పేజీలు

' నువ్వొక పచ్చని చెట్టయితే పిట్టలు వాటంతట అవే వచ్చి వాలేను'..!.

18, ఆగస్టు 2012, శనివారం

రియాజ్||వీక్షణలు||


1.
కొలనూ నేనూ ఒకటేనేమో?
ప్రవహిస్తూ తీరం తాకేలోపు
ఎన్ని జనన మరణవీక్షణలో
భావప్రవాహంలో కొట్టుకుపోతూ
మృత్యువాతపడ్డ
స్పష్ట అస్పష్ట ఆలోచనల్లా!!
నిత్యంచస్తూ బ్రతికినట్లుండే దేహంలా!!!

2.
మావూరి
మెలికలు తిరిగిన పిల్లకాలువా
దానిగట్టున వయ్యారి
ఒంపుసొంపుల
తుమ్మచెట్టూ
అచ్చు ఇలియానాలా
గుచ్చుకుంటూ...

3.
ఆ కాలువ
నన్నేమీ పట్టించుకోవట్లేదు కాలంలా
వాటిపనేదో అవి చూసుకొంటూ
వెళ్ళిపోతూ అలలు..
నా కళ్ళలో కలల్లా...
ముగింపెక్కడొ తెలియని
తీరంవరకు సాగని అంతర్ధాన దృశ్యాలు
వీక్షిస్తూ గట్టుపై నేను

4.
మా ఊరి ఆనకట్ట బావి మౌనందాల్చివుంది
చాన్నాళ్లయింది దానిబుగ్గల్లో సిగ్గులుచూసి
ఎగిరి గంతువేశా!
పరవశం ఆమెలో..నాలో...!!!

5.
పట్టపగలు మిట్టమధ్యాహ్నమైనా..
మా వూరి చెరువు
కళ్ళనిండా ఒంటినిండా
పళ్ళనిండా మిరుమెట్లుగొలుపుతూ నక్షత్రాలు
కాంతులు విరజిమ్ముతూ కాంతిపుంజాలు
నాలో ఏదో వీక్షణా సృజనావేశం మేల్కొంది!
బహుశా భావుకత అంటే ఇదేనేమో?!
6.
సూర్యుడికి కోపమొచ్చింది
తన వేడిహస్తాలను చాస్తూ...
తలను నిమురుతున్నాడో
శపిస్తున్నాడో
ముఖంపై కాసింత చెమటచల్లి
చిరాకుతో వెళ్ళిపోతున్నాడో?
7.
దేహం మేల్కొంది
పురిటిబిడ్డలా
కానీ మనసే బూడుకొనిపోయి ఉంది తవ్వలేని సమాధిలా
బూజుపట్టిన గుహలా
బహుశా మనసుకు లోతైన వెలుగులు కావాలేమో?
చీకటిని లోతుగ త్రవ్వే చైతన్యపు గునపాలు కావాలేమో ?
గడ్డకట్టిపోయిన ఉద్వేగాలను ద్వంసం చేసే
సరికొత్త సృజన లావాగ్ని కావాలేమో?
 
*18.8.2012

కిరణ్ గాలి || ఆకాశం ||


ఈ రోజు ఆకాశాన్ని చూసాను
అదే పనిగా తదేకంగా చూసాను

వంద చుక్కలు లెక్క గడదామని
మొదలు పెట్టిన వాడిని
రాలుతున్న తోక చుక్కలను చూసి
అమాంతంగా పట్టుకొవాలని
అంతులేని పరుగులెట్టాను

ఆ ఉరుకులో
ఎన్ని నడకలు నేర్చాను
ఎన్ని ఓటములు జయించాను
ఎన్ని తపస్సులు ఫలించాను

***

ఈ రోజు ఆకాశాన్ని చూసాను
అదే పనిగా తదేకంగా చూసాను

వెలుతురిని ఆర్పేసి
చీకటిని వెలిగించి చూసాను
శబ్ధాలను నిశ్శబ్దించి
అనంతాలను శొదించాను

సప్త ఋషులను కలిసాను
పాల పుంతలను ఈదాను
అంగారకుడిని కలిసాను
అరుంధతినీ చూసాను

***

ఈ రోజు ఆకాశాన్ని చూసాను
అదే పనిగా తదేకంగా చూసాను

అకాశమే జీవితమని
అనుభందాలే గ్రహాలని
అనుభూతులే నక్షత్రాలని
నేర్చుకున్నాను

కళ్ళు మూస్తే కనిపించేదంతా
శూన్యమని కనుగొన్నాను
కళ్ళు తెరిస్తే కనబడనిది కుడా
శ్రుష్టే అని తెలుసుకున్నాను

శాపవిముక్తిని పొందాను

***

మబ్బులు మౌనంగా దారి
విడిచాయి
చంద్రుడు చెంపల మీద రాల కుండానే
గుండెలోకి ఇంకిపొయాడు
 
*18.8.2012