మెర్సీ మార్గరెట్॥పాదాల భాష॥

పాదం పాదాన్ని ప్రశ్నించింది
నేను నీకు ఇష్టమా ?
అటుగా మళ్ళిన దాన్ని
ప్రేమతో మెలివేసుకొని తడుముతూ

అడిగే ముందు ఆలోచించవా ?
కసిరింపుతో ఇటువైపు మొహం తిప్పుతూ
గోరుతో గిల్లి
ఇంకోసారి పిచ్చిగా
అడగొద్దని విడిపించుకుంది
పక్కకు జరుగుతూ

ఓటమి గెలుపు
ఇద్దరికి ఒకటేగా ఎప్పుడూ
నువ్వు ముందు నేను వెనక
అంతేగా తేడా అలకెందుకు
సమమే లేకుంటే
ఎలా నడవగలం
నడపగలం ముందుకని
తనపక్కనే ఆనుకొని
పచ్చగడ్డిపై ముందూ వెనక్కి జరుగుతూ
ఆటలాడుతూ

అపుడెప్పుడో కాలుకు గాయమై
నువు విలవిల లాడితే
తెలుసా తట్టుకోలేదు మనసు
అందుకే నిన్ను తగలకుండా
ఉండిపోయా దూరంగా నిన్ను
చూస్తూనే ప్రేమిస్తూ

అవును ఎన్నెన్ని పరిస్థితులో
నాకు నువ్వు తోడుగా
ఎన్ని పారవశ్యాలో
నాతో పాటూ నీవుగా రమించిన
సమయాల్లో

నా నవ్వులో కన్నీళ్ళలో
నా అడుగులో అలకల గొడుగులో
నువ్వు నేను -నేను నువ్వు
వేరు వేరు ఎప్పుడూ కాదంటు

పచ్చ గడ్డి సాక్షిగా
మెలికలో కాళ్ళ ముడుచుకోలులో
ప్రేమగా రెండు దగ్గరి తనంలో
పరవశిస్తూ
ఒకదాన్ని ఒకటి అనుసరిస్తూ
అడుగుల లెక్కలు వేసుకుంటూ
మరో ప్రయాననికి సిద్ధపడుతూ
కదలికలకి కాళ్ళకి వాటిని
అప్పగిచుకున్నాయి....

మనలాగే జీవన ప్రయాణంలో
ఇద్దరిలో ఒక్కరిగా ♥♥
*21.7.2012