డా.పులిపాటి గురుస్వామి || అనుకోని జీవితం ||

కిందపడి
మీదపడి
చెప్పాపెట్టక
నీ దగ్గరికి వస్తే
సందేహాల తాళం నవ్వింది

కొన్ని అనుభవాలు
విసురుకుంటూ వెళ్తున్ననీకు
నా రసాయనిక మనసు చర్య
తెలియదు

దిక్కులేని ఆలోచనల్లో
నడిపిస్తున్న నన్ను
పడవేసి ,పాదాల మీదుగా
ఓ యువకుడి వాహనం
పరుగెడుతుంది

నువు కలవర పెడుతున్న రాత్రి
నాలుగక్షరాలు నీకోసం
రాద్దామని కూచుంటే
కరెంటు పోతుంది

గాడిదయ్యో
బూడిదయ్యో
బతుకుతూ ఉంటా ...కానీ ...కానీ
వయసై పోతుంది.
 *25.7.2012