రాత్రంతా వాన కురుస్తూనే ఉంది
గుండె ఆవరణ మంతా తడిసి ముద్దయ్యింది
కరుడు కట్టిన మేఘాలు కరిగి నీటి చుక్కలుగా కురిసాయి
ఘనీభవించిన హృది వేదన కరిగి కన్నీటి గా కురిసింది
రాత్రంతా వాన ఆగలేదు ...
అవనిని తడుపుతూనే ఉంది
కన్నీళ్ళూ ఆగలేదు చెక్కిళ్ళను తడి చేస్తూనే ఉన్నాయ్
ఒక్క చల్లని గాలి కెరటం ఎంతటి మేఘాన్నైనా కురిపిస్తుంది
ఒక్క చల్లని మాట మనసును రాగరంజితం చేస్తుంది
అయినా ఆ ఒక్క మాట కోసం ఓ మంచి మాట కోసం
ఎదురుచూస్తూనే జీవితం గడిచి పోతోంది
రాత్రంతా వాన తడుపుతూనే ఉంది
నేలని , మనసుని ...
అనునిత్యమూ ఆరాధించే ధరణి పై ఎంత కరుణ గగనానికి
అనవరతమూ అనురాగించే నా పై ఎంత కినుక ఆతనికి
అనురాగం అపహాస్యమేనా ??
రాగ సుధలు ఎండమావులేనా??
ఏమో .... ప్రేమించే మది మాత్రం తపం వీడదు
నిరీక్షించే ధాత్రి దీక్ష ఆగదు
రాత్రంతా ఆగకుండా కురుస్తూనే ఉంది వాన
పైనా ...లోనా ...ఆగలేదింకా ..
*12-08-2012
కామెంట్‌లు లేవు:
కామెంట్‌ను పోస్ట్ చేయండి