శైలజామిత్ర : ''నన్ను నన్నుగా..!''

ఎప్పుడో గాయపరిచి
సరాసరి గుండెలోకే దూసుకుపోయిన బాణం
ఇప్పటికి జ్ఞాపకాల
ముందు వరసలో ఉంది.
మానవీయ ప్రదర్శన అక్కడే!
నా గుర్తుగా ఉండనీయండి !

గాజు చెట్లతో నిండిన మానవారణ్యంలో
శరీరం ఒక వెదురు బద్ద లా ఉంది
అజ్ఞానం మనిషిని శిల గానో, చీకటి గానో మార్చితే
అప్పటికప్పుడు ఆయుధంలా మారింది
అనుమానపు నీడలు అక్కడే!
నా రూపం అక్కడే పాతేయ్యండి!

మనసులో ఎప్పటికీ ఒక
మరువలేని కల!
అంతా అలంకృతమే!
పుట్టుకతో రెక్కలు మొలిచినట్లు
మరణం మొక్కై నిలిచినట్లు..
గేటు ముందు బిక్షువు నిలబడేది అక్కడే!
నా మాటగా అతనికి నీడనివ్వండి!

అడుగు అడుగుకు వాడిపోయే మస్తకం
అద్వాన్నంగా నలిగిపోయే హృదయం
గతంలో మతంతో రాలేదు
జీవన్నాటకంలో ఒక పాత్రతో వచ్చింది
ఓట్లు కోరే ముఖ యంత్ర స్థానం అక్కడే!
నన్ను నన్నుగానే బతకనీయండి..!.

*24-08-2012