రావి రంగారావు ( గుండె రాయి )

పొలం గట్టు గుండె
ఎలా కొట్టుకుంటుందో తెలుసా...
కన్న నేలను
ముక్కలుముక్కలుగా విడగొట్టుకుంటున్నానని !

కుండ గుండె
ఎలా కొట్టుకుంటుందో తెలుసా...
జీవన మృత్యు సారం సారాను
ఒళ్ళంతా నింపుకోవాల్సివస్తుందని...

కుండీ గుండె
ఎలా కొట్టుకుంటుందో తెలుసా...
పంటలు పండించలేని పచ్చదనాన్ని
నెత్తిలో దించుకొని మోయాల్సివస్తుందని...

తుపాకీ గుండు గుండె
ఎలా కొట్టుకుంటుందో తెలుసా...
ఎప్పుడు ఏ అమాయకుడి దేహవనంలో
మత్తగజంలా పడి ధ్వంసం చేయాల్సొస్తుందని...

“జెండా” సీత గుండె
ఎలా కొట్టుకుంటుందో తెలుసా...
ఎపుడు ఏ వేషంలో వచ్చి
ఏ రావణ హస్తం తనను అవిష్కరిస్తుందని...

ప్రపంచాని కంతా గుండె కొట్టుకుంటోంది-
“గుండె” ఉన్న ఈ మనిషికి తప్ప !