శాంతిశ్రీ శాంతి || అయితే ఏం చేద్దాం? ||

బతుకుల నిండా కష్టాలున్నాయి
పేదలందరికీ బాధలున్నాయి
అయితే ఏం చేద్దాం?
ఓ సూర్యోదయాన నిర్ణయించేద్దాం
ఒక్కసారి పోరాటాల వెలుగులో కలబోసుకుందాం
ఆ కష్టాలన్నీ పంచుకో వెచ్చని వెలుతురులో..

పల్లెల నిండా కోకోకోలాలున్నాయి
రైతులందరికీ రుణాలున్నాయి
అయితే ఏం చేద్దాం?
ఓ వానచినుకులా ఆలోచించేద్దాం
ఒక్కసారి అందరం కలిసి చేయిచేయి కలుపుదాం
ఆ చినుకులన్నీ కలిసి ఏరులైన ప్రవాహంలో..

పట్టణాలంతా సంస్కరణలున్నాయి
ప్రజలందరికీ భారాలున్నాయి
అయితే ఏం చేద్దాం?
ఓ పసిపాపలా నిక్కచ్చిగా అడిగేద్దాం
ఒక్కసారి అడుగు ముందుకు కదుపుదాం
ఆ అడుగులన్నీ కదిలే మహౌద్యమ ప్రదర్శనలో..

ప్రపంచమంతా ప్రకోపాలున్నాయి
విశ్వజనావళికీ వెతలున్నాయి
అయితే ఏం చేద్దాం?
ఒక్కసారి వెల్లువలా ఎగసిపడదాం
ఆ వెల్లువ ఉధృతిలో..
ఈ దోపిడీకి మూలమైన వ్యవస్థను ముంచేద్దాం..!
ప్రత్యామ్నాయ వ్యవస్థను నిర్మిద్దాం..!!

*30-07-2012