పేజీలు

' నువ్వొక పచ్చని చెట్టయితే పిట్టలు వాటంతట అవే వచ్చి వాలేను'..!.

25, జులై 2012, బుధవారం

శిలా లోలిత || చూపులు ||

కన్ను తడిగుండెల మడతల్ని
విప్పుతూ వుంటుంది
ఆ రెప్పలకు
బతుకుమూత మూయడమూ తెలుసు

కన్రెప్పల దారాలతో
ఒక్కొక్క గాయాన్ని కుట్టుకోవడమూ తెలుసు
అంతరంగ యుద్దాల్లో
నెత్తురోడిన జీరల్ని దాచుకోవడమూ తెలుసు

నల్లటి అశాంతుల ఆవర్తనాల్ని
శ్వేత బిందువులతో సమర్ధించడమూ తెలుసు
1
చంక్రమనాలు చేసే బతుక్కి
చూపై, స్థిరమై, నిలిచే అభివ్యక్తి .
ఎదురు చూపుల్లోంచి ,బతుకు చూపుల్లోంచి
బతుకంతా ఎదురుచూడ్డం అంటే
ఒక జీవిత సాఫల్యం చేకూరినట్లు -

అలజడుల ఊపిరుల నడుమ
కాలాన్ని కొలవడం ఒక యుద్దమే!
అశాంతి మాత్రమే చూపుల్లోంచి కరుగుతుంది ,
కాలాన్ని కదుపుతుంది
2
ఎడారుల నిశ్శబ్దం
ఎండుటాకుల పైనుంచి లేచిన చిరుశబ్దం
ఊపిరినుంచి ఎగిసిన నిట్టూర్పు-
అన్నీ చూపులే!
అన్నట్టు, లోచూపు ఇప్పుడే వెలిగింది.
అన్నీ -చిత్రాలే ఇక !!!

*25.7.2012.

కామెంట్‌లు లేవు:

కామెంట్‌ను పోస్ట్ చేయండి