ఏయ్...ఎలా ఉన్నావూ ..నే గుర్తున్నానా?
మర్చిపోతే కదా ఆ ప్రశ్న అని అలా కొంటెగా నవ్వేయకేఁ
నువ్ దరి లేని ఎన్ని గుప్పిళ్ళ క్షణాలు ఎత్తిపోసుకున్నానో తెలుసా
ఎంత విషాదాన్ని తాగి జీర్ణించుకుంటున్నానో
నీకేం తెలియదు ఇలా అల్లరిగా ఆలోచనలని అల్లేయడం తప్ప
వీధి గుమ్మంలో మెట్లనల్లుకున్న సన్నజాజి తీగ కూడా నవ్వుతోంది
మాతో నీకు పనిలేదా అంటూ...నువ్విచ్చిన అలుసే...
నీ బైక్ తడుముతూ కాఫీ తాగుతున్నానని
పక్కింటి మామ్మగారు కూడా నవ్వుతున్నారు ఇంత బెంగా పిల్లా అంటూ
నీకివేం అక్కరలేదు...ఏమీ పట్టనట్టు నన్నొదిలి వెళ్ళిపోయావ్
అవునూ ఎప్పుడొస్తున్నావ్? ఇవాళే నీ కలలోకి అనకు
నాకేడుపొస్తుంది...నువ్వు నువ్వుగా తెల్లారేసరికొచ్చేస్తావ్ గా
సూరీడలిగినా సరే సొడ్డి కొట్టి వచ్చెయ్యేఁ....వస్తావుగా...నిద్రొస్తోంది బజ్జుంటానే...
*07-08-2012
కామెంట్‌లు లేవు:
కామెంట్‌ను పోస్ట్ చేయండి