జయశ్రీ నాయుడు || నీ ఉనికి ||

నువ్వు అంటేనే ఉలిక్కి పడే మనసు
గతి తప్పే గుండె వూసు..
రెంటికీ సంధి కుదిరిందేమో

నీ తలపు వచ్చి పలకరించినా
ఉలుకూ పలుకూ లేకుందీ...

కలలు కలం లో ఇంకి పోయాయి
సిరా లేని వ్రాతే మిగిలింది
సాక్షిగా

కళ్ళేమో
గగనాన్ని నింపుకుని
దిక్కులొద్దన్నాయి

వాకిళ్ళలో
ఎవరు నింపి వెళ్ళారో
తెలియని రంగవల్లులు

మాటల్లో మౌనం
మౌనం లో అంతర్ముఖం
అంతర్లీనమైన
ఆలొచనం

నువ్వు నువ్వుగా లేవు
నాలో భావానివయ్యావు
నీ ఉనికితో నాకేం పని ఇక

మేనులను దాటిన అనంతం
దిక్కుల్ని ధిక్కరించిన గగనం
నాలో నేనంతా ఇక నీలో నేను.

*29-07-2012