పేజీలు

' నువ్వొక పచ్చని చెట్టయితే పిట్టలు వాటంతట అవే వచ్చి వాలేను'..!.

4, ఆగస్టు 2012, శనివారం

గరిమెళ్ళ నాగేశ్వరరావు||హార్ధిక మాంద్యం||


కందిపప్పుకీ…పందికొక్కుకీ మధ్యన
జీవితం ఒక ప్రణాళిక.
ఆత్మహత్యకీ…అతివ హత్యకి మధ్యన
బ్రతకడం ఇక ప్రహేళిక.
నమ్మకానికీ…అమ్మకానికీ మధ్యన
సమాజం నిత్య పరీక్ష నాళిక.

కాలం కూలిపోతున్న కలల వంతెన
లోకం కాలిపోతున్న విలువల చితన.
ఇటు చూస్తే క్షామం…అటు చూస్తే కామం.
సంక్షోభమంలో మన సంక్షేమం.
మనస్సులో ప్రియురాలు
మంచంమీద ఇల్లాలు
కాపురం ఒక కాప్రమైజ్.
కొడుకు ఒక మార్కుల యంత్రం
కూతురి పుట్టుక మీద యుద్ధ తంత్రం.
వృద్ధుల చుట్టూ ముసిరే నిర్దయ...
ముఖాలు దాచుకు సుఖాలు వెదికే మనుష్యులు
దగాపడిన వైద్యం…కుదేలైన సేద్యం..
మత్తెక్కి ఊగేదొక్కటే…మద్యం
బీటీ వంకాయలా భయపెడుతోంది
కదూ…భవితవ్యం?!
***
కృష్ణుడు అలసిపోతున్నా…దుశ్శాశనుడు
ద్రౌపది చీరను లాగుతూనే ఉన్నాడు ఇప్పటికీ..
చీరను క్రింద పడేసి గీతోపదేశమ్ చేయాలి కృష్ణుడా!
అర్జునుడికిచ్చినట్లే..
ఆమెకో ఆయుధాన్నివ్వాలి అర్జంటుగా.

రాజభవనాలలో తిరిగే కీచకులు
మీడియా వేషంలో భీముడు...
హస్తినాపురం హడలిపోయింది కదా?

కంసుడూ..ఇంకా ధ్వంసం కాలేదు
ఆస్తికోసం పసిపిల్లలను మసి చేస్తున్నాడట.

పూతన వేషాన్ని మార్చి
బోరుబావుల్లో దూరుతోన్నట్టుంది
గోపాలురకి ఊపిరాగక ముందే
అప్రమత్తత బాణంతో…దానిని హరించు.

రూపాయి చుట్టూ తిరిగి అరిగిన మనిషి
పాపాల గుట్టలా పెరిగే వికృత రూపాన్ని చూస్తే
ఎవడి ముఖం మీద వాడే ఏసిడ్ చల్లుకున్నట్టుంది
ఎవడి సమాధికి వాడే ఇటుకలు పేర్చుతున్నట్టుంది.

గుప్పెడంత గుండె ఇప్పుడు…
హార్ధిక మాంద్యపు ఉప్పెనలో చిక్కుకుంది.
మానవత్వపు మందేయకపోతే...
ముప్పు తప్పనట్టే…ఉంది!!
*3.8.2012

కామెంట్‌లు లేవు:

కామెంట్‌ను పోస్ట్ చేయండి