పేజీలు

' నువ్వొక పచ్చని చెట్టయితే పిట్టలు వాటంతట అవే వచ్చి వాలేను'..!.

31, జులై 2012, మంగళవారం

పులిపాటి గురుస్వామి || ధ్యానజీవులు ||

ఏమీ తోచనివ్వనిదనుకున్న
సాయంత్రాన్ని కూడా
నీ కోసం ప్రార్ధించుకోవడానికి
అలంకరించుకుంటాను

ఓ చిత్తు కాగితం తీసుకొని
నా చేతితో నీ జ్ఞాపకాన్ని రాసి
పవిత్రపరుస్తాను

నా చుట్టూ పెనవేసుకుపోయిన
ప్రతిదీ నీ చేరువకి కదిలిస్తాను
దీపం దగ్గర ఏదైనా ప్రకాశిస్తుంది కదా!

నన్ను కొన్ని ఆలోచనలు కూడా
ఎక్కడో పడవేస్తాయి
కొంత సమయం తర్వాత గానీ
అక్కడికెందుకొచ్చిందీ తెలియదు

కొందర్ని ఎందుకు కలుస్తామో కూడా
అప్పుడే తెలియక పోవచ్చు
వాళ్ళు నాటుకున్నాక.....కొంతకాలానికి
ఓ పరిమళపు స్పర్శ
బహుశా కలయికల సారం
మొగ్గలు తొడగవచ్చు

అయితే...విత్తనాలు నాటిన స్నేహాలు
పవిత్ర ధ్యాన మందిరాలు
నీవంటివే.
*30-07-2012

కామెంట్‌లు లేవు:

కామెంట్‌ను పోస్ట్ చేయండి