డా.పులిపాటి గురుస్వామి|| ఐతుందంతా కానున్నదే ||

దురదృష్టం ఏదీ లేదు
అదృష్టం అంతకన్నా లేదు

ఆకాశం నుండి రాలే చినుకుల్ని
ఒక్కోరకంగా ఒక్కోడు వాడుకుంటాడు

ఏడవటం లో ఒకడికి త్రుప్తి
ఏడిపించడంలో మరొకడికి
ఏదో ఓ సమయంలో రెండు అవతారాల్ని
తొడుక్కుంటావ్

ఏదో ఒకరోజు
నీ వాహనం మీద ప్రయాణించిన కొంతసేపటికి
''ఇది ఇంతేగా''అని
కునిర్దారణకు దిగి
కరుకు నిగ నిగ వెకిలి నవ్వు
భుజం మీద కప్పుకుంటావు

వాహనం అదుపు తప్పిన వేగానికి
నువ్వు పట్టుదప్పి
రోడ్డు మీద రక్తపు కుప్పలో తేలతావ్
రెండు చేతులు మాత్రం
చప్పట్లు కొడతాయి
అవి నీవే

ఏదేమైనా
నువ్వు పూల భాషలో
జీవించ నంతకాలం
మనుషుల చావు తప్పదు .