క్రాంతి శ్రినివాసరావు || చీకటి దీపం ||

ఆకాశం చీకటి దీపం ముట్టించి
వెలుగును వెళ్ళగొట్టేదాకా
వేయుకళ్ళతో వేచిచూసి

వంటినిండా
కప్పుకున్న
సిగ్గును బిడియాన్ని
కొద్ది కొద్దిగా
వొలుచుకొంటూ

చీకటి పరదాలను
చుట్టూతా కట్టుకొని
చెవులను కాపలాగా పెట్టి
శబ్దాల దూరాలను
కొలుచుకొంటూ

తొట్టి పక్క బండపై
తొట్రుపాటుతో కూర్చొని
చప్పుడు దగ్గరయునప్పుడల్లా
చప్పున చీరను
వంటినిండా పోసుకొంటూ

భయం భయం గా
నీరును చీరను
మార్చి మార్చిచల్లుకొంటూ

దేవుళ్ళకు మొక్కుకొంటూ
దేహాన్ని తడుపుకొనే తల్లులు
దేశం నిండా వున్నారు

ద్యానం లా చెయ్యాల్సిన స్నానం
మానం కాపాడుకొంటూ ముగిస్తున్నారు

కాస్తంత చాటును ఇవ్వలేం కానీ
ఆకాశం లో సగం చోటిస్తామంటాం