Aruna Naradabhatla కవిత

ఒక్క రోజు పండగ _________________అరుణ నారదభట్ల ఈ ఏడాదికి ఓ వాన వెలిసింది! ఇదో జాతీయ పండగలా మనసులను నిండుగా తడిపేస్తూనే ఉంది! ఒక్క 24 గంటలు సరిపోయేదా ఒక పదం రెండు అక్షరాలు నాలుగు మాటలు...తీర్చుకునే కోరికలు అర్థం మారిన అపురూపం ప్రేమ! ఓ శ్వేతపత్రంపై సంతకం చేసినట్టు ఎప్పుడూ పరధ్యానంలో మనసును ముంచేసేది ప్రేమ! ఏదినిజం...ఏది అబద్ధం తెలిసేలోపే జీవితాలు తెల్లారిపోతున్నాయి! ఓ గ్రీటింగ్ కార్డ్...ఓ చిలిపి చూపు... ఆపై ఓ చిరునవ్వు....అందమైన బంధం అంటూ హత్తుకుని పార్కులవెంట నాలుగు నెలల షికార్లు... ఆపై బోలెడన్ని పుకార్లు.... అటకెక్కే పుస్తకాలూ..చేజారే జీవితాలు! **** దేశాలు కూల్పొయిన చరితలు ప్రేమ! అందరాని చందమామను నేలకు దింపినా అపురూప కట్టడాలు గురుతులుగా కట్టించినా ఆశలు ఆవిరైన దేవదాసులను చూసినా లైలా మజ్ఞూల ప్రేమ కావ్యం చదివినా గుర్తొచ్చే మాధుర్యం ప్రేమ! నిండైన హృదయాల పండగ ప్రేమ ఒకరికి ఒకరై నడిపించేది ప్రేమ లేకున్నా ఉన్నట్టూ...చివరివరకూ జ్ఞాపకాల్లో నిలిచేది...కదిలించేదీ ప్రేమ! ....... ఇప్పుడు జారిపోతున్న జాబిలి నేలరాలుతున్న విలువ...ప్రేమ పూటకో రంగు మారే ప్రేమ కాసులకు...కోరికలకు అమ్ముడుపోయిన ప్రేమ... నమ్మకంకరువైన ప్రేమ... రాకాసి కాలానికి దాసోహం ప్రేమ క్షణానికో వింత లక్షణం! అప్పుడూ..ఇప్పుడూ..ఎప్పుడూ.. ప్రేమ ఒక కొత్త సృష్టి కావ్యమే నేమో... కాలం మారినాకొద్దీ చూసే ఫ్రేములు మారుతూనే ఉన్నాయి పాపం ప్రేమే...అలాగే ఓ పదం...రెండు అక్షరాలు...! 15-2-2014

by Aruna Naradabhatla



from kavi sangamam*కవి సంగమం*(Poetry ) http://ift.tt/1gkXgFL

Posted by Katta