వంశీదర్ రెడ్డి || ‎‎*అమాయకుడు* ||

అంతా పిచ్చోడంటున్నారు,
మీలా మామూలోణ్ణే ..
రెండేళ్ళ క్రితం మూర్ఛొచ్చి పడేసింది,
స్పృహొచ్చాకా ఇక్కడున్నా,
ఇపుడు బైటికెళ్తున్నాననుకోండీ,

- "హలో, కంట్రోల్ రూం,
ప్రమాదకరమైన పేషెంట్ తప్పించుకున్నాడు,
గది కిటికీలు రూమ్మేట్ తలతో పగలగొట్టి,
ఎలా ఉంటాడా, ఆమయకంగా కన్పిస్తాడు చూడ్డానికి"

ప్రేమించి పెళ్ళాడిన భార్య, సౌఖ్యాలకాశపడి
పై అధికారితో తో గడుపుతుంటే,
అడ్డొచ్చిన్నన్ను
పిచ్చోడ్నని చెప్పి...
జరిగిందేమని చెప్పను, ఎవర్తో చెప్పను,
వాళ్ళని చంపి లోకమంతా విన్పించేట్టు నిజం చెప్పాలనుంది,

-"హలో, పోలీస్టేషన్,
ఇక్కడొకర్ని చంపాడొకడు,
చాలాసేపేదో మాట్లాడాడు శవంతో,
పిచ్చొడా? చూడ్డానికమాయకంగా ఉన్నాడ్సార్"

ఆకలి తగ్గింది, అది బ్రతికే ఉందింకా
నాకేం సరదానా, చంపడం,
రెండేళ్ళు
రోజూ కరెంట్ షాకిస్తూ,మింగించిన మందులకు
మగాణ్ణని మర్చిపోయి,
భయపెట్టే మృగాల మద్య ఒంటరిగా ఉండడం,
మనుషులపై ఎంత కసి పెంచుతాయో..
నిన్ను, పై ఇంటికి పంపడానికొస్తున్నానే మనింటికి..

-"ఎవర్నువ్వు, ఎందుక్కొడ్తున్నావ్, హా, అమ్మాహ్"
నా రక్తం పీల్చిన నీ రక్తం తాగడానికి,
తలా, మొండెం వేరయ్యేంతవరకూ
పోలీసులొచ్చి ఆపేంతవరకూ
కత్తి తన పన్తాను చేస్తూనే..

"డాక్టర్, ఆ పేషెంట్,
కుటుంబం, భార్యా అని కథ చెప్పాడింటరాగేషన్లో "
ఏం జరుగుతుందో అర్ధం కాని సర్కిలినిస్పెక్టర్
నాలుగోసారి టీ తాగుతూ..

"అసలు పెళ్ళైతే కదా,
వాడో "డేంజరస్ స్కిజోఫ్రీనియాక్",
జూదమాడొద్దన్నారని
తల్లి, తండ్రి, అన్న వదిన్ని, ఇద్దరు పిల్లల్ని
ఘోరంగా చంపాడారేళ్ళక్రితం,
అప్పట్నించి ఈ అసైలమ్ లోనే పెట్టాం "

"సార్,
నా పిల్లలేడుస్తారు నేను కన్పించకపోతే,
ఇంటికి పంపరూ",
చూసేవాళ్ళ గుండె కరిగేలా వాడు..
అమాయకంగా..
*30-07-2012