మోహన్ రుషి ||ఒకరోజున..!||

కడుజాగ్రత్తగా ఉంటాననీ
అపురూపంగా చూసుకుంటాననీ
అపార్థం చేసుకోననీ
అనర్థాలకు కారణం కాబోననీ చెప్పాను!

కేవలం వినడం చేస్తాననీ
చూపుని నిశితం చేసుకుంటాననీ
కరుణతో మెలగుతాననీ
కళ్ళల్లో తడిని కాపాడుకుంటాననీ చెప్పాను!

శుభ్రమైన మనసుతో చరిస్తాననీ
చిరుదుఖ్ఖానికైనా చలిస్తాననీ
బలమైన కాంక్షతో కౌగిలించుకుంటాననీ
బంధానికి అంతులేని అనురాగం అద్దుతాననీ చెప్పాను!

కిటికీలు తెరిచి ఉంచుతాననీ
గదులన్నీ ఖాళీగానే అట్టిపెడ్తాననీ
వెలుతురును నిలుపుకుంటాననీ
వెన్నెలనే కురిపిస్తాననీ చెప్పాను!

చేతిలో చెయ్యి వేసి
తన ప్రాణానికి నా ప్రాణం అడ్డువేస్తానని
జీవితంతో చెప్పాన్నేను!

27-08-2012