మోహన్ రుషి //ఎక్కడ?!//

నిన్ను నిన్నుగా గుర్తించినవారు
నువ్వు కాక లోకం లేదన్నవారు
నీతోనే ప్రపంచం అన్నవారు
మాటల్తో స్వర్గం చేసినవారు
నీ మనసు దుర్గాన్ని జయించినవారు
నిన్ను వొంటరిని చేసి
వొదిలేసి వెళ్ళినప్పుడు
నువ్వేం చేస్తావ్?!

ఆశలకు ఆధారంగా నిల్చినవారు
నిరీక్షణకు తెర దించినవారు
హృదయాన్ని సుతిమెత్తగా మీటినవారు
గొంతులోని కొత్తభాషకు కారణమైనవారు
మనసులోని మరో ప్రపంచపు ద్వారం తెరిచినవారు
మత్లావ్ చెప్పకుండా
మాయమైపోయినప్పుడు
నువ్వేమైపోతావ్?!

సంతోషానికి సారథిగా నిల్చినవారు
ఆనందానికి అడ్రస్ గా మారినవారు
గుండెలకు హత్తుకున్నవారు
లోకం గునపాలకు వెరవనివారు
ప్రేమతప్ప ఎరుగనివారు
ఫేంచ్ కట్ అయిన పతంగిలా
చెప్పాపెట్టకుండా చెక్కేసినప్పుడు
నువ్వెక్కడ రోదిస్తావ్?!

గుండెల్లోనా? గురుతుల్లోనా?
జ్ఞాపకాల సమాధుల్లోనా?
సత్యలోకపు దారుల్లోనా?!

*23-08-2012