పేజీలు

' నువ్వొక పచ్చని చెట్టయితే పిట్టలు వాటంతట అవే వచ్చి వాలేను'..!.

14, ఆగస్టు 2012, మంగళవారం

జయశ్రీ నాయుడు || మహరాజా బహుపరాకు ||


ఉదయం నుండి నడక మొదలు
పాదం అడుగు వేయనిదే మొదలెక్కడ
అయినా పాదాన్ని తలకెత్తుకోలేను కదా

తల కు తెగువెక్కువ
తనదే ఆలోచనన అనేమో
కూర్చుని ఆలోచిస్తే కుంపటిరాజేసేదెవరోయ్

చేతులొచ్చి మధ్యలో హాస్యం వడ్డించాయి
వాటికీ చేతలెక్కువ కదా..

ఈ వినోదమంతా చూస్తూ
రాణీలా నవ్వే హృదయం
ప్రక్కనే కాపలాదారు మనసు
కర్రపెత్తనమంతా దానిదే

కనిపించకుండా చూస్తూ
కదలకుండా అదిలిస్తూ
మెదిలే క్షణాన్ని సృష్టిస్తూ
జ్ఞాపకాలుగా అచ్చేస్తూ
మరపుగా తెగ్గొడుతూ
ఆత్మతో అతికిస్తూ

ఓ మనసు మహారాజా
వేల వేల బహుపరాకులు!

*13-08-2012

కామెంట్‌లు లేవు:

కామెంట్‌ను పోస్ట్ చేయండి