రేణుక అయోల// దహనంలో ఒళ్ళు//

ఒళ్ళు దాచుకో
పైట జారనీయకు
జీన్స వేసుకోకు
దాని మీద టాప్ అంత చిన్నదేమిటి
మినీస్ ఎందుకు?

ఒద్దికగా వున్న ఒళ్ళు కావాలి
నాజూకుగా వుండాలి
తెల్లగా వుండాలి
ఒళ్ళు వంచి పని చెయ్యాలి

ఒళ్ళు దాచుకోకు
సహకరించు
నాజుకుగా వుంటేనే ఇష్టం
అలంకారాలెందుకు
నాకోసం అందంగా వుండు చాలు

ఒళ్ళు దాచుకోకు
మాంగల్యం లేనప్పుడు
నీకు ఇష్టాలా?
నీ జీవితం మాది
ఒళ్ళు గట్టిగా వుంచుకో
చాకీరి కోసం

ఒళ్ళు దాచుకో
ఆనారోగ్యం మాకు పడదు
శిధిలమైన ఒళ్ళు కాటికేగా!
ఒళ్ళు దాచేయ్యి
తెల్లటి వస్త్రంతో

దహనంలో ఒళ్ళుతగలపడ్డకా చల్లారింది
ఒళ్ళు అమ్ముడుబోదని...