గోరు ముద్దలు తినిపించిన అమ్మకి గుప్పెడు అన్నం పెట్టండి చాలు...

by సత్యవతి కొండవీటి



from kavi sangamam*కవి సంగమం*(Poetry ) http://ift.tt/1jN85T2

Posted by Katta

7, మే 2014, బుధవారం

సత్యవతి కొండవీటి కవిత

ఫ్రేముల్లో బిగించిన ముఖాలకి ఎన్ని టచప్ లిచ్చినా ఏం లాభం లేదు గుండెల్లో ప్రేమను వెలిగించి చూడు నీ ముఖమే కాంతి మండలమౌతుంది పై పైన పూసే ఫేషియల్ క్రీములు లోలోపలి చీకటి కోణాలను క్లీన్ చెయ్యలేవు ఎన్ని నగల్ని దిగేసుకునీ ఏంటి లాభం ముఖాన వెలగాల్సిన నవ్వు నగ లేకపోయినప్పుడు..

by సత్యవతి కొండవీటి



from kavi sangamam*కవి సంగమం*(Poetry ) http://ift.tt/1fSlxpD

Posted by Katta

7, ఏప్రిల్ 2014, సోమవారం

సత్యవతి కొండవీటి కవిత

నిన్నటి దుఖం.... ఇంకెక్కడిది... కళ్ళల్లోంచి జారిపోయిందిగా. సంతోషం.. నాలోంచి నన్ను దాటి నీలోకి ప్రవహించిందిగా నా ప్రేమ నన్ను చీల్చుకుని నీ వేపు పయనమైపోయిందిగా నా స్నేహం నా చుట్టూ పచ్చదమై నీ కళ్ళను చేరిందిగా ఇప్పటి వేదన ఇంకాసేపట్లో ఉండదుగా ఎంత గాఢమైన దుఖమైనా మనసు లోతుల్లో మకాం వెయ్యదుగా ఏదీ శాస్వతంగా నిలిచిపోనప్పుడు మార్పు మాత్రమే శాస్వతం కదా!!! నా అడుగులెప్పుడూ మార్పు వైపే నా ఆలోచనలెప్పుడూ నవ్యత వైపే!!!

by సత్యవతి కొండవీటి



from kavi sangamam*కవి సంగమం*(Poetry ) http://ift.tt/1ii030a

Posted by Katta

15, మార్చి 2014, శనివారం

సత్యవతి కొండవీటి కవిత

మనలో ఉప్పొంగే ప్రేమనంతా ఒక్కరి మీదే కుప్పపోస్తే... మహా ముప్పు.... ప్రపంచమంతా వెదజల్లితే... చుట్టూ పచ్చటి ప్రేమ వనాలే...పరిమళించే ప్రేమ పుష్పాలే.

by సత్యవతి కొండవీటి



from kavi sangamam*కవి సంగమం*(Poetry ) http://ift.tt/1eCRtI3

Posted by Katta

10, మార్చి 2014, సోమవారం

సత్యవతి కొండవీటి కవిత

అలజడులు...నా అంతరంగపు ఆనవాళ్ళు నిన్నటి జ్ఞాపకాలు రేపటి భయాలు ప్రస్తుతాన్ని ఆస్వాదించనీయవు నిన్న ఎటు పోయిందో తెలియదు రేపు వస్తుందో రాదో అస్సలు తెలియదు మన ముందున్నది ఈ రోజే రేపు ఉన్నదిలే....ఏమో!! ఒక్కో సారి ఆ రేపు రాకపోవచ్చు కూడా మధురమైన జ్ఞాపకాల మధుభాండం ఈ గుండె... ఏ క్షణమైనా భళ్ళున పగిలిపోవచ్చు జీవితానికి అర్ధం బతకడం కాదు అర్ధవంతంగా అందరి కోసం జీవించడం

by సత్యవతి కొండవీటి



from kavi sangamam*కవి సంగమం*(Poetry ) http://ift.tt/1fZ3rLq

Posted by Katta