క్రాంతి శ్రీనివాసరావు || సూర్యుణ్ణి పొయ్యులో పెడదాం ||

ఒరేయ్
నాలుగు నిప్పులు పోయండ్రా
సూర్యుని నెత్తిమీద

వాడికేమొచ్చిందో
పొడ అగ్గి రూపంలో
కొంపలో జొరబడి
వున్న కాస్త చాటును
చెరుకు గడలా నమిలేస్తున్నాడు

వెళ్ళిపో పొద్దికవద్దన్నా వినకుండా
ఎండాకాలం ఎక్కువసేపుంటుంటుంటాడు
వడ దెబ్బలు కొట్టి మరీ
పెడబొబ్బలు పెట్టిస్తుంటాడు
అందుకే నాలుగు నిప్పులు
పొయ్యండిరా వాడి నెత్తిమీదా

శీతాకాలా మొచ్చినప్పుడు
శీఘ్రంగా వెళ్ళిపోతుంటాడు
నిశి ని మరికొంచెం సాగదీసి
నిశ్సిగ్గుగా చలి కౌగిట్లోకి
నన్ను నెట్టి పక్కకు తప్పుకొంటున్నడు

వర్షాకాలమొచ్చినప్పుడు
ఎటొచ్చీ బయటకురామని తెలిసి
పడుతున్న చినుకుల మద్య
వయ్యరంగా నడుస్తూ
వర్ణమాలేసుకొని
వూరేగుతున్నాడు

నిప్పుల కొలిమయున సూర్యూడు
నీళ్ళ తర్పణం ఇస్తుంటే చూసి
ఆర్పటానికొస్తున్నామనుకొన్నడేమో
తప్పుడుపనులన్నీ చేస్తున్నాడు
అందుకే నాలుగు నిప్పులు పొయ్యండి వాని నెత్తిమీద

*09-08-2012