పులిపాటి గురుస్వామి || జీవితానికి దారి ఎటు? ||

మనల్ని మనం
మౌనాంగాలతో భర్తీ చేసుకోలేం


ఇంకా మిగిలిన
అంటుకు పోయిన మూలల్ని
గాలికే వదిలేస్తాం

ఒకర్నొకరు
సమస్య చేత గుర్తించబడతాం

ఇంకా దాగిన
రోజు రోజు అలిసిన క్షత క్షణాల్ని
నిర్లిప్త దుప్పటి కింద తోసేస్తాం

నువ్వు నేను
చెల్లా చెదురు అంశాలతో కలుపబడతాం

ఇంకా మనకంటిన
కొందరి నమ్మకాలకు దిమ్మిస వేసుకుంటూ
మనుషుల్లో నిమజ్జనం చేసుకుంటూ

*03-08-2012