సురేష్ వంగూరి॥గజల్॥

చిరునవ్వై నడుస్తుంటే చుట్టుమూగి చూడాలి
పాటై రవళిస్తుంటే చేతలుడిగి చూడాలి

అలల తలలు అణచుకుంటూ ఈదడానికేముంది
తీరమెంట నడుస్తుంటే సంద్రమాగి చూడాలి

ఉన్నతాలు ఎగబ్రాకే గెలుపులోన ఏముంది
నేలపైన మెరుస్తుంటే శిఖరమొంగి చూడాలి

సంతృప్తే మకుటంరా స్నేహితులే స్వాస్థ్యమ్ రా
సిరులు కోరి వస్తుంటే దూరమరిగి చూడాలి

బితుకు బితుకుమంటూనే బతకాలా వంగూరీ
మరణం దరికొస్తుంటే ఎదురుకేగి చూడాలి

 

*3.8.2012