చంద్రశేఖర్ వేములపల్లి || సహజీవనం ||

అక్షరాల్నీ పదాల్ని వెదుక్కుంటున్నా
గుండె నరాల స్పందనకు రూపం ఇవ్వాలని
నీ అడుగుల అద్దుల్లో పువ్వునవ్వాలనుకుంటున్నా
నీతో మాధుర్యం నిండిన పదాల్లో చెప్పాలని



కానీ ...

మాధుర్యంలేని మోటు పదాల్నే మేదడు ప్రసవిస్తుంది
ప్రియనేస్తమా! నువ్వంటే నాకిష్టం
నిన్నే మనసారా ప్రేమిస్తున్నా అని



మరణశయ్యమీద నేనున్నప్పుడు
నా పక్కన నిన్నే చూడాలని
నాకు నేనిచ్చుకునే బహుమానం నీతో సహజీవనమేనని
జీవించేప్పుడూ ... జీవి శరీరాన్నొదిలి వెళ్ళినప్పుడూ


దేవుడు కరుణించిన వరానివి
నా జీవన వర్తమానానినివి ... నా ఆశల భవిష్యానివి
చిక్కని చీకటి ... అగమ్యగోచరం
జీవనావస్థలో వెలుగు కిరణానివి నీవే అని


అందమైన చిరునవ్వు ను స్వాగతిస్తూ
నేను నిద్రలేపే నా ఉదయరాగానివి ... హృదయభావానివి అని చెప్పే
అక్షరాల్నీ పదాల్ని ... వెదుక్కుంటున్నా
గుండె నరాల స్పందనకు అక్షర రూపం ఇవ్వాలని