అవును, ప్రస్తుతం మేం
మీ కాళ్ళ కింద నలుగుతూన్న చలిచీమలమే,
రేపు ధనగర్వ సర్పాన్ని పట్టి పల్లార్చే
సాముహిక శక్తి మేమే...
అవును, ప్రస్తుతం మేం
అక్కడక్కడా పడివున్న గడ్డిపోచలమే,
రేపు అధికార మత్తగజం పెడరెక్కలు విరిచికట్టే
వెంటిమి మేమే...
అవును, ప్రస్తుతం మేం
చెల్లాచెదురుగా ఉన్న చిన్న చిన్న నక్షత్రాలమే,
రేపు చీకటి వ్యవస్థను సమూలంగా పెళ్ళగించే
సమైక్య సూర్యబింబం మేమే...
ఇదంతా పాత కథ గానే ఉంది నిజమే
ఓ కొత్త నిజం కూడా తెలుసుకో,
మీరు విసిరే వడగాడ్పులలో మా ఆలోచనల బీజాలు
గాలిలో కొట్టుకుపోతున్న మాట నిజమే ,
అనుకూల వర్షాలు వస్తాయ్...
రేపు భూమ్మీద ఎక్కడ చూచినా మా మొలకల ములుకులే...
కామెంట్‌లు లేవు:
కామెంట్‌ను పోస్ట్ చేయండి