మెర్సీ మార్గరెట్॥నిలబడు నిలబడు॥

భూమిని ఊహల దారంతో చుట్టి
ఉత్తరం నుండి దక్షిణానికి
తూరుపు పడమరలను చేతుల్లో
బంధించి
విరుస్తున్న ఒల్లునుంచి సొమరితన్నాన్ని తరిమి
నిలబడు నిలబడు
ఈ రోజు నీదే అని

సముద్రాల అడుగుకెళ్ళి
నునుపు రాళ్ళు ఏరుకొని
రకరకాల చేపలతో
దొంగా పోలిసు ఆటలడి
అలసినప్పుడు హిమాలయాల్లో
మంచుని కరిగించి నీళ్ళు తాగి
ఎగురుతుండు ఎగురుతుండు
ఈ రోజు నీదెనని

ఆకాశపు అంచులు తాకి
అటుఇటు కొంచెం కోసుకుని
మేఘాలన్ని కుప్పనూర్చి
పిచ్చుక గూళ్ళు కట్టుకొని
నక్షత్రాల్ని ఏరుకోని ఒళ్ళోనింపుకొని
చేతిగాజులకు కాలిపట్టీలకు
వాటి తళుకుళు తగిలించుకుని
నడుస్తూఉండు నడుస్తూఉండు
ఇంకేదో చేసేదుంది ఈ రోజని

నీటిని ఆవిరి చేసి తనలో ఏకం
చేసుకొనే ఆ సూర్యతాపంలో దూరి
చినుకు చినుకులో హరివిల్లును
ఆవిష్కరిస్తూ
నెమలి పించంలో అంటుకొని
సీతాకొకకు రంగులద్ది
మట్టికి వాసన పూసి
పచ్చని రంగుల ముద్దలు
అడవులకిచ్చి
వర్షపు చినుకుల్లో కలిసి
ప్రవహిస్తూ ప్రవహిస్తూ ఉండు
ఈ రోజు జీవితం నిన్ను ప్రేమిస్తుందని

ఓటమిని ముక్కలు చేసి ఔషదాన్ని పిండి
చతికిలపడ్డ పట్టుదలకి
వైద్యం చేసుకొని
పాదలకు ఉత్సాహపు పారని పూసుకొని
అపజయాన్ని కాలి జోళ్ళు చేసుకొని
గమ్యం వైపు
పరుగెడుతూ పరుగెడుతునే ఉండు
జీవితంలో ఈ రోజు తప్ప
బ్రతకును గెలవడానికి ఇంకో రోజు లేదని

*22.7.2012