స్వాతి శ్రీపాద || కాస్సేపాగు ||

రణగొణ ధ్వనులతో తుళ్ళిపడే
వాస్తవం అల్లరి పాపాయిని
మగత మునివేళ్ళ లాలితో నిద్రపుచ్చి
నిశ్శబ్దం పరదాలను సరిచేసి
మన ఏకాంత బృందావనం లోకి
ఆగమేఘాలపై వచ్చేస్తాను
కాస్సేపాగు

ఉదయం నుండి వెలుగు శూలాలు
నీకూ నాకూ మధ్యన గోడ కట్టినా
తెరవెనుక కదిలే నీడల ప్రదర్శనలా
ప్రతిపదం నీ తలపుల్లో దొర్లి పెదవిపైకి పాకిన
మధురానుభూతినడుగు
చూపు ఏమూలలను వెతికినా
ప్రతి లిప్తల్లోనూ నెమరేసుకున్న
మన సు కదలికల నడుగు
ఒత్తిగిలిన మౌనం పొత్తిళ్ళలో ఒదిగి
నాచుట్టూ కవచమై నిలిచే నీ ఉనికిని అడుగు
అనుక్షణం పీల్చే నాఊపిరి గాలివి నీవని
మళ్ళీ చెప్పాలా
కాస్సేపాగు
మన ప్రపంచం ఉద్యమించేందుకు.

18-07-2012