అవ్వారి నాగరాజు || ఒకరోజు ||

పాపా నిన్ను చూసాను

నల్లని నీ కన్నుల ఆవరణంలో ప్రసరించే తడి వెలుగులో నిన్ను చూసాను

తేరిపారగ చూసే ఒక పువ్వు
తన లేలేత వేళ్ళతో ముట్టుకొన్నప్పుడు సుతారపు రేకులు రేకులుగా
విప్పారుతూ నిన్ను చూసాను

నీ స్పర్శల పులకింతలో మొలకలెత్తి మన్ను దోసిలి పొరల దాటుతూ నిన్ను చూసాను

వొడలని తేజమేదో నీ చుట్టూ పరిభ్రమిస్తుండగా
మనుషులు చేసే ప్రయాణాలలో తరుచూ ఎందుకంతగా చెరిగిపోతారో తెలియని
సంభ్రమంతో నిన్ను చూసాను

నీ తేజపు సౌందర్య దీప్తిలో
ఒక భాష్పపు దీపమై వెలుగుతూ చెంపల జారి నిన్ను చూసాను

పాపా నిన్ను చూసాను.

*29-07-2012