పీచు శ్రీనివాస్ రెడ్డి || ఇద్దరూ.. ఇద్దరే ||

ఒకడు
బాధను చెప్పుకుంటున్నాడు.
ఒకడు

ఆ బాధనే వెక్కిరిస్తున్నాడు .
ఒకడు
కడుపు కాలిందంటున్నాడు.
ఒకడు
ఒళ్ళు బలిసింద౦టున్నాడు.
రోడ్డు మీద రాయిని చేతపట్టి
ఇది నా ఆయుధం అంటాడొకడు .
పేపరు మీద పెన్నును పెట్టి
ఇది నా పైత్యం అంటాడొకడు .
ఆ ఒకడికి తెలియదు
రాయితో పగిలిన తల ఎవడిదోనని .
ఆ ఒకడికి తెలియదు
అక్షరంతో విరిగిన మనసు ఎవడిదోనని .
ఒకడు ధర్మాగ్రహం అంటాడు .
ఒకడు సత్యాగ్రహం అంటాడు .
జననంలోనూ ఇద్దరూ
కానీ స్థలాలే వేరు .
రంగంలోనూ ఇద్దరూ
కానీ అంతరంగాలు వేరు .
ఆరాటంలోనూ ఇద్దరూ
కానీ పోరాటమే వేరు .
మరణంలోనూ ఇద్దరూ
కానీ సమాధులే వేరు .
ఒక్కడే విడిపోయిన ఆ ఇద్దరు
కాకపోతే ' ఒకడు ' జనంలోనో .
' మరొకడు ' గద్దె పైనో .
అప్పుడప్పుడు ' ఒకడి ' స్థానంలో ' మరొకడు '
కొత్త గొంతును సవరించుకుంటారు .

04-09-2012